Read kalabari Paka-so 38 Bible Online

Paka-so 38 - kalabari bible

Paka-so 38

¹Ịn kẹ akasiya nwẹn-sịn sịn mẹ mie ọ̀ kẹ agba dọkịma edeni mẹ sọ nama ye; sọnọma ḅụọ-kuḅu na ḅara maa ẹnzụ na (2.2 m) anie anị ḅẹ nangwọ; sọnọma ḅụọ-kuḅu na ḅara maa ẹnzụ na (2.2 m) anie pịkị anị ḅẹ finjima; anị ḅẹ nangwọ na, finjima na gbasịm; anịsakị anị ḅẹ gele anie inia ḅụọ-kuḅu na ḅara maa ẹnzụ na (1.3 m).

²Anị ḅẹ ini ịkọlị ma ḅụ ori ịfalị sụa-pakama anị pịrịm; anị ḅẹ ịfalị ma na anị na gbọrụ ḅụ emi; tẹ ori ojo sọọ sara anị gbaịnm.

³Tẹ agbamịẹ-anga mẹ ḅẹ kọrịnama kọrị ngwongwo mamgba, ye-sọ aḅẹlẹ ma na, sọpụrụ ma na, opu apanị ma na, ḅuru-gbọn-aḅala ma na, anyịmgbọ tan apanị ma na, anị ḅẹ ngwongwo mamgba ori ojo kẹ arị tẹmẹm.

⁴Ọ̀ fịnị apakịrị dẹẹ ḅẹ anga sụa agbamịẹ-anga mẹ pịrịm, anị ḅụ pono ḅọrọ wararị ye mẹ suku ḅio ọ̀ saakị ojo kẹ ịgbọ otolo ḍori ideri-mu anị ḅiri lam.

⁵Ori anị ḅẹ ini ịkọlị ma ḅụ ini anụnụma sụam fịnị apakịrị dẹẹ ojo kẹ ḍori ye mẹ ḅụ tẹ kẹ nangwọtẹ asịn ikiḅa ma pịrịm arị ọlọ ḅẹ aị ḅara ḅụ.

⁶Ịn kẹ akasiya sịn-arị sịn ḅụ ọ̀ nangwọtẹ asịn ikiḅa ma pẹlẹ pakama-ḅo tẹ ojo sọ sara arị gbaịnm.

⁷Ọ̀ nwẹnị nangwọ, nangwọtẹ asịn ikiḅa ma kẹ agbamịẹ-anga mẹ akaka ma ḅụ nụnụma ma ḅio suu toluma ini arị kẹ anị dogi ḅarị ḅara; ò finjima, finjimatẹ ḍụḅọ apakịrị kẹ anị namam tẹ mịẹtẹ anị foo-foo ḅara simem.

⁸Ereme ma tẹ Kobiri Akpụrụ-warị mẹ ḅọkọ mẹ ḅụ kọrịnama kọrịarị apụ ma tẹmẹ-ḍikiye ḅụ mie ori ojo kẹ opu-panị mẹ na anị ḅẹ suku mẹ na tẹmẹ ye.

⁹Ọ̀ nụngọ pakama KỊNỊNYANAḄỌ ḅe simearị Akpụrụ-warị mẹ pịrịm. Suku-jụ da pakịrị anga mẹ, iḅi ḍoritẹ lọkọ-ḅịtẹ mie ọ̀ kẹ kikima aị mịẹ anị pịrị yee, anị ḅẹ nangwọ sọnọma si na oyia aḅụọ-kuḅu finji (44 m).

¹⁰Arịḅẹ ḅeriaị si, arịḅẹ otolo pịkị si, ori ojo kẹ arị tẹmẹm, kụma ḅeriaị ma ḅụ ḅẹ sụka aị ma na arị sịḅịsụa-aị ma na ò seleḅa kẹ arị tẹmẹm.

¹¹Anịsakị ọgọnọ-jụ da pakịrị anga mẹ ḅẹ nangwọ pịkị sọnọma si na oyia aḅụọ-kuḅu finji (44 m), arịḅẹ ḅeriaị si, arịḅẹ otolo ma sọ si, ori ojo kẹ arị tẹmẹm, kụma arịḅẹ ḅeriaị ma ḅẹ ye-sụka-aị ma na, arị sịḅịsụa-aị ma na ori seleḅa kẹ arị tẹmẹm.

¹²Ịrụa-ideriarị-anga da anga mẹ ḅụ, tesi oyia aḅụọ-kuḅu finji na sọnọ na (22 m) la nangwọ kiki-pẹlẹ-aḅịtẹ anị ḅụ sọm, arịḅẹ ḅeriaị oyi, arịḅẹ otolo pịkị oyi; ḅeriaị ma ḅẹ ye-sụka-aị na, arị sịḅịsụa-aị ma na ò seleḅa kẹ arị tẹmẹm.

¹³Anịsakị tọrọkọ mẹ ịrụa-saakịarị-anga da anga mẹ pịkị tesi oyia aḅụọ-kuḅu finji na sọnọ na (22 m).

¹⁴Anị ḅẹ onu-ḅọkọ mẹ ḅẹ gbọrụ pakịrị anga si maa ḅụọ-kuḅu finji na pakịrị na (6.6 m) la kikima aị sọm, tẹra ḅeriaị na, tẹra otolo na arị na.

¹⁵Anie anị pịkị sime osi pakịrị anga pịrị ḅara; nụngọ mẹ ḅẹ onu ḅọkọ mẹ ḅẹ akaka goyegoye ḅụ si maa ḅụọ-kuḅu finji na pakịrị (6.6 m) kẹ nangwọ kiki-pẹlẹ-aḅịtẹ emi, pịkị arịḅẹ tẹra ḅeriaị na tẹra otolo na.

¹⁶Nụngọ mẹmgba ikelema-koro ḍoritẹ iḅi lọkọ-ḅịtẹ mie ịn kẹ onu mẹ gbori ye.

¹⁷Anịsakị ḅeriaị ma ḅẹ otolo ma ojo, kụma ḅeriaị ma ḅẹ ye-sụka-aị ma na, arịḅẹ sịḅị sụa aị ma na seleḅa; kẹ arịḅẹ suku ejikila ma sọ sara gbaịn ye sọ seleḅa, anịsakị nụngọ mẹ ḅẹ onu mẹ ḅẹ ḅeriaị mamgba ịn seleḅa sịḅịsụa-aị kẹ arị asịḅị sụam.

¹⁸Nụngọ mẹ ḅẹ onu-ḅọkọ mẹ bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na ḍoritẹ lọkọ-ḅịtẹ na, laga-kọrịnama-kọrịapụ iri kẹ ḍori ḅirima wararị aḅịtẹ mie ịn kẹ kikima ye; ḅụọ-kuḅu asuei (9 m) anị nwẹn kẹ nangwọm, tẹ nụngọ kikima aḅịtẹ ma gele la ḅara ḅụ anị sọnọma ḅụọ-kuḅu na pakịrị na (2 m) kẹ gelem.

¹⁹Arịḅẹ ḅeriaị ini, arịḅẹ inia otolo ma ojo, arịḅẹ ye-sụka-aị ma nwẹnị seleḅa, anịsakị arịḅẹ ejikila ma na, arịḅẹ sịḅịsụa-aị ma na pịkị seleḅa.

²⁰Anịsakị Akpụrụ-warị mẹ na, nụngọ mẹ na ikelema-koro ḅụ simearị adolịa mamgba ojo mie ịn kẹ arị tẹmẹ ye.

²¹Miemẹ anie ịn kẹ Ọḅọkụ-Igbe koko Akpụrụ-warị mẹ nama aị ma kịẹn gboloma tẹ arị paka ḅara, anie ḅụụ ḍie-pakama Akpụrụ-warị mẹ, Mozizi kọrịnama mẹ tọn Livayị furo-ḅẹ-apụ ma pịrị tẹ Erọnị agbamịẹḅọ ḅe owiḅọtụḅọ Itama daa-karakarama ḅụ ini arị kịẹn ḅara.

²²Bẹzalẹlị anie Yuri owiḅọtụḅọ pịkị Họ taa-owiḅọtụḅọ Juda furo-ḅẹ-ḅọ ḅe mie KỊNỊNYANAḄỌ ḅe tọn Mozizi pịrị ḅara mamgba kọrị fama ye.

²³Ọ̀ ḅụụ sọ ḅọ anie Ayisamakị, Danị furo-ḅẹ-ḅọ ḅe owiḅọtụḅọ Oliyabụ, ori anie ḅara kẹ ye mịẹ ḍin ḅọ, ye sime na-iḅi ḅara kẹ ye mịẹ pakama-ḅo, iri kẹ bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na, ḍoritẹ iḅi lọkọ-ḅịtẹ na ḅirimaḅọ.

²⁴Golu kpo-kpo mamgba tẹ ịn kẹ agba mịẹ ye ḅụ, ịn kẹ Fịafịa Yọ mẹmgba nama mẹ ḅụ suu ye, Fịafịa Yọ mẹ ḅẹ ye-tọnye ḅụ anie golu kpo oyia asi tesi oyi finji ofori, golu oyi gbọrụ puku finji (87,730).

²⁵Anịsakị seleḅa mẹ tẹ inima tẹ tomina-ogbo mẹ ḅụ ịn kịẹn apụ ma oso ye Fịafịa Yọ mẹ ḅẹ ye-tọnye ḅụ paka-ḅo ye seleḅa tẹra puku ị́ fa puku amesi, na ngei ẹndẹ fa jei na, seleḅa sọnọ apakịrị ofori pakịrị esenia si na (301,775).

²⁶Tomḅọ sịḅị-sịḅị oso ye (ịna igbigi ḅụ) gbọrụ beka nwẹn-sịn igbigi (anie seleḅa gbọrụ pakịrị kẹ maa anga ḍiya ḅẹ gbọrụ pakịrị Fịafịa Yọ mẹ ḅẹ ye-tọnye ḅụ) ḅẹḅọ-ḅẹḅọ tẹ si kụra sịḅị ḅụ ḅọrọ tẹ owiḅọ ḅụ saakị iwo kịnị kịẹn mẹ ḅụ ịn kịẹn apụ sọnọ apuku ofori puku inia si na, kịnị amesi oyi finji ofori kịnị eseni ẹndẹ na (603,550) ma ḅụ ọrụḅọ-ọrụḅọ osom.

²⁷Fịafịa Yọ mẹ ḅẹ otolo ma na, kiki-pẹlẹ-aḅịtẹ ma ḅẹ otolo ma na kịẹn gboloma sọnọa si, talẹntị sọnọa si anie seleḅa pakịrị tẹra puku ofori puku amesi oyi ẹndẹ finji (300,000) ma ịn kẹ otolo, sọnọa si ma tẹmẹm, seleḅa gbọrụ talẹntị anie seleḅa pakịrị sọnọma ẹndẹ oyia asi (3,000) finji gbọrụ otolo, otolo.

²⁸Anịsakị seleḅa pakịrị ini ẹndẹ na sọnọ apakịrị ofori pakịrị esenia si (1,775) ma na ḅụ mie ọ̀ ye ọkị tẹ kẹ ḅeriaị ma ḅẹ ye sụka aị ma tẹmẹ, pịkị sọ sara arị ḅe ejikila ma gbaịn tẹ pịkị kẹ arịḅẹ sịḅịsụa-aị ma tẹmẹ arị pịrị ye.

²⁹Ojo mẹ tẹ ini oso ye ojo mkpala ikiḅa inia apuku ofori puku asuei na mkpala oyia ẹndẹ gbọrụ ẹndẹ finji na (212,400).

³⁰Anị mie ọ̀ kẹ Kobiri Akpụrụ-warị mẹ ḅẹ ḅọkọ mẹ ḅẹ otolo ma na, ojo agbamịẹ-anga mẹ na anị ḅẹ fịnị tọnọ anga mẹ na nama anị pịrị, pịkị kẹ agbamịẹ-anga mẹ ḅẹ ngwongwo, mamgba na tẹmẹ ye.

³¹Nụngọ mẹ ikelema-koro ḅụ sime otolo ma na, Ọḅọkụ Igbe koko Akpụrụ-warị mẹ ḅẹ adolịa mamgba na, pịkị nụngọ mẹ ikelema-koro ḅụ sime adolịa mamgba na sọ tẹmẹ ye.