Read kalabari Paka-so 9 Bible Online

Paka-so 9 - kalabari bible

Paka-so 9

¹Anịtẹso KỊNỊNYANAḄỌ ḅe nwẹnị Mozizi ḅẹẹ, “So Fero dama-mu tẹ ọ̀ ḅẹẹ mie KỊNỊNYANAḄỌ, Hiburu ḅẹ apụ ma Tamụnọ ḅe ḅẹẹ ḅara, ‘ị̀ atomi ma wẹrịso in so, mịẹtẹ ịn fịrịmẹnjị ị̀ pịrị ḅẹ ḅara.

²Kẹ gotẹ ọkọ ḅẹẹarị, ị́ ḍụkụ tẹ ịn wẹrịso tẹ ịn so-a tẹ paa ini ọlọ-sịẹmam ḅẹḅẹ,

³à si obi fomu-ḅara kẹ í opu anama — asụ ma na, yedogi-anama ma na, ịn kẹ kamẹlị sịn ike-sụa-anama ma na, nama ogbo-ogbo ma na, anana na oḅori na ogbo-ogbo ma na tẹ piri-ḅio simearị aị ma — ọgọnọ gbana ḅa.

⁴Kụma à Izirẹlị ḅẹ opu anama na, Ijiputi ḅẹ opu anama na ogboku kịrị pakama ḅa mịẹtẹ sime Izirẹlịapụ pịrị aị mamgba ḅụ gberie-sọ fịị ḅịa ḅara.’ ”

⁵Tẹ KỊNỊNYANAḄỌ ḅe nwẹnị sakị pẹlẹ tẹ ḅẹẹ, “Ḅaa ḅụ yẹrị, KỊNỊNYANAḄỌ ḅe, miemẹ mịẹ ḅa ama mẹ ḅio.”

⁶Anị ene mẹ ḅẹ ene ḅaa ḅụ KỊNỊNYANAḄỌ ḅe mị ye mẹ mịẹm; Ijiputi-ḅẹ-apụ ma opu anama mamgba fịị famam, kụma Izirẹlịapụ ma opu anama ḅụ kpọkpọ gbọrụ nama kịngẹ sọ fịị-a.

⁷Tẹ Fero kịnị fịrịma mu ḍikịm, tẹ in ḍọkị nimim mịnẹ Izirẹlịapụ ma opu anama ma ḅụ paa kpọkpọ gbọrụ nama sọ fịị-a. Fero ḅioḅẹngbọ paa kụrọ kịkị simem tẹ ọ̀ ḍụkụ tẹ tomi ma wẹrịso tẹ in so-a.

⁸KỊNỊNYANAḄỌ ḅe nwẹnị Mozizi na Erọnị na ḅẹẹ, “Ọmịnị ọpọ-suku fọọn kalịye kpo ọkịị, anịsakị yee Mozizi Fero tọrụ-ogbo ḅụ arị kẹ wakị So da.

⁹Anị ḅo gbẹẹ kọsịtẹ fọọn sọ ḅa, tẹ Ijiputi ama mẹmgba ikelema-koro ḅa, tẹ ḅo kaan-kaantẹ ịnọ mịẹarị ọpọpọlị pakama ḅa tomi na, nama na ọgọnọ Ijiputi ama mẹmgba ikelema-koro ḅụ.”

¹⁰Mie ḅụ ini ọpọ-suku ḅụ fọọn kalịye, kalịye kpo, kpo ọkịm, tẹ mu Fero tọrọkọ sịẹsimem, tẹ Mozizi arị kẹ gbin So-ḅio suum, tẹ anị nwẹnị ḅo kaan-kaan-sara tẹ ịnọ mịẹarị ọpọpọlị pakama tomi na, nama na ọgọnọ ḅụ.

¹¹Tẹ ọpọpọlị ma gotẹ majịkị-mịẹapụ ma ḅarị inetẹ Mozizi tọrọkọ sịẹsime-a, gbala ọpọpọlị ma majịkị-mịẹapụ ma na, Ijiputi-ḅẹ-apụ mamgba na ọgọnọ paka sara wararị ẹrẹsị.

¹²Kụma KỊNỊNYANAḄỌ Fero ḅioḅẹngbọ kụrọmam, tẹ ori ịn poki-a KỊNỊNYANAḄỌ ḅe wẹrịtẹ ẹkwẹn Mozizi pịrị ḅara.

¹³Anịtẹso KỊNỊNYANAḄỌ ḅe nwẹnị Mozizi ḅẹẹ, “Dede-funfun saakị tẹ mu Fero tọrọkọ sịẹsime tẹ ọ̀ ḅẹẹ mie KỊNỊNYANAḄỌ Hiburu ḅẹ apụ ma Tamụnọ ḅe ḍuko yee, ‘ị̀ atomi wẹrịso ịn so, mịẹtẹ ịn fịrịmẹnjị ị̀ pịrị ḅarị ḅara.

¹⁴Kẹ gotẹ ọkọ ḅẹẹarị, mị-dọkụ, ì si obi fomu-ḅara mamgba à kẹ ị́yẹrị na, ị́ afịrịmẹnjịapụ na, ị́ atomi na ọgọnọ gbana ḅa, mịẹtẹ ó nimi ḅa mịnẹ tomikiri mẹmgba ḅụ ị̀ kịka gbọrụḅọ-sọ ofori.

¹⁵Àrị ị̀ ḅara saakị tẹ ama gbaịn si obi kẹ ị́yẹrị na ị́ atomi na fomu namịna, mimgbe anị ḅo nwẹn la sakị, tomikiri mẹ ḅụ ịn gbọrsịḅị ọ́ pẹlẹ-siin tẹ.

¹⁶Kụma ị̀ kụrọ kẹ í ḍie, tẹ mịẹtẹ tomikiri mẹmgba ikelema-koro ḅụ àrị ereso ḅarị ḅara, miemẹ mie à gotẹ ị́ wẹrị ḍumoma yee.

¹⁷Ị́ paa ị́ ḅụụ saakị-gelema tẹ ị̀ atomi ma ẹngbẹsẹ tẹ ịn wẹrịso tẹ ịn so-a.

¹⁸Ḍikii, ḅaa nwẹn pembe sakị ḅụ, à mịẹtẹ Ijiputi bịan paka ene ḅụ ọkị nwenii ḅo mịọkụ la gbala-gbala amụ koro-a ḅẹlẹma iku-ikutẹ opu so-aḍụḅarị erise fie ḅa.

¹⁹Anịẹrẹsị mịọkụ fịrịma mu í opu anama na, ye tẹ piri-ḅio ị́ nyana aị mamgba ọkị-ḅo ye arị la ḅịa sịḅị kikima anga ḅụ suu; kẹ gotẹ ọkọ ḅẹẹarị, so-ḍụḅarị mẹ tomḅọ nwẹn-sịn tomḅọ na, nama goyegoye na tẹ piri-ḅio emi tẹ ini ọkị-ḅo warị ḅio suu-a aị ọgọnọ sara tẹ ịn fịị ḅa.’ ”

²⁰Anịtẹso Fero afịrịmẹnjịapụ ma ogbo-ḅio ḅụ oriḅe tẹ KỊNỊNYANAḄỌ ḅe ẹkwẹn-ḅịḅị mẹ mangịma ḅọ mịẹ tẹ mḅọ omoniapụ na, mḅọ opu anama na ḍumo-mangị kọn warị ma ḅio sọ-mum;

²¹kụma oriḅe tẹ KỊNỊNYANAḄỌ ḅe ẹkwẹn-ḅịḅị mẹ kẹ ye-sịn-a ḅọ ḅe amịna omoniapụ na, amịna opu anama na koroma-som piri mẹ ḅio.

²²Anịtẹso KỊNỊNYANAḄỌ ḅe nwẹnị Mozizi ḅẹẹ, “Ị́ ḅara sụn-pakama so mẹ daa, mịẹtẹ so-aḍụḅarị Ijiputi ama mẹmgba ḅụ tomi na, nama na, piri-ḅio sịn goyegoye na ọgọnọ sara bebe Ijiputi ama mẹ ikelema-koro ḅarị ḅara.”

²³Anịtẹso Mozizi ori mkpara sụn-pakama so dam; tẹ KỊNỊNYANAḄỌ ḅe so-alagba na, so-aḍụḅarị na fịnị na kẹ fịrịma kiri mẹ tẹịnm. Tẹ KỊNỊNYANAḄỌ ḅe so aḍụḅarị na, fịnị na kẹ Ijiputi ama mẹ ḅụ saram,

²⁴Fịnị na gwatẹ so-aḍụḅarị sịkọpẹlẹ-a ḅara kẹ saram, ḅẹlẹma iku-ikutẹ so-aḍụḅarị. Ijiputi bịan opu sẹ mịẹ kụra-ḅio, gbala-gbala amụ sara-a so-aḍụḅarị mie sara yee.

²⁵So-aḍụḅarị ma nwẹnị Ijiputi ḅẹ ama mamgba ikelema-koro ḅụ ye goyegoye tẹ piri-ḅio sime ye goyegoye — tomi na, nama na sọ fomu-fomu gbin; piri-ḅio sime sịn goyegoye so-aḍụḅarị ma arị fomu gbin tẹ opu asịn ma goyegoye anyịma tẹ kẹ pakịrị-pakịrị puum.

²⁶Gosẹnị ama mẹ tẹ Izirẹlịapụ mẹ sime anga mẹ ngẹrị mie so ḍụḅarị la-a ye.

²⁷Anịtẹso Fero nwẹnị fịrịma tẹ Mozizi na Erọnị na sịn, tẹ ịn ḅẹẹ, “Mị-dọkụ yẹrị si mịẹm, KỊNỊNYANAḄỌ ḅe mịẹ kuramam, anịsakị yẹrị na, ị̀ atomi na mịẹ-irimam.

²⁸Ọ́ KỊNỊNYANAḄỌ ḅe tẹkẹẹ; kẹ gotẹ ọkọ ḅẹẹarị, mị so-alagba mẹ tẹ tẹịn-arị ye mẹ na, sararị so-aḍụḅarị ma na iḅi tẹẹ; à wẹrịso tẹ ó so ḅa, ọ́ ḅarị jen kẹ mịanga sime ḅịa.”

²⁹Mozizi nwẹnị ọ̀ ḅẹẹ, “Àrị opu ama mẹ ḅio mẹnjị-paka gbọrụ sakị, arị ị̀ aḅara sụn-pakama KỊNỊNYANAḄỌ ḅe da ḅa; tẹ so-alagba mẹ daasịẹ ḅa, anịsakị so aḍụḅarị ma ḅarị sara ḅịa mịẹtẹ í nimi ḅa mịnẹ tomikiri mẹ KỊNỊNYANAḄỌ ḅe nye.

³⁰Kụma ị́yẹrị na, ị́ afịrịmẹnjịapụ na amụ ọ́ paa KỊNỊNYANA-TAMỤNỌ ḅe ḍiki-ḅalafa-a.”

³¹Ịn kẹ fịlakịsị sịn ḍiki parị ye pakamarị sịn mẹ na, bali nwẹn-sịn mbịaka pembe fịye mẹ na gulugulu famam, gbala bali mẹ fịye sụa tẹ, anịsakị ḍiki parị sịn mẹ panga-ḅaa tẹ ẹrẹsị.

³²Kụma ịn witi na, sipẹlịtị na sịn mbịaka pembe afịaị ma gulugulu-a, arị kpọọ-kpọ sakị amụ la-a ẹrẹsị,

³³Mie ḅụ Mozizi Fero ḅụ so tẹ mẹnjị opu ama mẹ ḅio paka, tẹ ori aḅara sụn-pakama KỊNỊNYANAḄỌ ḅe dam; tẹ so-alagba mẹ na, so-aḍụḅarị ma na daasịẹm, tẹ eene mẹ ḅarị jen-maaịn kẹ tomikiri mẹ ḅụ sara-a.

³⁴Kụma Fero ẹrịm mịnẹ eene mẹ na, so aḍụḅarị ma na, so-alagba mẹ na daasịẹ tẹ, tẹso, mie ọ̀ pịkị, sin si mịẹ ye, tẹ ori na, ori afịrịmẹnjịapụ na ịna aḅioḅẹngbọ kụrọmam.

³⁵Mie ḅụ Fero ḅioḅẹngbọ kụrọ-kịkị tẹ ọ̀ ḅarị ḍụkụ tẹ Izirẹlịapụ ma wẹrịso tẹ ịn so-a, KỊNỊNYANAḄỌ ḅe wẹrịtẹ Mozizi ḅụụ ḅọrọ tẹ ḍuko tẹ ḅara.