Read kalabari Paka-so 7 Bible Online

Paka-so 7 - kalabari bible

Paka-so 7

¹KỊNỊNYANAḄỌ ḅe nwẹnị Mozizi ḅẹẹ, “Ḍikii, arị ị́ kẹ Tamụnọ sọma Fero pịrị ḅa, anịsakị í iyimbere Erọnị ị́ ịkịankoroḅọ sọ ḅa.

²Ị́yẹrị à tọn ị́ pịrị aị mamgba ḍuko í iyimbere Erọnị pịrị ḅa, anịsakị Erọnị ḍuko Fero pịrị ḅa ọ̀ wẹrịso tẹ Izirẹlịapụ ma ori ama ḅio paka-so ḅẹ ḅara.

³Kụma à Fero ḅioḅẹngbọ kụrọma ḅa, tẹ arị Ijiputi ama mẹ ḅio ì elekima ma na, ḅụụ-buama-aị ma na jaị, jaị mịẹ sọ.

⁴Fero ó poki ḍụkụ ḅịa, anị sakị rẹ mie arị ị̀ ḅara kẹ Ijiputi ọgọnọ gbana tẹ ị̀ atomi Izirẹlị owiapụ-awọmẹ kpo, kpo ma pakama-ḅo ḅarịye Ijiputi ḅụ, gburo-gburotẹ opu ḅẹrẹkọn amịẹaị mịẹ ḅara ḅụ.

⁵Anịsakị arị Ijiputi Ọgọnọ ị̀ ḅara sụn-pakama tẹ ịna ogbo-ḅio Izirẹlịapụ ma pakama-ḅo sakị mie Ijiputi-ḅẹ-apụ ma nimi ḅarịye mịnẹ yẹrị anie KỊNỊNYANAḄỌ ḅee.”

⁶Tẹ Mozizi na, Erọnị na ọkọ mịẹm; ịn KỊNỊNYANAḄỌ ḅe tọn ịn pịrị ḅara mịẹm.

⁷Ini ẹkwẹn Fero pịrị sakị Mozizi sịḅị kụra inia si ḅọrọ tẹ, anịsakị Erọnị sịḅị kụra inia asi tẹra kụra finji ḅọrọ tẹ.

⁸KỊNỊNYANAḄỌ ḅe nwẹnị Mozizi na Erọnị na ḅẹẹ,

⁹“Fero ọ́ ḅẹẹm ọ́ ḅụụ-buamaye mịẹ ḅụ ọmịna aḅụụ ḍie-pakamaa ḅẹḅẹ, anị rẹ mie í Erọnị ḅẹẹ ḅarị ye, ‘ị́ mkpara mẹ ọkị tẹ anị wakị Fero tọrọkọ koromaa, mịẹtẹ anị oronwi ḍi ḅẹ ḅara.’ ”

¹⁰Mie ḅụ Mozizi na Erọnị na Fero dama-mu tẹ KỊNỊNYANAḄỌ ḅe tọn ḅara mịẹm. Erọnị Fero na ori afịrịmẹnjịapụ na tọrọkọ ori mkpara mẹ wakị koromam tẹ anị oronwi ḍim.

¹¹Anịtẹso Fero nwẹnị ye-nimiapụ ma na, majịkị-mịẹapụ ma na sịn ḅo kobiri, tẹ ini Ijiputi ḅẹ majịkị-mịẹapụ ma sọ nwẹnị ịn ḍawọ tẹ ḍịn ḅọị aị ḅụ mị gbọrụ ye mẹ mịẹ.

¹²Kẹ gotẹ ọkọ ḅẹẹarị, ọrụḅọ-ọrụḅọ amịna mkpara kẹ wakị koromam tẹ arị oronwi amẹẹ ḍim. Kụma Erọnị mkpara ḍi oronwi ịna mkpara ma ḍi oronwi sịẹma mẹnị famam.

¹³Anịsọ Fero ḅioḅẹngbọ paa kụrọ simem, tẹ ori ịn poki ḍụkụ-a, KỊNỊNYANAḄỌ ḅe ḅẹẹ tẹ ḅara mẹ.

¹⁴Anịtẹso KỊNỊNYANAḄỌ ḅe nwẹnị Mozizi ḅẹẹ, Fero ḅioḅẹngbọ kụrọ tẹ, ọ̀ ḍụkụ tẹ tomi ma wẹrịso tẹ in so-a.

¹⁵Dede-ḅio mkpara mẹ tẹ oronwi ḍi ye mẹ ọkị ọlọ tẹ Fero paka minji-suku muarị ogbo ọ̀ dama-mu tẹ tọrụ mẹ akaka ḅụ sime ò koruu.

¹⁶Anịsakị ị́ ọ̀ ḅẹẹ ḅa, “KỊNỊNYANAḄỌ ḅe, Hiburu ḅẹ apụ ma Tamụnọ ḅe ị̀ kẹ ị́ fịrịmam tẹ ḅẹẹm ori atomi wẹrịsoo, in so, mịẹtẹ ini ịkpa mẹ ḅio fịrịmẹnjị ọ̀ pịrị ḅẹ ḅara; kụma ḍikii amụ ị́ paa ị̀ ḅịḅị poki-a.”

¹⁷Mie KỊNỊNYANAḄỌ ḅe ḍuko yee, “Miemẹ ḅụ mie í nimi ḅarịye mịnẹ yẹrị anie KỊNỊNYANAḄỌ ḅee. ‘Ḍikii àrị mkpara mẹ tẹ ị̀ ḅara-ḅio simearị ye mẹ kẹ Nayịlị nwẹn-sịn tọrụ mẹ ḅẹ minji mẹ fomu ḅa, tẹ arị pịkị-ḅo ọmbie ḍi ḅa,

¹⁸tẹ Nayịlị nwẹn-sịn tọrụ mẹ ḅio ḅẹ inji ma fịị ḅa, tẹ Nayịlị tọrụ mẹ nwẹnị fụrụ, tẹ Ijiputi-ḅẹ-apụ ma ḅio-sima tẹ ịn ḅarị Nayịlị tọrụ mẹ ḅẹ minji ḍuu ḅuu ḅịa.’”

¹⁹Tẹ KỊNỊNYANAḄỌ ḅe nwẹnị Mozizi ḅẹẹ, “Erọnị ḅẹẹ, ‘Ị́ mkpara mẹ ọkị tẹ ị́ ḅara sụn-pakama Ijiputi ḅẹ aminji ma daa — ịna atọrụ na, ịna ḅarapuuaị na, ịna aḍaḅa na, pịkị minji sụa wẹrị aị ḅio ịn nyana minji mẹmgba na, mịẹtẹ arị ḅo ọmbie ḍi ḅẹ ḅara; anịsakị, Ijiputi ama mẹmgba ikelema-koro ḅụ, ịn sịn kẹ kara minji-sụaye-o, ḍụḅarị minji-sụaye-o ḅio sọ ọmbie ḅin ḅa.’ ”

²⁰Mozizi na, Erọnị na KỊNỊNYANAḄỌ ḅe tọn ḅara mịẹm; Fero na, ori afịrịmẹnjịapụ na tọrụ-ogbo ḅụ ori mkpara mẹ saakị-gelema tẹ kẹ minji mẹ tẹ Nayịlị nwẹn-sịn tọrụ mẹ ḅẹ minji mẹ fomum, tẹ minji mẹmgba tẹ Nayịlị nwẹn-sịn tọrụ mẹ ḅio sime minji mẹ pịkị-ḅo ọmbie ḍim.

²¹Nayịlị nwẹn-sịn tọrụ mẹ ḅio sime inji ma fịị famam; Nayịlị nwẹn-sịn tọrụ mẹ nwẹnị fụrụ, tẹ mịẹtẹ Ijiputi-ḅẹ-apụ ma ḅarị inetẹ Nayịlị nwẹn-sịn tọrụ mẹ ḅẹ minji ḍuu ḅuu-a, anịsakị Ijiputi ama mẹmgba ikelema-koro ḅụ ọmbie sikima jen ofori,

²²Kụma Ijiputi ḅẹ majịkị-mịẹapụ ma ịn ḍawọ tẹ ḍin ḅọị aị ḅụ mị gbọrụ ye mẹ mịẹm; mie ḅụ Fero ḅioḅẹngbọ anị sime kụrọ ḅara mẹ simem; tẹ KỊNỊNYANAḄỌ ḅe ḅẹẹ tẹ ḅara ḅụ, ori ịn poki ḍụkụ-a.

²³Fero vuunma pịkị tẹ mẹnjị mu ọ̀ warị ḅio sọm, tẹ miemẹ so kẹ amịna ḅioḅẹngbọ ḅụ sụa-a.

²⁴Tẹ Ijiputi-ḅẹ-apụ mamgba ḅuu minji nyana tẹ ḅuu ḅẹ ḅara gotẹ suḅe soku Nayịlị nwẹn-sịn tọrụ mẹ ikelemam, gbala ini inetẹ Nayịlị nwẹn-sịn tọrụ mẹ ḅẹ minji mẹ ḅuu-a ẹrẹsị.

²⁵KỊNỊNYANAḄỌ ḅe Nayịlị nwẹn-sịn tọrụ mẹ fomu tẹso, sọnọma aḍin ḅo ḅọrọm.