Read kalabari Paka-so 13 Bible Online

Paka-so 13 - kalabari bible

Paka-so 13

¹KỊNỊNYANAḄỌ ḅe nwẹnị Mozizi ḅẹẹ,

²“Tarị iyi apụ mamgba mịẹ fịafịama sikima koroma ị̀ pịrịị; Izirẹlịapụ ma ogbo-ḅio tarị furo mẹ finji ḅọ, finji ḅọ tomḅọ na, nama na ḅụ anie ì nye.”

³Mozizi nwẹnị tomi ma ḅẹẹ, “Ọ́ mị eneḅaka mẹ kẹ ḅiokoromaa — mị ene mẹ tẹ KỊNỊNYANAḄỌ ḅe ọ̀ ḅara ḅẹ ịnyọ ḅụ Ijiputi, ọmịnị omoni-sọ anga mẹ, ḅio ọ́ pakama-ḅo mị yọ mẹ lama ene mẹ. Sunmatẹ gbọrụ fịturu sọ ọ́ fị ma.

⁴Abibu nwẹn-sịn tarị akalụ mẹ ḅẹ mịmgba mẹ ḅụ mie ọ́ paka-soarị ye.

⁵KỊNỊNYANAḄỌ ḅe ọmịnị ọkị-ḅo Kenanị ḅẹ apụ ma na, Itayịti apụ ma na, Amọrayịtị apụ ma na, Hivayịtị apụ ma na, Jebusayịtị apụ ma na ama mẹ tẹ ọ̀ kẹ ọmịna aḍapụ ma pịrị ḅẹ ye karị ḅara kẹ minini ye mẹ, anie ḅụụ-ḅẹlẹmatẹ iḅiọkụma fịye so-pakamarị amakiri mẹ ḅio suu sakị, kụra-kụra ḅụ ọ́ mị alalị mẹ fị ḅa tarị akalụ mẹ ḅụ.

⁶Sọnọma aḍin ọ́ nwẹn kẹ fịturu sunmaye sọ-a fịturu fị ḅa, anịsakị sọnọma karama ene mẹ ḅụ ó kopini afịaị alalị mẹ fị KỊNỊNYANAḄỌ ḅe pịrị ḅa.

⁷Sọnọma aḍin ọ́ nwẹn kẹ fịturu sunmaye sọ-a fịturu fị ḅa, sunmatẹ gbọrụ fịturu sọ ọmịna ḅara pakama, anịsakị ọmịna ama iri mẹmgba ḅụ ọmịna ḅara fịturu sunmaye paka ma.

⁸Anị ene mẹ ḅụ, ị́ ḍuko í owiḅọtụḅọ pịrị ḅa, ‘mie gbala KỊNỊNYANAḄỌ ḅe àrị Ijiputi ḅụ paka-ḅo sakị mịẹ ị̀ pịrị ḅara ẹrẹsị.’

⁹Anịsakị anị ọmịna ḅara-kọngọ ḅẹ elekima na, ọ́ tọrụngbọ kẹ ẹrị tẹ kẹ ḅiokoroma ḅẹ ye na sọ ọ́ pịrị ḅa, mịẹtẹ KỊNỊNYANAḄỌ ḅe Oloko mẹ ọmịna ḅịḅị-ḅio sime ḅẹ ḅara, kẹ gotẹ ọkọ ḅẹẹarị, ịnyọ nyanatẹ ḅara-kọngọ mie KỊNỊNYANAḄỌ ḅe kẹ Ijiputi ḅụ ọ́ pakama-ḅo ye.

¹⁰Ọmịnị ọkọẹrẹsị mie kụrọ ḅara-ḅio sime ḅọ sụa oloko mẹ koko ḅa anị tọn koro wararị sakị mẹ la sakị, la sakị kụra-kụra ḅụ.”

¹¹“KỊNỊNYANAḄỌ ḅe ọmịnị ọkị-ḅo Kenanị ḅẹ apụ ma ama mẹ ḅio suu sakị ọ̀ wẹrịtẹ ye karị ḅara kẹ anị kẹ ọmịna aḍapụ pịrị ḅẹ minini ḅara,

¹²ó furo mẹ finji tarị iyi tụḅọ mẹ sikima KỊNỊNYANAḄỌ ḅe pịrị ḅa. Ọmịna opu anama iyi ḅarị tarị owi mamgba sime KỊNỊNYANAḄỌ ḅe pịrịm.

¹³Ye dogi nama iyi tarị tụḅọ goyegoye ọ́ gbọrụ asambịrịma anana kẹ anị pakịrị ọkị ḅa, anịanịa ó pakịrị ọkị-a ḅẹḅẹ ọmịnị anị kọngọ anyịma ḅa. Ọmịna owiapụ-awọmẹ ogbo-ḅio tomḅọ nwẹn-sịn tomḅọ iyi tarị owiḅọ goḅọ-goḅọ ọ́ pakịrị ọkị ḅa.

¹⁴Anịsakị jen ene fa-a jen ene ọmịna owiapụ awọmẹ ‘miemẹ tiye fiearị?’ kẹ ó gbela sakị; ọmịnị ịn ḅẹẹ ḅa, ‘opu kụrọ na ịnyọ na ḅụ KỊNỊNYANAḄỌ ḅe Ijiputi, wa omoni-sọ anga mẹ ḅụ wa pakama-ḅom.

¹⁵Kẹ gotẹ ọkọ ḅẹẹarị, Fero sịḅịḅio-kụrọ kẹ ḍụkụ tẹ wa wẹrịso tẹ wa so-a sakị, KỊNỊNYANAḄỌ ḅe Ijiputi ḅụ tomi iyi tarị awọmẹ na, opu anama iyi tarị awọmẹ mamgba ḅaa famam. Anịẹrẹsị wa tarị awọmẹ tẹ furo mẹ finji apụ mamgba kẹ agba mịẹ KỊNỊNYANAḄỌ ḅe pịrịarị; kụma furo mẹ finji tarị owiapụ-awọmẹ mamgba wa ịn pakịrị ọkịarị.’

¹⁶Anị elekima sọ ḅara kẹ ọmịna ḅara kọngọ, anịanịa ọmịna fụḅara-ḅọkọ maa atọrụngbọ ma ogboku sime ḅa gbala kụrọ ḅara ḅụ mie KỊNỊNYANAḄỌ ḅe Ijiputi ḅụ wa pakama-ḅo ye ẹrẹsị.”

¹⁷Fero tomi ma wẹrịso tẹ ịn so sakị, Tamụnọ Filisiteniapụ ma ama ḅẹ etela ḅụ ịn ḅọrọma ḅo-a, anị etela mẹ kpeki wararị ḅẹsọ; gbala Tamụnọ ḅẹẹm, “tomi ma ḅofa tọrụngbọ kẹ ọmụ ẹrị tẹ ịna ḅioḅẹngbọ pịkị tẹ pịkịma-so Ijiputi mu,” ẹrẹsị.

¹⁸Kụma Tamụnọ ịkpa mẹ ḅẹ etela mẹ ḅụ ikelema Awụ Tọrụ mẹ da-mu ḅụ etela kẹ tomi ma ḍiem. Tẹ Izirẹlịapụ ma ḅụụ tẹlẹma owu pịrị tẹ ḅara kẹ Ijiputi ama ḅụ mẹnjị pakam.

¹⁹Mozizi Josẹfụ mgbe ma ọkị tẹ kẹ sụa som; gbala Josẹfụ tẹmẹ-la ḅara ḅụ ye karị ḅara kẹ ḍuko Izirẹlịapụ ma pịrị tẹ, tẹ ḅẹẹm, “Tamụnọ ḅo toluma ó ḍiki ḅa; anị sakị mẹ ḅụ ọmịnị ị̀ mgbe ma dogi tẹ kẹ mịanga sụa so nyanam.”

²⁰Izirẹlịapụ ma Sukọtị ḅụ saakị mẹnjị ma-mu Ẹtamụ la tẹ ịkpa mẹ ḅẹ agara ḅụ akpụrụ-warị pike tẹ simem.

²¹Tẹ KỊNỊNYANAḄỌ ḅe ịn kẹ tọrọkọ-tarịm, etela mẹ kẹ in ḍie ḅụ oḅuto gbọrụ kpo ḅio eneḅaka ḅụ, tẹ ḍin bele kẹ ịn pịrị ḅụ kọrịarị fịnị-ḅẹlẹ kẹ ịn kẹ tọrọkọ-tarịm mịẹtẹ ịn ḍin na, eneḅaka na ḅụ mẹnjị ḅarị ḅara.

²²Eneḅaka ḅẹ oḅuto kpo mẹ na, ḍin ḅẹ fịnị-ḅẹlẹ mẹ na tomi ma tọrọkọ ḅụ so-a.