Read kalabari Ẹsịta 9 Bible Online

Ẹsịta 9 - kalabari bible

Ẹsịta 9

¹Mịọkụ oyi maa akalụ finji mẹ, tẹ ịn kẹ Adà sịn akalụ mẹ ḅẹ oyi tẹra aḍin finji karama ene mẹ, anị ene tẹ Amadaḅọ ḅe tọn ye mẹ na oloko mẹ na kiri ọkị ḅarị ene mẹ; anị gbọrụ ene mẹ tẹ Juu-ḅẹ-apụ ma na fịya-a apụ ma ḅiokoromam ini ịn kẹ sịḅịda ḅẹ sakị mẹ, kụma ene mẹ ḍimatẹ ḅo Juu-ḅẹ-apụ ma rẹ inina fịya-a apụ ma kẹ sịḅịda ḅẹ sakị sọ tẹ.

²Amadaḅọ Ayasụrọsị itu mamgba ḅụ simearị opu ama ma ḅụ Juu-ḅẹ-apụ ma nwẹnị ịna opu ama ma ḅụ ịna aḅụụ kobiri, ḅara kẹ ye kẹ in lama ḅẹ ḍọkị ḅarị apụ ọgọnọ gbana ḅẹ ḅara. Gbọrụḅọ-sọ inetẹ ịna kuḅu sịẹ ḅẹ ḅara mịẹ-a, kẹ gotẹ ọkọ ḅẹẹarị, ịna ḍiki-ḅalafa mẹ tomi mamgba ọgọnọ gbana tẹ ẹrẹsị.

³Mọdịkaya ḍiki-ḅalafa mẹ ịna ọgọnọ gbana tẹ ẹrẹsị itu-itu ma ḅẹ sịḅịdapụ ma na, Amadaḅọ ḅe na simetẹ ḅẹrẹtọn-arị apụ ma na ḅẹrẹtọn-apụ ma na, Amadaḅọ ḅe fịrịmẹnjịarị opu apụ na mamgba ḅarasụa Juu-ḅẹ-apụ ma pịrịm.

⁴Kẹ gotẹ ọkọ ḅẹẹarị, Mọdịkaya gburo-gburotẹ opu sọm Amadaḅọ ḅe warị mẹ ḅio, tẹ ori ereso wasama mu itu-itu mamgba ikelema-korom; kẹ gotẹ ọkọ ḅẹẹarị, Mọdịkaya nwẹn-sịn ḅọ ḅe kụrọ tọrọkọ tọrọkọ mum.

⁵Anieḅụ Juu-ḅẹ-apụ ma okologie kẹ inina fịya-a apụ mamgba ḅaam. Ini ịna aḅụụ ḅẹlẹ ḅara kẹ inima ḍiki-ḅioḅu apụ ma pẹlẹ-ḅaa tẹ in famam.

⁶Suza sịḅịda ama mẹ ḅioju ḅio ḅụ Juu-ḅẹ-apụ ma kịnị ẹndẹ sọnọa si finji (500) ḅaam.

⁷Tẹ Pasanideta na, Dalifoni na, Asipata na.

⁸Porata na, Adaliya na, Aridata na,

⁹Pamasita na, Arisayị na, Aridayị na Vayịzata na,

¹⁰Emanị, Hamẹdata owiḅọtụḅọ ḅe oyi owiapụ-awọmẹ Juu-ḅẹ-apụ ma na fịya-a apụ ma sọ kẹ sụa ḅaam, kụma in ḅara kẹ gberie-sọ lama tẹ fọịn-a.

¹¹Anị gbọrụ ene mẹ ḅụ in Suza sịḅịda ama mẹ ḅio ḅaa atomi kịẹn-ḅịḅị ḍuko kẹ Amadaḅọ ḅe pịrịm.

¹²Amadaḅọ ḅe nwẹnị Ama-da ẹrẹḅọ Ẹsịta ḅẹẹ, “Suza sịḅịda ama mẹ ḅio Juu-ḅẹ-apụ ma kịnị ẹndẹ sọnọa si finji (500) ḅaa tẹ Emanị oyi owiapụ-awọmẹ sọ ḅaa tẹ. Ịn tọ-ḅara la ye mịẹ tẹ kirikọn Amadaḅọ ḅe nyana itu-itu ma ḅio ḅụ! Mịọkụ í tiye ḅiiarị? Anị ị́ ḅara la ḅa; ị́ pịkị tiye ḅiiarị? Ini anị mịẹ ḅinma ị́ pịrị ḅa.”

¹³Ẹsịta nwẹnị ḅẹẹ, “Anị Amadaḅọ ḅe ḅụụ ḅẹlẹm ḅẹḅẹ, yee ò minini Juu-ḅẹ-apụ ma tẹ Suza ḅụ simearị apụ ma mịmgba ḅẹ oloko mẹ wẹrị tẹ ḅẹẹ ḅara mẹ kẹ ḅaa ḅụ sọ mịẹ. Anịsakị yee Emanị oyi owiapụ-awọmẹ ma kịnị-kpọḅaaye mẹ ọgọnọ sololo sime.”

¹⁴Anieḅụ Amadaḅọ ḅe nwẹnị tọn mịnẹ miemẹ mịẹ; Suza ḅụ oloko nwẹnị paka-ḅo, tẹ in nwẹnị Emanị oyi owiapụ-awọmẹ ma kpọ sololo.

¹⁵Ịn kẹ Adà sịn akalụ mẹ ḅẹ ngei aḍin fa jei eneḅaka ḅụ, Suza ḅụ sime Juu-ḅẹ-apụ ma nwẹnị pịkị kobiri, tẹ Suza ḅụ kịnị jeia si (300) ḅaa; kụma in ḅara kẹ gberie-sọ lama tẹ fọịn-a.

¹⁶Mịọkụ osi Juu-ḅẹ-apụ ma tẹ Amadaḅọ ḅe nyana itu-itu ma ḅụ sime apụ ma sọ nwẹnị ịna ḍumo ḍụa ḅọrọma ḅẹ ḅara kẹ kobiri, tẹ ini na fịya-a apụ ma ḅụụ ḅarasụa in ḅụụ pịrị tẹ in ḍiki-ḅioḅuarị apụ ma ḅụụ kịnị eseni apuku, sọnọma ẹndẹ finji na kịnị oyia asi (75,000) na ḅaa; kụma in ḅara kẹ gberie-sọ lama tẹ fọịn-a.

¹⁷Miemẹ anie Adà sịn akalụ mẹ ḅẹ oyi tẹra aḍin finji eneḅaka mịẹ ye, tẹ ngei aḍin fa jei eneḅaka ḅụ ini ịnyọsaram. Tẹ nwẹnị anị ene mẹ kẹ kopini afịaị fị na, ḅioḅẹlẹ na ene sọma.

¹⁸Kụma Suza ḅụ sime Juu-ḅẹ-apụ ma oyi tẹra aḍin finji karama ene mẹ na, ngei aḍin fa jei karama ene mẹ na kẹ kobirim tẹ jei aḍin karama ene mẹ ḅụ ịnyọsaram, tẹ nwẹnị anị ene mẹ kẹ kopini afịaị fị na, ḅioḅẹlẹ ene na sọma.

¹⁹Anịẹrẹsị kala-ama ḅẹ Juu-ḅẹ-apụ ma tẹ finji tẹ ama ḅio simearị apụ ma nwẹnị ịn kẹ Adà sịn akalụ mẹ ḅẹ ngei aḍin fa jei karama ene mẹ kẹ ḅioḅẹlẹ na kopini afịaị fị na, Ịnyọsara-Ene na, ene tẹ ini ịna ḅụụ ḅẹlẹ tẹ sẹlẹ-ọkị aḍiepịrị-aị kẹ jụmọ-jụmọ pịrịarị ene na sọma.

²⁰Mọdịkaya mịna aị ma kẹ ḍiri ḅio kẹẹ koromam, nwẹnị ḍiri kẹẹ tẹ kẹ Juu-ḅẹ-apụ mamgba tẹ Amadaḅọ Ayasụrọsị itu mamgba ḅio sime apụ fịrịmam kpeki anga na ala anga na ḅụ,

²¹Ḍuko ịn pịrịarị mịnẹ ini ịn kẹ Adà sịn akalụ mẹ ḅẹ ngei fa jei na jei karama ene ma ḅụ ịnyọsara tẹ alalị fị kụra-kụra ḅụ.

²²Ene tẹ Juu-ḅẹ-apụ ma inina fịya-a apụ ma ḅụụ ḍụa ḅọrọma nyana eneḅaka ḅara ḅụ, na akalụ mẹ tẹ ịna kururu pịkị ḅo ḅioḅẹlẹ sọ tẹ ịna ḍụẹịn ḍuu ḅo Ịnyọsara-Ene mịẹm, mịnẹ ini arị ene ma kẹ kopini afịaị fị ene na, ḅioḅẹlẹ ene na, sẹlẹ ọkị aḍiepịrị-aị kẹ jụmọ-jụmọ fịrịma ene na, ḍiepịrị-aị kẹ igoin-apụ pịrị ene na mịẹ.

²³Anieḅụ Juu-ḅẹ-apụ ma in suku-saakị mịẹtẹ ḅara mẹ na, Mọdịkaya wẹrịtẹ kẹ ḍiri kẹẹ in fịrịma ḅara mẹ na mịẹm.

²⁴Kẹ gotẹ ọkọ ḅẹẹarị, Emanị Egagị ḅẹ ḅọ, Amẹdata owiḅọtụḅọ, Juu-ḅẹ-apụ mamgba na fịya-a ḅọ ḅe Juu-ḅẹ-apụ ma ḅaa ḅẹm gotẹ ḅẹrẹ ḅịyam, tẹ ịn kẹ poo sịn ye saram, anie apịan sụa, kẹ in ḅaa tẹ in gbẹẹ ḅẹ ḅara.

²⁵Kụma Ẹsịta ḅo Amadaḅọ ḅe tọrọkọ la tẹso, ò nwẹnị ḍiri kẹẹ tẹ tọn mịnẹ ò kẹ Juu-ḅẹ-apụ ma mịẹ ḅẹ ḅịya tẹ si-sịḅịḅio ḅẹrẹ mẹ ḅo ò soku-ḅẹ sịḅị ọgọnọ gbana, tẹ ori na, ori owiapụ-awọmẹ na, kịnị-kpọḅaaye mẹ ọgọnọ ini in kpọ-ḅaa.

²⁶Anịẹrẹsị in nwẹnị “Poo” mẹ ḅụ ẹrẹ pakama mịna ene ma sịn “Purimu.” Anịẹrẹsị mị ḍiri mẹ ḅio kẹẹ wararị aị ma na, mị ḅẹrẹ mẹ ḅụ in tọrụ kẹ da tẹ aị na, in la tẹ aị na gotẹ.

²⁷Juu-ḅẹ-apụ ma tọn tẹ anị kẹ ini na, ịna ḅụụ paka-ḅo aị na, ịna ḅụụ so apụ mamgba na ọgọnọ gbanam mịnẹ gbarị-a ḅara ḅụ in mịna maa ene koko ḅa anị wẹrịtẹ ḍiri mẹ ḅio kẹẹ wararị ḅara na, in tọn sakị mẹ na kụra goyegoye ḅụ.

²⁸Ḅụọ fa ḅụọ paka ḅụ in mịna ene ma kẹ ḅiokoroma furo goyegoye na, opu ama goyegoye na ḅio ḅụ, anịsakị Juu-ḅẹ-apụ ma ogbo ḅio ḅụ mịnẹ sime Purimu pịrị ene ma ḅịkị mu gbala-gbala ḅarị mịẹ-a ḅụ sọma, anịanịa ịna ḅụụ paka-ḅo apụ ogbo ḅio ḅụ mịna ene ma kẹ ḅiokoroma mẹ daasịẹ ye sọ.

²⁹Anịtẹso Amadaḅọ ta Ẹsịta, Abiyẹlị ẹrẹḅọtụḅọ ma na, Mọdịkaya, Juu-ḅẹ-ḅọ ḅe na nwẹnị ḅintẹ ḅara kẹ ḍiri kẹẹ, tẹ Purimu gboloma maaịn karama ḍiri mẹ mịẹ kụrọma.

³⁰Ayasụrọsị ama-da kụrọ mẹ ḅẹ tẹra itu ofori itu sonioa si oyi finji ma ḅụ simearị Juu-ḅẹ-apụ mamgba in ḍiri kẹẹ in fịrịma famam, dein na karakara ye ḍuko na ẹkwẹn-aḅịḅị ḅụ.

³¹Mịnẹ mịna ịn kẹ Purimu sịn eneḅaka ma kẹ elekima sụa Mọdịkaya, Juu-ḅẹ-ḅọ ḅe na, Amadaḅọ Ta Ẹsịta na wẹrịtẹ tọn arị asakị ma ḅụ Juu-ḅẹ-apụ ma pịrị ḅara, ịna ḅuru-ịmọ na, ịna kururu na gbolomaye ḅụ in wẹrịtẹ mịẹ kụrọma kẹ ịna ḅụụ na, ịna ḅụụ paka-ḅo apụ na pịrị tẹ ḅara.

³²Mịna Purimu mẹ ḅụ mịẹ ḅarị aị ma Amadaḅọ Ta Ẹsịta tọn ye mịẹarị kụrọ sịẹ ye tẹ ini anị kẹ ḍiri ḅio kẹẹ sụa ye sọm.