Read kalabari Paka-so 12 Bible Online

Paka-so 12 - kalabari bible

Paka-so 12

¹KỊNỊNYANAḄỌ ḅe nwẹnị Ijiputi ama mẹ ḅio Mozizi na Erọnị na ḅẹẹ,

²“Mị akalụ mẹ akalụ ma ḅụ Suku-saakị akalụ sọ ọ́ pịrị ḅa; anị kụra mẹ ḅụ tarị akalụ sọ ọ́ pịrị ḅa.

³Ḍuko Izirẹlị ḅẹ tomina-ogbo mẹmgba pịrịị, mịnẹ mị akalụ mẹ ḅẹ oyi aḍin karama ene mẹ ḅụ owiḅọ nwẹn-sịn owiḅọ ịna aḍapụ awarị ma la ḅara ḅụ gbọrụḅọ, gbọrụḅọ asambịrịma gbọrụ anana ọkị mḅọ warị-kpo pịrị ḅa;

⁴tẹ warị-kpo mẹ gbọrụ asambịrịma anana pẹị ḅụ ịrụ ḅakam ḅẹḅẹ, anịrẹ gbọrụ owiḅọ na ori na kpeki tẹ angarị apụ ḅụ ọ̀ warị palị ḅọ ḅe ori na gbọrụ asambịrịma anana ọkị tẹ tomi ma kịẹn-ḅịḅị ḅụ ọrụḅọ-ọrụḅọ inetẹ pẹị ḅẹ ḅara kẹ nama ḅe ḍiya ḅarịye.

⁵Ọmịna asambịrịma anana ḅe ḅẹkụ ọ̀ ḅụụ paka ḅịa, gbọrụ kụra sịḅị ḅụ ḅọrọ tẹ nama, anana ma ḅụ, anịanịa oḅori ma ḅụ mie ọmịnị ọkị ḅarịye.

⁶Ọmịnị ọ̀ kẹ wẹrị nwenii mị akalụ mẹ ḅẹ ngei aḍin fa jei karama ene mẹ la ḅa, anị sakị mie ḅoḅiri-so ḅụ bebe Izirẹlị tomina-ogbo mẹ ịna asambịrịma anana ma ḅaa ḅarịye.

⁷Anịtẹso ịn nama mẹ ọmbie mẹ ḅụ ọmbie ọkị tẹ kẹ warị ma tẹ in sime tẹ nama mẹ pẹị ḅarị awarị ma ḅẹ ḅọkọ maa sịn ma na ḅọkọ mẹ ḅẹ ẹngbẹsẹ mẹ na tan ḅa.

⁸Anị ḍin mẹ ḅụ mie ịn nama mẹ pẹị ḅarịye, nama mẹ ịn nwẹn fọị ḅa, sunmaye sọ-a fịturu na, akụarị ịnyịnya na mie ịn kẹ nama mẹ ḅalị ḅarịye.

⁹Ó minji kẹ nama mẹ sọma, anịanịa ịwọma anị pẹị, kụma fọị mie ọmịnị anị fọị ḅarịye, anị ḅẹ sịḅị mẹ na, ḅụọ ma na pịkị anị ḅio sime aị mamgba na anị na.

¹⁰Ọmịnị anị ḅụ ye kalịye sọ pẹị kọnma wẹrị nwenii dede-ḅio mẹ la ḅịa, kọn ḅo dede-ḅio mẹ la ye, la ye ọ́ kẹ fịnị ḅio sụa dọkịmaa.

¹¹Mị-ḅara mie ọ́ kẹ anị fị ḅarị ḅara ó ḅiri-ponoye kẹ ọmịna ḅiri ponoo ọmịna okuro kẹ ọmịna aḅụọ sụa, tẹ ḅara ḅio ọmịna mkpara ọlọọ; anịsakị fọnya ḅara mie ọ́ kẹ anị fị ḅarịye. Mie mẹ anie KỊNỊNYANAḄỌ ḅe Saḅaḅọrọ-Alalị mẹ.”

¹²“Kẹ gotẹ ọkọ ḅẹẹarị, anị ḍin mẹ ḅụ arị Ijiputi ama mẹ mẹnjị-toluḅọrọ ḅa, tẹ Ijiputi ama mẹ ḅio tomi-o, nama-o, tarị iyi awọmẹ mamgba à ḅaa fama ḅa, anịsakị arị ị̀ ḅẹrẹkọn mịẹ-pakama ḅa Ijiputi ḅẹ oru-atamụnọ mamgba ọgọnọ ḅụ. Yẹrị anie KỊNỊNYANAḄỌ ḅee.

¹³Ó simearị awarị ma ḅụ mị ọmbie mẹ elekima sọ ọ́ pịrị ḅa, anịsakị àrị ọmbie mẹ ẹrị sakị àrị ọ́ saḅa-ḅọrọ ḅa, tẹ gbọrụ fomu-ḅara sọ ḅo ọmịna ọgọnọ gbana tẹ ọ́ ḅaa ḅịa, arị Ijiputi ama mẹ ḅaa ḅarị sakị.

¹⁴Mịmgba mẹ ọ́ kẹ ḅiokoroma ḅarị ene sọ ọ́ pịrị ḅa, tẹ ọmịnị anị kẹ kopini afịaị fị KỊNỊNYANAḄỌ ḅe pịrị alalị ene ḅara wẹrị ḅa, ḅụọ-fa-ḅụọ-paka ḅụ ọmịnị anị kẹ kụrọ ḅara ḅio sime ḅọ sụa oloko sọma tẹ anị kẹ elekima sụa gbamaso ḅa.”

¹⁵“Sọnọma aḍin ọ́ nwẹn kẹ sun-a fịturu fị ḅa tarị eneḅaka mẹ ḅụ ọmịnị ọmịna awarị ma ḅio fịturu sunmaye pakama fama ḅa, kẹ gotẹ ọkọ ḅẹẹarị, ḅẹḅọ-ḅẹḅọ, tarị ene mẹ ḅụ ọkị nwenii mu sọnọma aḍin karama ene mẹ la sunmatẹ fịturu fị ḅọ fị ḅọ, anị tomḅọ mẹ Izirẹlị ḅụ ini mḅọ pẹlẹ-siin ḅa.

¹⁶Tarị ene mẹ na, sọnọma aḍin karama ene mẹ na ḅụ ó kobiri tẹ sunsin KỊNỊNYANAḄỌ ḅe pịrị ḅa; arị ene ma ḅụ gbọrụ kọrịnama sọ ó kọrị ma, kụma ọrụḅọ-ọrụḅọ fị ḅẹ ye, aniemẹ ngẹrị, mie ọ́ tẹlẹma nyana ye.

¹⁷Anịsakị ó sun-a fịturu kopini afịaị alalị mẹ kẹ elekima sụa ḅa, kẹ gotẹ ọkọ ḅẹẹarị, mịmgba ḅẹ eneḅaka ḅụ mie arị Ijiputi ama mẹ ḅio ọmịna inweni kpo-kpo ma pakama-ḅo ye; anịẹrẹsị ọ́ mịmgba mẹ kẹ elekima sụa ḅa kụrọ ḅara-ḅio sime ḅọ sụa oloko ḅara ḅụ ḅụọ-fa-ḅụọ-paka mu ḅẹẹ-sakị ḅẹẹ-sakị la.

¹⁸Tarị akalụ mẹ ḅẹ ngei aḍin fa jei karama ene mẹ ḅẹ ḅoḅiri-so ḅụ ó sun-a fịturu fị nwenii mu akalụ mẹ ḅẹ si gbọrụ ḍin finji karama ene mẹ ḅẹ ḅoḅiri-so la ḅa.

¹⁹Sọnọma aḍin, kịnị ọmịna awarị ḅio fịturu sunmaye ḍọkị-ẹrị ḅịa; kẹ gotẹ ọkọ ḅẹẹarị, ḅẹḅọ-ḅẹḅọ nwẹnị sunmatẹ ye nwẹn fị, fị, anị tomḅọ mẹ Izirẹlị inweni-ogbo mẹ ḅụ mḅọ pẹlẹ-so ḅa ḅọrọ igoniḅọ-o, ama-kuḅu ḅẹ ḅọ sọ.

²⁰Sunmatẹ gberie-sọ ọ́ fị ma ọmịnị angarị anga mamgba ḅụ sun-a fịturu mie ọ́ fị ḅarị ye.”

²¹Anịtẹso Mozizi nwẹnị Izirẹlị ḅẹ omongiapụ mamgba sịn tẹ ịn ḅẹẹ, “Ọmịnị ọmịna furo-furo ma sime-ḅara ḍiki tẹ asambịrịma anana sẹlẹ-sẹlẹ ọkịị, tẹ Saḅaḅọrọ-Alalị asambịrịma anana ḅe ḅaa.

²²Ọmịnị oronwi-ḍiri sịn-ịkpangị anyịma tẹ kẹ puku mịẹ tẹ kẹ asambịrịma anana ḅe ọmbie mẹ tẹ opu-panị ḅio simearị ye mẹ gbọn-gbọn tẹ kẹ ḅọkọ mẹ ḅẹ ẹngbẹsẹ mẹ na, warị-ḅọkọ amasịn ma na tan; anịsakị ọmịna aḅụụ gbọrụḅọ-sọ mḅọ warị ḅụ anị ḅọkọ mẹ ḅụ ḅọrọ paka ḅịa nwenii dede-ḅio la ḅa.

²³Kẹ gotẹ ọkọ ḅẹẹarị, KỊNỊNYANAḄỌ ḅe mẹnjị-ḅọrọ tolu tẹ Ijiputi-ḅẹ-apụ ma ḅaa ḅa; tẹ ọ̀ ḅọkọ mẹ ḅẹ ẹngbẹsẹ mẹ na, warị-ḅọkọ amasịn ma na ḅụ ọmbie mẹ ẹrị sakị KỊNỊNYANAḄỌ ḅe mẹnjị saḅa-ḅọrọ ḅa tẹ ḍụkụ tẹ kịnị ḅaa enjẹlị ḅẹ ọmịna awarị ma ḅio sọọ mu ọ́ ḅaa ḅịa.

²⁴Ọ́ mị mịẹ-mịẹye mẹ kẹ elekima sụa tẹ kụrọ ḅara-ḅio sime ḅọ sụa oloko koko ḅara kẹ ọmịnị na, ọmịna awọmẹ na anị koko gbamaso ḅa.

²⁵Anịsakị ó ḅo ama mẹ tẹ KỊNỊNYANAḄỌ ḅe kẹ ọ́ pịrị ḅẹ ama mẹ la sakị ọ̀ wẹrịtẹ minini tẹ ḅara ḅụ, ọ́ mị mịẹye mẹ koko ḅa.

²⁶Anịsakị ọmịna awọmẹ ‘mị mịẹye mẹ anị tiye fiearị?’ kẹ ó gbela sakị,

²⁷ọ́ pakịrị ḅa, ‘miemẹ anie KỊNỊNYANAḄỌ ḅe Saḅaḅọrọ-Alalị mẹ ḅẹ agba, gbala Ijiputi ḅụ ori Izirẹlịapụ ma awarị ma saḅa-ḅọrọm ẹrẹsị, ori Ijiputi-ḅẹ-apụ ma ḅaam kụma ọ̀ wamịna awarị ma kọkọrọ tẹ arị wẹrịsom.’ ” Tẹ tomi ma ịna asịḅị tuu tẹ sunsin KỊNỊNYANAḄỌ ḅe pịrịm.

²⁸Anịtẹso Izirẹlịapụ ma so tẹ mu ọkọ mịẹm, KỊNỊNYANAḄỌ ḅe wẹrịtẹ tọn Mozizi na, Erọnị na pịrị ḅara anie ịn mịẹ ḅara.

²⁹Ḍin-ogbo ḅụ KỊNỊNYANAḄỌ ḅẹ Ijiputi ama mẹ ḅio tarị iyi awọmẹ mamgba ḅaam, Fero tarị tụḅọ tẹ ori emine mẹ ọgọnọ lẹgị ḅẹ ḅọ ḅe ḅụ ọkị mu kun-ḅara ḅio simearị kiri suku-ḅio simearị ikoli warị mẹ ḅio emi ikoliḅọ ḅe la, na opu anama ma tarị iyi aị mamgba na.

³⁰Tẹ Fero na ori afịrịmẹnjịapụ mamgba na osi Ijiputi ḅe apụ mamgba na nwẹnị ḍin mẹ ḅụ saakị, gbala gbọrụ warị tẹ gbọrụḅọ-sọ fịị-a warị ofori ẹrẹsị.

³¹Tẹ ḍin mẹ ḅụ ọ̀ nwẹnị Mozizi na Erọnị na sịn, tẹ ḅẹẹ, “Ọmịnị na, Izirẹlị ḅẹ apụ ma na ọ́ paka-soo ị̀ atomi ma ogbo-ḅio ḅụ tẹ mu fịrịmẹnjị KỊNỊNYANAḄỌ ḅe pịrịị, ọ́ wẹrịtẹ ḍuko tẹ ḅara.

³²Ọmịnị ọmịna anana na, oḅori na ogbo-ogbo ma na, ọmịna opu anama ogbo-ogbo ma na ọkịị ọ́ wẹrịtẹ ḍuko tẹ ḅara tẹ nwẹnị saakị mẹnjịị; tẹ yẹrị sọ bomaa.”

³³Ijiputi-ḅẹ-apụ ma fọnya-fọnya ama mẹ ḅio tomi ma pakama ḅẹ ẹrẹsị nwẹnị ịn ḅalaḅalama, gbala ini mẹẹ, “Wamịnị-mgba anie fịtẹ atomi ó so-a ḅẹḅẹ.”

³⁴Mie ḅụ tomi ma minji na jaị na kẹ sụa pikiri tẹ sunmaye amụ sọ-a fịlawa mẹ kẹ ini anị pikiri bọlị mẹ ḅio wẹrị tẹ ịna opu akapa kẹ arị fịna tẹ kẹ ịna apana ọgọnọ dogim.

³⁵Izirẹlịapụ ma pịkị Mozizi ḍuko ịn pịrị ḅara sọ mịẹ tẹ, ịn gbala Ijiputi-ḅẹ-apụ ma ḅara ḅụ seleḅa na golu na pịkị kapa na ḅịtẹ na ḅiriaị ḅii ọkị tẹ

³⁶anịsakị KỊNỊNYANAḄỌ ḅe Ijiputi ḅẹ apụ ma tọrụ ḅụ iḅi-fụḅara kẹ tomi ma pịrịm, anie mịẹtẹ ini ịn ḅii aị nyanam. Mị-ḅara ḅụ ini Ijiputi ḅẹ apụ ma ngọ dogi-som.

³⁷Izirẹlịapụ ma Ramịsịsị ḅụ saakị ḅụọ, ḅụọ kẹ mu Sukọtị lam, ereme na, awọmẹ na sikima owiapụ kịnị sọnọ apuku ofori puku inia si (600,000) pembe apụ.

³⁸Tomi pikiri wararị inweni-ogbo sọ, na tọnwa, tọnwa opu anama na, anana na, oḅori na ogbo-ogbo ini na som.

³⁹Tẹ ịn fịlawa mẹ tẹ Ijiputi ḅụ ịn pikiri tẹ kẹ ḅo ye mẹ kẹ sunmaye sọ-a akịkị fọịnm, gbala ini Ijiputi ḅụ ịn sukuruma pakamam, ini inetẹ sime ala-a, ịn fị ḅẹ gberie-sọ ịn tẹlẹma ịna aḅụụ pịrị-a ẹrẹsị mie anị gotẹ sunma-a ye sọ ye.

⁴⁰Sakị mẹ tẹ Izirẹlịapụ ma kẹ Ijiputi ḅụ anga ye kụra gbọrụ ẹndẹ suei finji (430).

⁴¹Anịsakị kụra gbọrụ ẹndẹ suei finji mẹ ḅẹ kunoma ene mẹ, anị gbọrụ ene mẹ ḅụ mie KỊNỊNYANAḄỌ ḅe inweni-ogbo mamgba Ijiputi ama ḅụ paka-so ye.

⁴²Ijiputi ama mẹ ḅụ Izirẹlị ḅe apụ ma pakama-ḅo gotẹ KỊNỊNYANAḄỌ ḅe gbọrụ ḍin koru ḅụ ịn pakama-ḅom; anie ḅụ mị gbọrụ ḍin mẹ Izirẹlị ḅẹ apụ mamgba kana-koro mị ḍin mẹ koru KỊNỊNYANAḄỌ ḅe pịrị ḅa ḅụọ-fa-ḅụọ-paka ḅụ.

⁴³KỊNỊNYANAḄỌ ḅe nwẹnị Mozizi na Erọnị na ḅẹẹ, “Miemẹ anie Saḅaḅọrọ-Alalị mẹ ḅụ kụrọ ḅara-ḅio sime ḅọ ḅe sụa oloko: Gbọrụ igoniḅọ sọ anị ḅẹ ye fị ma;

⁴⁴kụma ini igbigi kẹ fẹẹ omoniḅọ goḅọ-goḅọ inetẹ anị fị ḅa ọmịnị mḅọ tarị-ḅụụ sịn tẹrẹmẹ.

⁴⁵Gbọrụ bịanḅọ, anịanịa ọkọ fịrịmẹnjịḅọ sọ anị fị ma.

⁴⁶Gbọrụ warị-ḅio mie ó sime tẹ anị fị ḅarịye nama meni mẹ ḅẹ ye ọ́ nwẹn dogi etela paka ḅịa, anịsakị anị ḅẹ gbọrụ mgbe sọ ọmịnị anyịma ḅịa.

⁴⁷Izirẹlị ḅẹ tomina-ogbo mẹmgba anị koko ḅa.

⁴⁸Anịsakị igoniḅọ ọmịnị na anga tẹ Saḅa-ḅọrọ Alalị mẹ fị KỊNỊNYANAḄỌ ḅe pịrị ḅẹ ḅii, ḅii, yee ọ̀ nyana owiapụ mamgba ịna tarị-ḅụụ sin, anịtẹrẹmẹ mie ori inetẹ sọma kpeki tẹ saakị anị fị ḅarịye; ori ama mẹ ḅẹ furo-tụḅọ sime-ḅara sime ḅa. Kụma tarị-ḅụụ sin-a gbọrụḅọ-sọ anị fị ḅịa.

⁴⁹Gbọrụ oloko mẹ sime ama mẹ ḅẹ furo-tụḅọ na, igoniḅọ tẹ ọmịna ogboku angarị ḅọ ḅe na pịrị ḅa.”

⁵⁰Mị-ḅara mẹ Izirẹlịapụ mamgba nwẹn mịẹm KỊNỊNYANAḄỌ ḅe tọn Mozizi na Erọnị na pịrị ḅara mie ịn mịẹ ḅara.

⁵¹Anị ene mẹ ḅụ, KỊNỊNYANAḄỌ ḅe Ijiputi ama mẹ ḅio Izirẹlịapụ ma pakama-ḅom, ịna inweni-ogbo-ogbo ma ḅụ.