Read kalabari Paka-so 26 Bible Online

Paka-so 26 - kalabari bible

Paka-so 26

¹Miemẹ sikima, í bulo tọrụ na, pọpụlụ nwẹn-sịn tọrụ na, awụ tọrụ na sụa oyia ḍoritẹ lọkọ-ḅịtẹ kẹ Ọḅọkụ-Igbe mẹ sime ḅarị Akpụrụ-warị mẹ nama ḅa. Ḅara-ḍịn ḅara ḅụ, ḅịtẹ ḍori laga kẹ ịn kẹ sẹrubimu sịn-arị enjẹlị kịkama aị kẹ anị ḅirimaa.

²Oyia aḅịtẹ warị-warị mẹ ḅẹ nangwọ anie mesi maa ḅụọ-kuḅu finji (12 m), anị ḅẹ finjima anie sonioa ḅụọ-kuḅu (2 m) — ḅịtẹ mamgba gbasị-kịrịrịkwaị ḅa.

³Ḅịtẹ ma ḅẹ sọnọa awarị ị́ nwẹn gbin gboloma ḅa; ị́ pịkị osi sọnọa awarị ma gbin gboloma ḅa.

⁴Gbin gboloma wararị ḅịtẹ mẹ ḅẹ suku da sịḅị mẹ ḅụ, ị́ bulo-bulo ḅịtẹ kẹ sololo ḅara gbin sụa ḅa; tarị ye mẹ na, maaịn karama ye mẹ na gbọrụ ḅara.

⁵Gbin gboloma wararị ḅịtẹ mẹ ọgọnọ da sịḅị mẹ ḅụ tarị ye mẹ ḅụ, í ye-sololo-aị mesi oyi finji sụa ḅa, maaịn karama ye mẹ ḅụ pịkị suku da sịḅị mẹ ḅụ ye-sololo-aị mesi oyi finji; maa ḅịtẹ asuku ma ḅẹ ye-sololo-aị ma jen-jen na dama-dama ḅa.

⁶Anịsakị ị́ golu-golu ye-sụka ọkọḅa mesi oyi finji tẹmẹ ḅa, kẹ gbin gboloma wararị aḅịtẹ ma maa apakịrị ma sụka gboloma ḅẹ ḅara, mịẹtẹ Akpụrụ-warị mẹ bebe gberie-sọ ḅarị ḅara.

⁷“Ị́ pịkị oḅori oju ḅẹ isuke kẹ ḍori oyi gbọrụ aḅịtẹ finji kẹ ye-gbaịn-aḅịtẹ mịẹ Akpụrụ-warị mẹ pịrị ḅa.

⁸Akpụrụ-warị mẹ ye-gbaịn-aḅịtẹ ma, gberie-gberie ḅẹ nangwọ anie mesi sọnọa ḅụọ-kuḅu finji (13 m), anịsakị gberie-gberie ḅẹ finjima anie sonioa ḅụọ-kuḅu — ye gbaịn oyi gbọrụ aḅịtẹ ma finjima gbasị-kịrịrịkwaị ḅa.

⁹Gbọrụ pakịrị ḅụ ị́ sọnọa aḅịtẹ gbin gboloma ḅa, osi pakịrị ị́ pịkị sonio aḅịtẹ gbin gboloma ḅa; anịsakị sonio karama ḅịtẹ mẹ akpụrụ-warị mẹ ḅẹ tọrọkọ ḅụ ị́ anị kẹ maaịn iko ḅa.

¹⁰Gbin gboloma wararị ye-gbaịn-ḅịtẹ mẹ ḅẹ akaka da tẹịn sịḅị mẹ ḅụ í ye-sololo-aị mesi oyi finji kẹ sụa ḅa, tẹ maaịn karama gbin gboloma wararị ye-gbaịn-ḅịtẹ mẹ ḅẹ akaka da tẹịn sịḅị mẹ ḅụ sọ ị́ pịkị ye-sololo-aị mesi oyi finji kẹ sụa ḅa.

¹¹Í ojo ye-sụka-aị mesi oyi finji tẹmẹ ḅa, tẹ ye-sụka-aị ma kẹ ye-sololo-aị ma ḅio suu tẹ maa apakịrị ma ọlọ gboloma ḅa, mịẹtẹ anị bebe gbọrụ ye mịẹ ḅarị ḅara.

¹²Ye-gbaịn-ḅịtẹ mẹ ḅụ kirikọn wararị pakịrị mẹ ị́ anị kẹ Akpụrụ-warị mẹ ọḅụjụ ḅụ sololo ḅa.

¹³Akpụrụ-warị mẹ Ḅọkọ gbaịn aḅịtẹ ma ḅẹ koro ḅụ mị pakịrị na, osi pakịrị na gbana ḅara maa ẹnzụ ma, ị́ kẹ akpụrụ-warị mẹ ḅụ mị akaka na osi akaka na ḅụ sololo tẹ anị kikima ḅa.”

¹⁴“Í ejimina oju apara tẹ ịn awụ tọrụ kẹ ḅaa ye mịẹ Akpụrụ-warị mẹ gbaịn ḅa, tẹ tẹlẹmatẹ isuke nyana-a nama-apara kẹ ejimina apara mẹ gbaịn ḅa.”

¹⁵“Ị́ ịn kẹ akasiya sịn-arị ḍụḅọ mẹ kẹ tọnwa sụụn yarịrịtẹ sịẹ-geletẹ asịn ịkasị Akpụrụ-warị mẹ pịrị ḅa.

¹⁶Gberie-gberie ḅẹ nangwọ anie jeia ḅụọ-kuḅu (4 m), tẹ maa ḅụọ-kuḅu na ḅara gbọrụ ẹnzụ na (66 cm) anị ḅẹ finjima sọ ḅa,

¹⁷gberie-gberie ḅụ ị́ arị kẹ jen-jen ḅụ sụka ḅẹ maa ye-sụka-aị sụa ḅa, mịẹtẹ arị jen-jen sụka tẹ gboloma ḅẹ ḅara. Mie ị́ kẹ Akpụrụ-warị mẹ ḅẹ amasịn mamgba ịkasị anị pịrị ḅarị ḅara.

¹⁸Ị́ si amasịn ịkasị Akpụrụ-warị mẹ ḅẹ suku-jụ da pakịrị anga mẹ pịrị ḅa.

¹⁹Si amasịn ma suku, í seleḅa kẹ otolo amesi sụa ḅa, gbọrụ amasịn maa otolo maa otolo, anie anị kẹ jen sụa-paka maaịn ḅụ sụka ḅarị maa anga ma.

²⁰Akpụrụ-warị mẹ ḅẹ maaịn karama pakịrị mẹ anie tọrọkọ da pakịrị mẹ. Anị sọ pịkị si amasịn nyana ḅa;

²¹arịḅẹ seleḅa otolo anie mesi, tẹ gberie-gberie maa otolo, maa otolo nyana ḅa.

²²Í sonioa amasịn ịkasị Akpụrụ-warị mẹ ḅẹ ọḅụjụ tẹ ịrụa-ideriarị-anga anga mẹ da anga mẹ pịrị ḅa.

²³Ị́ maa amasịn ịkasị Akpụrụ-warị mẹ ḅẹ ọḅụjụ ḅẹ ịkọlị ma pịrị ḅa.

²⁴Mịna ịkọlị ḅẹ maa amasịn ma, arị suku ḅụ sụka gboloma mu ọgọnọ-jụ la ḅa gbọrụ nụnụma ḅio ḅụ. Maa amasịn ma tẹ maa ịkọlị ma mịẹ aị ma mị ḅara mie ịn kẹ arị mịẹ ḅarị ḅara.

²⁵Ninea amasịn mie arịḅẹ ini fa si seleḅa otolo ma na sime ḅarịye, gbọrụ amasịn suku maa otolo maa otolo.”

²⁶“Akasiya nwẹn-sịn ḍụḅọ kẹ jeia ẹngbẹsẹ-ḅọrọma-asịn mịẹ. Sọnọ sime Akpụrụ-warị mẹ ḅẹ gbọrụ pakịrị anga ḅẹ amasịn ma pịrị ḅa,

²⁷anịsakị sọnọ sime Akpụrụ-warị mẹ ḅẹ osi pakịrị anga ḅẹ amasịn ma pịrị ḅa, tẹ sọnọ pịkị sime Akpụrụ-warị mẹ ḅẹ ịrụa-ideriarị-anga anga ọḅụjụ ḅụ kunoma amasịn ma pịrị ḅa.

²⁸Ogboku simearị ẹngbẹsẹ-ḅọrọma-sịn mẹ, tẹ amasịn ma ḅẹ maa anga ḍie wararị ye mẹ, anị Akpụrụ-warị mẹ ḅẹ gbọrụ kunoma ḅụ ḅọrọ mu osi kunoma tolu-paka ḅa.

²⁹Í golu sọ sara amasịn ma gbaịn ḅa, tẹ arị ḅụ golu-golu nụnụma sụa ẹngbẹsẹ asịn ma ọlọ aị mịẹ ḅa; anịsakị í golu sọ sara ẹngbẹsẹ-ḅọrọma-asịn ma gbaịn ḅa.

³⁰Anịsakị ị́ anị sime-ḅara mẹ tẹ tụndụ mẹ ọgọnọ à kẹ í ḍie ḅara mẹ kẹ Akpụrụ-warị mẹ nama sịẹma ḅa.

³¹Bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na ḍoritẹ lọkọ-ḅịtẹ na kẹ kiki-pẹlẹ ye mịẹ ḅa; ḅara-ḍịn apụ ịn kẹ Sẹrubimu sịn enjẹlị apụ kịkama ye kẹ arị ḅirima ḅa.

³²Ịn golu sọ sara gbaịn wararị inia akasiya ḅeriaị ọgọnọ ḅụ ị́ arị sololo ḅa. Golu-golu ye-sụka-aị arị ḅụ emi tẹ ịn kẹ seleḅa kẹ mịẹ inia otolo ḅụ sụka ḅa.

³³Í kiki-pẹlẹ-ḅịtẹ mẹ kẹ Akpụrụ-warị mẹ isun mẹ suku-ḅio sụa-kịrịkịrịma wararị ye-sụka-aị ma ḅụ sololo ḅa, tẹ ḍụḅarị maa apakịrị ma simearị Ọḅọkụ-Igbe mẹ kẹ kiki-pẹlẹ-ḅịtẹ mẹ ọḅụjụ koroma ḅa. Kiki-pẹlẹ-ḅịtẹ mẹ nwẹnị Fịafịa Yọ mẹ puu sikima ḅa Fịafịa-tẹịn Yọ mẹ ḅụ.

³⁴Fịfịa-tẹịn Yọ mẹ ḅụ í ḅịḅị-gbaịnye mẹ kẹ Ọḅọkụ-Igbe mẹ gbaịn ḅa.

³⁵Kiki-pẹlẹ-ḅịtẹ mẹ ḅọrọ paka-ḅo ḅụ, ị́ dẹbịlẹ mẹ koroma ḅa, tẹ tọnjọ-sịẹmaye mẹ Akpụrụ-warị mẹ ḅio suku-jụ da pakịrị anga sime tẹ dẹbịlẹ mẹ na dama-dama ḅa. Anịsakị ị́ nwẹnị dẹbịlẹ mẹ kẹ ọgọnọ-jụ da pakịrị anga ḅụ koroma ḅa.”

³⁶“Mẹnjị Akpụrụ-warị mẹ sọ muarị ḅọkọ mẹ ḅụ í bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na ḍoritẹ lọkọ-ḅịtẹ tẹ laga-kọrịnama-kọrịapụ ḍori ḅirimatẹ ḅịtẹ kẹ sụa ḅa.

³⁷Ị́ akasiya sịn kẹ sọnọa ḅeriaị mịẹ ḅọkọ kikima ḅịtẹ mẹ pịrị tẹ golu sọ sara arị gbaịn ḅa, tẹ golu-golu ye-sụka-aị kẹ arị ḅụ sụa, tẹ ojo kẹ otolo sụa arị pịrị ḅa.”