Read kalabari Paka-so 6 Bible Online

Paka-so 6 - kalabari bible

Paka-so 6

¹Kụma KỊNỊNYANAḄỌ ḅe nwẹnị Mozizi ḅẹẹ, “Mịọkụ à kẹ Fero mịẹ ḅarịye ị́ ẹrị ḅa; kẹ gotẹ ọkọ ḅẹẹarị, kụrọ ḅara ḅụ ori ịn fịrịma pakama ḅa; kụrọ ḅara mie ọ̀ kẹ ori ama mẹ ḅụ ịn dee pakama ḅarịye.”

²Tamụnọ nwẹnị Mozizi ḅẹẹ, “Yẹrị anie KỊNỊNYANAḄỌ ḅee.

³À ḅụụ-pakama Ebira-amụ ḍiem, Ayịzịkị ḍiem, pịkị Jekọbụ ḍiem Kụrọmamgba Nyana Tamụnọ ḅara ḅụ, kụma arị ị̀ ẹrẹ, KỊNỊNYANAḄỌ ḅe, ḅara kẹ ị̀ ḅụụ mie pakama tẹ ini ì nimi-a.

⁴À pịkị ama mẹ tẹ ini igoniapụ ḅara kẹ anga Kenanị ama mẹ kẹ ịn pịrị ḅẹ ọḅọkụ sọ kẹ ini na fịm.

⁵Anie sikima, arị Izirẹlịapụ ma, inima tẹ Ijiputi-ḅẹ-apụ ma omoni ḅara-ḅio ọlọ-sịẹma wararị apụ ma iningi mẹ naa tẹ, anịsakị arị ị̀ ọḅọkụ mẹ kẹ ḅiokoroma tẹ.

⁶Anịẹrẹsị Izirẹlịapụ ma ḅẹẹ, ‘Yẹrị anie KỊNỊNYANAḄỌ ḅee, anịsakị arị Ijiputi ḅẹ apụ ma dogi-aị ma suku-ḅio ḅụ ọ́ pakama-ḅo ḅa tẹ arị ọ́ ḍụa-ḅọrọma ḅa ịna omoni ḅara mẹ ḅio, sụụn-pakatẹ ḅara-kọngọ na, gburo-gburotẹ opu ḅẹrẹkọn amịẹaị mịẹ ḅara na à nwẹn kẹ ọ́ pakịrị ọkị ḅa;

⁷anịsakị arị ọmịnị ọkị tẹ kẹ ị̀ atomi mịẹ ḅa, tẹ arị ọmịna Tamụnọ sọ ḅa, tẹ ó nimi ḅa mịnẹ yẹrị anie KỊNỊNYANAḄỌ ọmịna Tamụnọ ḅee, oriḅe tẹ Ijiputi-ḅẹ-apụ ma dogi-aị ma suku-ḅio ḅụ ọ́ pakama-ḅo ḅọ ḅe.

⁸Tẹ arị ọmịnị ọkị-ḅo ama mẹ tẹ à ye karị ḅara kẹ mininim à kẹ Ebira-amụ na, Ayịzịkị na, Jekọbụ na pịrị ḅarị ama mẹ ḅio suu ḅa; arị anị kẹ ọ́ pịrị tẹ anị ọmịna nye sọ ḅa. Yẹrị anie KỊNỊNYANAḄỌ ḅee,’ ”

⁹Mozizi mị-ḅara mẹ ḍuko Izirẹlịapụ ma pịrịm, kụma ịn Mozizi poki ḍụkụ-a ịna kaantẹ tẹmẹ na, ịna tọrụsiẹrị omoni-sọ ḅara na gotẹ.

¹⁰KỊNỊNYANAḄỌ ḅe nwẹnị Mozizi ḅẹẹ,

¹¹Sọ-mu ḍuko Fero, Ijiputi ḅẹ amadaḅọ pịrịị, ori Izirẹlịapụ ma wẹrịsoo, ini ori ama ḅio paka-so.

¹²Kụma Mozizi nwẹnị KỊNỊNYANAḄỌ ḅe ḅẹẹ, “Ḍikii Izirẹlịapụ ma sọ amụ ì poki-a, tọ-ḅara ḅụ Fero rẹ ì poki ḅẹ, jen-a jen-a yẹrị ḅẹlẹ-pẹle-a ḅọ?”

¹³Ọkụma KỊNỊNYANAḄỌ ḅe ẹkwẹn Mozizi na, Erọnị na pịrịm ịn tọn Izirẹlịapụ ma na, Fero, Ijiputi ḅẹ amadaḅọ na pịrịị ini Ijiputi amụ ḅụ Izirẹlịapụ ma pakama-ḅo ḅẹ ḅara.

¹⁴Mịna apụ ma anie ịna aḍapụ ma awarị ma ḅẹ sịḅịdapụ ma; Rubẹnị, Izirẹlị tarị tụḅọ (mgbe) ḅe owiapụ-awọmẹ anie: Hanọkụ na, Palụ na, Hẹzịrọnị na, pịkị Karimu na; mịna apụ ma anie Rubẹnị ḅụụ ḅụ paka-ḅo afuro.

¹⁵Simiyọnị owiapụ-awọmẹ ma anie: Jemuhẹlị na, Jamịnị na, Ohadi na, Jakini na, Zoha na, pịkị Sahulu, anie Kenanị ḅẹ ẹrẹḅọ iyi owiḅọtụḅọ ḅe na; mịna apụ ma anie Simiyọnị ḅụụ ḅụ paka-ḅo afuro.

¹⁶Mịna apụ ma anie Livayị owiapụ-awọmẹ ma ẹrẹ, ịna aḅụọ ḅụ ịn wẹrịtẹ paka ḅara: Gasọnị na, Kohatị na pịkị Mẹrarị na. Livayị ḍumo ḅụ ọ̀ sịḅị ḅọrọ akụra anie tẹra akụra fa kụra sọnọma asi (137).

¹⁷Gasọnị owiapụ-awọmẹ ma anie: Libini na, Simeyi na, gbọrụḅọ gbọrụḅọ amịna afuro nyanam.

¹⁸Kohatị owiapụ-awọmẹ ma anie; Amụramụ na, Izarị na, Hẹbụrọnị na pịkị Uziyẹlị na. Kohatị ḍumo ḅụ ọ̀ sịḅị ḅọrọ akụra anie: Kụra sonioa asi oyi finji na tẹra akụra na (133).

¹⁹Mẹrarị owiapụ-awọmẹ ma anie: Mali na Musi na. Mịna apụ ma anie Livayị ḅụụ ḅụ paka-ḅo afuro, ịna aḅụọ ma ḅụ ịn wẹrịtẹ paka ḅara.

²⁰Amụramụ nwẹnị ọ̀ ḍa ịyịmbara Jokibẹdị ọkị sime, tẹ á nwẹnị Erọnị na, Mozizi na iyi ọ̀ pịrị. Amụramụ ḍumo ḅụ ọ̀ sịḅị ḅọrọ akụra anie tẹra akụra fa kụra sọnọma asi (137).

²¹Izarị owiapụ-awọmẹ ma anie Kora na, Nẹfẹgi na pịkị Zikiri na.

²²Anịsakị Uziyẹlị owiapụ-awọmẹ anie Misẹlị na, Ẹlịzafanị na pịkị Sitiri na.

²³Erọnị nwẹnị Amịnadabụ ẹrẹḅọtụḅọ Ẹlịsẹba, Nasọnị ịyịmbara ọkị sime, tẹ á nwẹnị Nadabụ na, Abihu na, Ẹlịyeza na pịkị Itama na iyi ọ̀ pịrị.

²⁴Kora owiapụ-awọmẹ ma anie: Asi na, Ẹlịkena na, pịkị Abịyasafụ na; mịna apụ ma anie Kora furo-ḅẹ-apụ ḅụ paka-ḅo afuro.

²⁵Erọnị owiḅọtụḅọ Ẹlịyeza nwẹnị Putiyẹlị eremịna-awọmẹ ma ḅẹ gbọrụḅọ ọkị sime, tẹ á nwẹnị Finihasi iyi ọ̀ pịrị. Mịna apụ ma anie Livayị furo-ḅẹ-apụ ma ḅụ ḍa awarị-warị ma ḅẹ sịḅịdapụ.

²⁶Mịna apụ ma mie Erọnị na, Mozizi na tẹ KỊNỊNYANAḄỌ ḅe ḅẹẹm, “Ijiputi ama mẹ ḅio ịna kpo-kpo ma ḅụ Izirẹlị ḅe apụ ma pakama-ḅoo” kẹ ḅẹẹ apụ ma.

²⁷Ḅị Mozizi ḅe na, ḅị Erọnị ḅe na, ini mie Ijiputi ḅụ Izirẹlịapụ ma pakama-ḅo gbolomaye ḍuko Fero, Ijiputi ḅẹ amadaḅọ ḅe pịrị apụ.

²⁸Anị ene mẹ ḅụ, KỊNỊNYANAḄỌ ḅe Ijiputi ama mẹ ḅio ẹkwẹn Mozizi pịrị sakị,

²⁹KỊNỊNYANAḄỌ ḅe Mozizi ḅẹẹm, “Yẹrị anie KỊNỊNYANAḄỌ ḅee, à ḍuko ị́ pịrị aị mamgba ḍuko Fero Ijiputi ḅẹ amadaḅọ pịrịị.”

³⁰Kụma Mozizi KỊNỊNYANAḄỌ ḅe ḅẹẹm “Ḍikii yẹrị anie ḅẹlẹ pẹlẹ-a ḅọ, ndẹẹ anịtẹrẹmẹ Fero kẹ ì poki ḅẹ ḅara?”