Read kalabari Paka-so 11 Bible Online

Paka-so 11 - kalabari bible

Paka-so 11

¹KỊNỊNYANAḄỌ ḅe nwẹnị Mozizi ḅẹẹ “Anịsọ gbọrụ fomu-ḅara paa kọn wararị àrị ọkị-ḅo Fero na Ijiputi na ọgọnọ gbana ḅarịye; aniemẹ ḅọrọ tẹso sakị, ori ọ́ wẹrịso tẹ mịanga ḅụ ó so ḅa — ori ọ́ wẹrịso tẹ ó so sakị, ọ̀ gbọrsịḅị ó dee pakama ḅa.

²Mịọkụ ó mu tomi ma naa ḅarị ḅara kẹ ẹkwẹn ịn pịrị mịnẹ owiḅọ nwẹn-sịn owiḅọ na, ẹrẹḅọ nwẹn-sịn ẹrẹḅọ na mḅọ na kpeki tẹ angarị ḅọ ḅara ḅụ golu na, seleḅa na ye-ḅiri-aị ḅii.”

³KỊNỊNYANAḄỌ ḅe nwẹnị Ijiputi ḅẹ apụ ma tọrụ ḅẹlẹma Izirẹlịapụ ma pịrị. Anie mẹ sikima, Mozizi nwẹn-sịn owiḅọ ḅe anie Ijiputi ama mẹ ḅio na Fero afịrịmẹnjịapụ ma tọrụ na, tomi ma na tọrụ ḅụ gburo-gburotẹ opu tomḅọ lamam.

⁴Anịtẹso Mozizi nwẹnị ḅẹẹ, “mie KỊNỊNYANAḄỌ ḅe ḅẹẹ ḅara: Ḍin ogbo ḅiri ḅụ àrị Ijiputi ama mẹ ogboku ḅụ mẹnjị-ḅọrọ ḅa;

⁵tẹ Ijiputi ama mẹ ḅio tarị iyi awọmẹ mamgba fịị ḅa, Fero tarị tụḅọ tẹ ori emine ọgọnọ lẹgị ḅarị ḅọ ḅe ḅụ saakị ọkị mu fịrịmẹnjị-ẹrẹḅọ ma tẹ ye gbẹẹ-ye mẹ ọḅụjụ sime ḅọ ma tarị tụḅọ na, opu anama ma iyi tarị awọmẹ mamgba na la.

⁶Anịsakị gburo-gburotẹ opu owu tẹ jene-jene kịnị amụ gbala-gbala kọn-a owu ḅara, tẹ pịkị ḅarị gbala-gbala kọn ḅịa owu Ijiputi ama mẹmgba ikelema-koro ḅụ kọọn ḅa.

⁷Kụma Izirẹlịapụ ma ḅụ obiri kịngẹ sọ oloku ḅẹ tomḅọ-tomḅọ, anịanịa nama sọ pịrị ḅịa; mịẹtẹ í nimi ḅarị ḅara mịnẹ KỊNỊNYANAḄỌ ḅe Ijiputi ḅẹ apụ ma na Izirẹlịapụ ma na ogboku kịrị pakama tẹ.

⁸Anịsakị mịna ị́ afịrịmẹnjịapụ mamgba ị̀ dama-ḅo tẹ sịḅị-tuu ị̀ pịrị tẹ ḅẹ ḅa, ‘Paka-soo, ị́yẹrị na tomi ma tẹ í ḍuka-so apụ mamgba na.’ Anie mẹ ḅọrọ sakị à paka-so ḅa.” Tẹ Mozizi kụrọ ịganị ḅụ Fero ḅụ paka-som.

⁹Anịtẹso KỊNỊNYANAḄỌ ḅe nwẹnị Mozizi ḅẹẹ, “Fero í poki ḍụkụ ḅịa; mịẹtẹ ị̀ ḅụụ-buama-aị ma Ijiputi ama mẹ ḅio seri-seri ḅarị ḅara.”

¹⁰Mozizi na, Erọnị na Fero tọrọkọ mịna ḅụụ-buama-aị mamgba mịẹm; anịsakị KỊNỊNYANAḄỌ ḅe Fero ḅioḅẹngbọ kụrọmam, tẹ ọ̀ ḍụkụ tẹ Izirẹlị ḅẹ apụ ma wẹrịso tẹ ini ori ama mẹ ḅio paka-so-a.