Read kalabari Paka-so 18 Bible Online

Paka-so 18 - kalabari bible

Paka-so 18

¹Jetiro, Midiyanị ḅẹ agbamịẹḅọ, Mozizi fụanḅọ ḅe Tamụnọ kọrị Mozizi na, ori atomi Izirẹlịapụ ma na pịrị aị mamgba na, KỊNỊNYANAḄỌ ḅe wẹrịtẹ Ijiputi ḅụ Izirẹlị pakama-ḅo ḅara na naam.

²Mịọkụ Mozizi ọ̀ ta Zipora ḅẹẹ tẹ á so tẹso, Jetiro Mozizi fụanḅọ ḅe nwẹnị árị na

³árị maa owiapụ-awọmẹ na ọkị mum. Owiapụ-awọmẹ ma gbọrụḅọ ẹrẹ Gasọmụ: gbala ori mẹẹ, Igoni Ama Ḅụ À Bịanḅọ Sọ Tẹẹ.

⁴Anịsakị osi-ḅọ ḅe ẹrẹ Ẹlịyeza: gbala ori mẹẹ, Ị̀ Ḍa Ḅe Tamụnọ Ḅe Ḅarasụa Ị̀ Pịrịm, Tẹ Fero Ị̀ Ḅaa Ḅụ Ị̀ Ḍụa-ḅọrọmam

⁵Tẹ Jetiro, Mozizi fụanḅọ ḅe Mozizi maa owiapụ awọmẹ ma na, ọ̀ ta na kẹ ọ̀ ḅụụ sụa tẹ ịkpa mẹ ḅio Tamụnọ fịafịa tụndụ mẹ ḅụ ini akpụrụ-warị pike tẹ simearị anga mẹ ḅom.

⁶Gbọrụḅọ nwẹnị mu ḍuko Mozizi pịrị, “Ḍikii, í fụanḅọ Jetiro ị́ ta na, arị maa owiapụ awọmẹ na kẹ á ḅụụ sụa tẹ kẹ ọ̀ ḅụụ sụa ḅoarị,” tẹso.

⁷Mozizi nwẹnị ò fụanḅọ ḅe na bịama ḅẹ tẹ ọ̀ dama-mu, tẹ kpọma sịḅị-tuu ọ̀ pịrị tẹ ọ̀ ḅịḅị nọnjị, ịn nwẹnị jụmọ-jụmọ ḅụụ sime ḅara kẹ jụmọ-jụmọ gbela tẹ nwẹnị mẹnjị akpụrụ-warị mẹ ḅio sọ-mu,

⁸Anịtẹso Mozizi KỊNỊNYANAḄỌ ḅe Izirẹlị sịḅị gotẹ kẹ Fero na, Ijiputi-ḅẹ-apụ ma na mịẹ tẹ aị mamgba na, ḅụụ-fụka tẹ etela mẹ ḅụ ḅo ịn la tẹ ini ẹrị tọrụsiẹrị mamgba na, KỊNỊNYANAḄỌ ḅe wẹrịtẹ ịn ḍụa-ḅọrọma tẹ ḅara na ḍuko ọ̀ fụanḅọ ḅe pịrịm.

⁹Tẹ Jetiro iḅi mẹmgba tẹ KỊNỊNYANAḄỌ ḅe kẹ Izirẹlị mịẹ tẹ iḅi, anie Ijiputi-ḅẹ-apụ ma ḅara ḅio ori ịn ḍụa-ḅọrọma tẹ ye mẹ gotẹ ḍerekum.

¹⁰Jetiro nwẹnị ḅẹẹ, “Boma sime KỊNỊNYANAḄỌ ḅe tẹ Ijiputi-ḅẹ-apụ ma ḅara ḅụ na, Fero ḅara na ḅụ ọ́ ḍụa-ḅọrọma ḅọ ḅe pịrịị.

¹¹Mẹkịnẹ à nimi tẹ mịnẹ KỊNỊNYANAḄỌ ḅe ḍụḅa oru-atamụnọ mamgba nẹngịm, gbala ini opu amịẹaị mịẹ ḅara kẹ tomi ma na mịẹ sakị ori Ijiputi ḅẹ apụ ma ḅara suku-ḅio ḅụ ịn ḍụa-ḅọrọmam ẹrẹsị.”

¹²Tẹ Jetiro, Mozizi fụanḅọ ḅe dọkịma-agba mịẹ, tẹ agba mịẹ jaị na ọkị-ḅo Tamụnọ pịrịm tẹ Erọnị Izirẹlị ḅẹ omongiapụ mamgba ọkị ọ̀ ḅụụ sụa tẹ Mozizi fụanḅọ ḅe na Tamụnọ tọrọkọ fịye fị ḅẹ mum.

¹³Anị ḅẹ ene-ḅaa ḅụ Mozizi tomi ma kọn ḅẹ ẹrẹsị lẹgị-simem, tẹ tomi ma dede-ḅio ḅụ sịẹsime ori ikelema nwenii ḅoḅiri-so lam.

¹⁴Mozizi fụanḅọ mịna aị ma tẹ ọ̀ mịẹ tomi ma pịrịarị aị ma ẹrị tẹso, ọ̀ nwẹnị gbela, “Mie mẹ tẹ ị́ mịẹ tomi ma pịrịarị ye ḅọrọ tiye? Í tiegotẹ ngẹrị lẹgị-sime tẹ tomi mamgba dede-ḅio sịẹ sime ị́ ikelema nwenii ḅo ḅoḅiri-so la?”

¹⁵Mozizi nwẹnị ò fụanḅọ ḅe pakịrị, “Tomi ma gbala ị̀ ḍọkụma-ḅo tẹ Tamụnọ ḅịḅị ḅiiarị;

¹⁶ini ịgbanịya nyana sakị ịn pịkị ị̀ ḍọkụma-ḅo tẹ à ḅẹrẹ kọn tomḅọ ḅe na, mḅọ na kpeki tẹ angarị ḅọ mẹ na pịrịarị, anịsakị à pịkị mịẹtẹ ịn kẹẹ wararị Tamụnọ oloko ma na, ọ̀ tọn-pẹlẹ aị na nimiarị.”

¹⁷Mozizi fụanḅọ ḅe nwẹnị ọ̀ ḅẹẹ, “Í mịẹarị ye iḅi-a.

¹⁸Ị́yẹrị na, ị́ na simearị apụ ma na ọmịna aḅụụ kọrị-kọrị ḅa; kẹ gotẹ ọkọ ḅẹẹarị, ye mẹ iku ị́ nẹngị ḅakam; ị́yẹrị ngẹrị inetẹ ịnyọ nyana tẹ anị kọrị ḅịa.

¹⁹Mịọkụ ị̀ pọkọ pokii; àrị anị mịẹ na-iḅi nimi ẹkwẹn kọn ị́ pịrị ḅa, anịsakị Tamụnọ ị́ na sime ḅa! Ị́ sịẹ tomi ma pịrị ḅa Tamụnọ tọrọkọ, tẹ ịna aḅẹrẹ kẹ Tamụnọ ḍọkụma-ḅo ḅa;

²⁰tẹ kẹẹ wararị oloko ma na, tọn-pẹlẹ aị ma na kẹ ịn toluma, tẹ mịẹtẹ ini etela mẹ tẹ ịn mẹnjị nyana etela mẹ na ịn mịẹ nyana ye na nimi ḅa.

²¹Anie sikima, owiapụ mamgba ḅụ, ịnyọ nyana tẹ Tamụnọ ḍiki-ḅalafarị owiapụ ḅara, owiapụ tẹ kịnị ḅioḅẹngbọ-kẹ-sịrẹrẹ-niḅi apụ, tẹ ọḅụ-fị ḍiki-ḅioḅuarị apụ sẹlẹẹ; tẹ ọkọ sime apụ kẹ ḅẹrẹtọn-apụ sọma kịnị maa ẹndẹ oyia asi finji-finji na; kịnị sọnọa si, sọnọa si na; kịnị amesi oyi finji-finji na; oyi apụ, oyi apụ na pịrịị.

²²Anịsakị yee ini sakị mamgba tomi ma ḅẹrẹ kọn, gburo-gburotẹ ḅẹrẹ goyegoye ini ọkị-ḅo ị́ pịrị ḅa, kụma ḅẹ kala ḅẹrẹ kala ḅẹrẹ, ini ḅarana anị kọn-pẹlẹ ḅa; mị-ḅara ḅụ anị ị́ na sarasara ḅa, tẹ ini ị́ na sọ ikuye mẹ dogi ḅa.

²³Í miemẹ mịẹ-mịẹ, tẹ Tamụnọ mị ḅara mẹ tọn ị́ pịrị-pịrị, anịrẹ ị́ inetẹ ịnyọ nyana tẹ kẹ inema ḅa, anịsakị mịna atomi mamgba so dein ḅụ so mu ịna ye-yọ la ḅa.”

²⁴Mie ḅụ Mozizi ò fụanḅọ ḅe pọkọ poki tẹ ò ḍuko ḅara mẹmgba mịẹm.

²⁵Mozizi Izirẹlị mẹmgba ḅụ ịnyọ nyana owiapụ sẹlẹm, tẹ ịn kẹ tomi ma sịḅịdapụ mịẹm, ḅẹrẹtọn kịnị maa ẹndẹ oyia asi finji na kịnị sọnọa si, sọnọa si na; kịnị amesi oyi finji-finji na; oyi apụ oyi apụ na pịrị ḅẹ apụ sọmam.

²⁶Tẹ ịn sakị mamgba tomi ma ḅẹrẹ kọnm kụrọtẹ aḅẹrẹ ini ọkị-ḅo ọkị-ḅo Mozizi pịrịm, kụma ḅẹẹ kala ḅẹrẹ kala ḅẹrẹ, ini ḅara na anị kọn-pẹlẹm.

²⁷Anịtẹso Mozizi ò fụanḅọ ḅe wẹrịso tẹ ò so ò soku-ḅẹ opu sịẹ mum.