Read kalabari Paka-so 1 Bible Online

Paka-so 1 - kalabari bible

Paka-so 1

¹Mịna owiapụ-awọmẹ ma anie ịna ḍaḅọ Jekọbụ na so Ijiputi mu tẹ anịanga anga apụ ma, ọrụḅọ-ọrụḅọ amịna warị-kpo na mum:

²Rubẹnị na, Simiyọnị na, Livayị na, Juda na.

³Ịsaka na, Zẹbulọnị na, Benijamịnị na,

⁴Danị na, Nafutali na, Gadi na, Asa na.

⁵Jekọbụ ḅụụ ḅụ paka-ḅo apụ inimgba kịnị atesi oyi finji. Josẹfụ kụma, ori Ijiputi ḅụ emi ogbo in ḅom.

⁶Sakị ḅọrọ tẹso, Josẹfụ na ori owiapụ-amịnapụ na, ịna afuro mamgba na fịịm, tẹ anị ḅụọ ḅẹ apụ mamgba ḅọrọm.

⁷Kụma Izirẹlị furo-ḅẹ-apụ ma awọ iyi lamarị tẹ gburo-gburoma kamam; in kama lamam, anie mịẹtẹ ama mẹ ḅio ini-ini-ini, tẹ anị Ijiputi-ḅẹ-apụ ma ḅalafamam.

⁸Sakị kẹlẹ ḅọrọ tẹso, ịwọ amadaḅọ tẹ Josẹfụ gbolomaye nimi-a ḅọ nwẹnị ḅo Ijiputi ḅụ ama-da.

⁹Ọ̀ nwẹnị ori atomi ḅẹẹ, “Ḍikii, Izirẹlịapụ ma ịn kama tẹ ḍụḅarị ḅara, si kẹ wa mịẹ ḅa.

¹⁰Ó ḅoo, yee wa nimi anga kẹ ini na kọọn anieofori ịn ḅofa kama ma-mu, tẹ ọmụ ḅo wa la-la, ịn wamịnị na fịya-a apụ ma na sọ tẹ owu kẹ wa paka, tẹ sịẹ mẹ ḅio mangị-so.”

¹¹Anịẹrẹsị ịn kụrọ kọrịnama tọn ịn pịrị ḅẹ sịḅịdapụ tọn ịn pịrịm, ini iku dogi-aị ḅụ ḅụụ-fụka kẹ ịn pịrị ḅẹ ḅara; tẹ ini ngọ koko opu ama Pitomi na, Ramịsịsị na nama Fero pịrịm.

¹²Kụma ini ịn ponoma ḅaka ḅara, mie ịn kama ḅakarị ḅara, anie ịn pịkị wasama jen anga la ḅakarị ḅara. Ijiputi-ḅẹ-apụ ma nwẹnị opu ḅalafa nyana Izirẹlịapụ ma pịrị.

¹³Mie ḅụ ini Izirẹlịapụ ma mịẹtẹ ịn kụrọ ḅara kẹ kụrọ kọrịnama kọrịm,

¹⁴tẹ kụrọ fịrị mẹnjị ḅụ mịẹtẹ ịna aḍumo akụm, lịka na biriki tẹmẹ na ḍụọ ḅio kọrịnama ḅara-ḅara kọrị na ḅụ; ịna kọrịnama mamgba ḅụ ini ịn mịẹ tẹ ịn kụrọ ḅara kẹ kọrịnama kọrịm.

¹⁵Anịtẹso Ijiputi ḅẹ amadaḅọ ḅe nwẹnị Hiburu ḅẹ ere-iyimapụ ma ḅẹẹ, ini ḅẹ gbọrụḅọ ẹrẹ Sifara, osi-ḅọ Puwa:

¹⁶“Ọ́ ḅarasụa Hiburu ḅẹ ereme ma iyima ḅẹ tẹ iyi mẹ sọ sakị, tụḅọ mẹ owiḅọ ḅẹḅẹ ọmịnị ọ̀ ḅaa, kụma nwẹnị ẹrẹḅọ ḅẹḅẹ ọmịnị á ḅaa ma.”

¹⁷Kụma ere-iyimapụ ma Tamụnọ mangịmam ẹrẹsị, ini Ijiputi ḅẹ amadaḅọ ḅe tọn ịn pịrị ḅara mịẹ-a, tẹ owiapụ-awọmẹ ma wẹrịso tẹ in ḍumo-simem.

¹⁸Mie ḅụ Ijiputi ḅẹ amadaḅọ ḅe nwẹnị ere-iyimapụ ma fịrịma ḅo tẹ ịn gbela, “Ó tiegotẹ miemẹ mịẹ, tẹ owiapụ-awọmẹ ma wẹrịso tẹ in ḍumo?”

¹⁹Ere-iyimapụ ma nwẹnị Fero pakịrị, “Hiburu ḅẹ ereme ma ini Ijiputi ḅẹ ereme ma sime-ḅara sime-a, kẹ gotẹ ọkọ ḅẹẹarị, ini ịnyọ nyana lama wararị tẹ iyi tẹrẹmẹ ere-iyimaḅọ ma ḅo laarị.”

²⁰Mie ḅụ Tamụnọ iḅi ḅara kẹ ere-iyimapụ ma na mịẹm; tẹ Izirẹlịapụ ma kama tẹ ḅalafama lamam.

²¹Ere-iyimapụ ma Tamụnọ mangịmam ẹrẹsị, ọ̀ mịẹ tẹ ini sọ ịna soku-ḅẹ awọmẹ iyim.

²²Anịtẹso Fero tọn ori atomi mamgba pịrịm, “Owiḅọtụḅọ tẹ ini iyi Hiburu ḅẹ apụ ma pịrị ḅọ goḅọ-goḅọ, ọmịnị mḅọ kẹ Nayịlị nwẹn-sịn tọrụ mẹ ḅio gbin nguma-a, kụma ọ́ wẹrịso tẹ ẹrẹḅọtụḅọ goḅọ-goḅọ ḍumo-sime.”