Read kalabari Paka-so 27 Bible Online

Paka-so 27 - kalabari bible

Paka-so 27

¹“Akasiya sịn ị́ nwẹn kẹ agbamịẹ-anga mẹ nama ḅa, anị ḅẹ nangwọ sọnọma ḅụọ-kuḅu na ḅara maa ẹnzụ na (2.2 m); anị ḅẹ finjima pịkị sọnọma ḅụọ-kuḅu na ḅara maa ẹnzụ na (2.2 m); agbamịẹ-anga mẹ ḅẹ nangwọ na, anị ḅẹ finjima na gbasị ḅa; anị ḅe gele inia ḅụọ-kuḅu na ḅara maa ẹnzụ na (1.3 m) mịẹ ḅa.

²Anị ḅẹ inia ịkọlị ma ḅụ ị́ ịfalị sụa-pakama anị pịrị ḅa; anị ḅẹ ịfalị ma anị na gbọrụ ḅụ mịẹ-aị sọ ḅa, tẹ í ojo sọ sara anị gbaịn ḅa.

³Ị́ nama ḅẹlẹkị sanị-sanị sara sọ ḅẹ panị aḅẹlẹ na, sọpụrụ na, opu-panị na, ḅuru-gbọn-aḅala na, anyịmgbọ tan apanị na tẹmẹ anị pịrị ḅa; anị ḅẹ kọrịnama-kọrịaị mamgba ojo mie ị́ kẹ arị tẹmẹ ḅarịye.

⁴Ị́ pịkị fịnị apakịrị dẹẹ ḅẹ anga mịẹ anị pịrị ḅa. Ojo kẹ ịgbọ otolo ḍori ḅara ḍorii, anịsakị ḍori wararị ịgbọ mẹ ọgọnọ anị ḅẹ inia ịkọlị ma ḅụ ị́ inia nụnụma sụa ḅa.

⁵Agbamịẹ-anga mẹ ḅụ pono ḅọrọ wararị ye mẹ suku ḅio ị́ saakị ịgbọ otolo ma ḍori ḅa, mịẹtẹ anị agbamịẹ-anga mẹ ḅiri ḅụ ọkị iwo ḅarị ḅara.

⁶Ị́ akasiya sịn kẹ nangwọtẹ yedogi asịn mie agbamịẹ-anga mẹ pịrị, tẹ ojo sọ sara arị gbaịn ḅa,

⁷tẹ nangwọtẹ yedogi asịn ma kẹ nụnụma ma ḅio suu toluma ḅa, mịẹtẹ ini agbamịẹ-anga mẹ dogi sakị arị anị akaka ḅụ sime ḅarị ḅara.

⁸Í finjima-finjimatẹ ḍụḅọ apakịrị kẹ agbamịẹ-anga mẹ nama tẹ anị foo-foo ḅara sime ḅa, tụndụ mẹ ọgọnọ à kẹ í ḍie tẹ ḅara mẹ mie ị́ kẹ anị nama ḅarị ḅara.”

⁹“Ị́ KỊNỊNYANAḄỌ ḅe simearị Akpụrụ-warị mẹ ḅẹ nụngọ pakama ḅa. Suku-jụ da pakịrị anga mẹ, sọnọma si na oyia aḅụọ-kuḅu finji (44 m) kẹ nangwọtẹ ḍoritẹ lọkọ-ḅịtẹ kikima aị nyana ḅa gbọrụ pakịrị anga ḅụ.

¹⁰Arịḅẹ ḅeriaị si, arịḅẹ otolo pịkị si, ojo mie ịn kẹ arị tẹmẹ ḅarịye, kụma ḅeriaị ma ḅẹ sụka aị ma na, sịḅị sụa aị ma na seleḅa mie ịn kẹ arị tẹmẹ ḅarịye.

¹¹Anị gbọrụ ḅara mie ọgọnọ-jụ da pakịrị anga ḅụ anị ḅẹ nangwọ pịkị sime ḅarị ḅara, sọnọma si na oyia aḅụọ-kuḅu finji (44 m), tẹ ye-kikima-aị nyana ḅa; arịḅẹ ḅeriaị si, arịḅẹ otolo pịkị si, ojo mie ịn kẹ arị tẹmẹ ḅarịye, kụma ḅeriaị ma ḅẹ ye-sụka-aị ma na, sịḅịsụa-aị ma na seleḅa mie ịn kẹ arị tẹmẹ ḅarị ye.

¹²Ịrụa-ideriarị-anga da anga ḅụ nụngọ mẹ ḅẹ finjima tesi oyia aḅụọ-kuḅu finji na sọnọ na (22 m), tẹ ye kikima aị nyana ḅa oyia ḅeriaị ọgọnọ ḅụ, pịkị oyia otolo na.

¹³Tọrọkọ ịrụa-saakịarị-anga da anga ḅẹ nụngọ mẹ ḅẹ finjima pịkị tesi oyia aḅụọ-kuḅu finji na sọnọ na (22 m) mịẹ ḅa.

¹⁴Anị ḅẹ ogigo-ḅọkọ mẹ ḅẹ gbọrụ pakịrị anga ḅẹ finjima si maa ḅụọ-kuḅu finji na pakịrị (6.6 m), tẹ kikima aị ḅụ tẹra ḅeriaị na tẹra otolo nyana ḅa.

¹⁵Anị ḅẹ osi pakịrị anga ḅẹ finjima pịkị si maa ḅụọ-kuḅu finji na pakịrị (6.6 m), tẹ kikima aị ḅụ tẹra ḅeriaị ḅụ tẹra otolo nyana ḅa.

¹⁶Mẹnjị sọ mu nụngọ mẹ ḅioju la ogigo-ḅọkọ mẹ ḅẹ nangwọ anie ḅụọ-kuḅu asuei (9 m) la kiki-pẹlẹ-ḅịtẹ tẹ bulo tọrụ na, pọpụlụ nwẹn-sịn tọrụ na, awụ tọrụ na sụa iḅi ḍoritẹ lọkọ-ḅịtẹ tẹ laga-kọrịnama-kọrịapụ iri kẹ ḍori ḅirima wararị ye sime ḅa; anị inia ḅeriaị gbọrụ otolo, gbọrụ otolo emi aị nyana ḅa.

¹⁷Nụngọ mẹmgba ikelema-koro ḅụ simearị ḅeriaị mamgba seleḅa sịḅịsụa-aị arị ḅụ sime ḅa arịḅẹ ye-sụka-aị sọ seleḅa; anịsakị arịḅẹ otolo ma ojo.

¹⁸Nụngọ mẹ ḅẹ nangwọ la ḅarị ḅara sọnọma si na oyia aḅụọ-kuḅu finji na (44 m); anị ḅẹ finjima tesi oyia aḅụọ-kuḅu finji na sọnọ na (22 m), anị ḅẹ gele sọnọma ḅụọ-kuḅu na pakịrị na (2.2 m); iḅi ḍoritẹ lọkọ-ḅịtẹ na ojo-ojo-ojo otolo na nyana ḅa.

¹⁹Akpụrụ-warị mẹ ḅio sime ye mịẹ pịrị ye goyegoye mamgba na, anị ḅẹ adolịa mamgba na, nụngọ mẹ ḅẹ adolịa mamgba na ojo anie ini kẹ arị tẹmẹ ḅarịye.”

²⁰“Ị́ tọn Izirẹlịapụ ma pịrị ḅa mịnẹ ịn tọnjọ mẹ gotẹ iḅitẹịn pọnjị olivu pulo ọkị-ḅo ị́ pịrịị, mịẹtẹ tọnjọ sịkọpẹlẹ-a ḅara kẹ kọrị ḅarị ḅara.

²¹Kiki-pẹlẹ-ḅịtẹ mẹ tẹ ḅụụ ḍie pakama yọ mẹ tọrọkọ simearị ye mẹ ḅụ paka-ḅo Akpụrụ-warị mẹ ḅẹ kobiri yọ la ḅụ Erọnị na, ori owiapụ-awọmẹ na anị tọnjị ḅa, tẹ ḅoḅiri ḅụ anị ḍikiḍiki ḅo dede-ḅio la ḅa KỊNỊNYANAḄỌ ḅe tọrọkọ ḅụ. Anị kẹẹ korotẹ kịnị kẹ elekima sụa gbamaso ḅarị oloko sọ ḅa Izirẹlịapụ ma ḅụụ ḅụ mu ịna ḅụ ḅụọ-fa-ḅụọ-paka la ḅa.”