Read kalabari Jobu 11 Bible Online

Jobu 11 - kalabari bible

Jobu 11

¹Jobu ò ḍukoarị ye ḍuko fama tẹso, Zọfa Nahama ḅẹ ḅo ḅe nwẹnị pakịrị:

²“Mana-mana ẹkwẹn-aḅịḅị ma pakịrị-a ḅara kẹ ḅọrọ-so na-iḅi? Anịsakị tomḅọ tọnwa ẹkwẹn kọn, ḅọrọ tomḅọ karakara ḍie-pakamarị?

³Ị́ kọn-arị kịnị arị fiearị aị naa-a ẹkwẹn ma, kịnị aḅịḅị gbaịn ḅẹ, tẹ ị́ kịnị kombo sakị, gbọrụḅọ so í sule ḅịa?

⁴Kẹ gotẹ ọkọ ḅẹẹarị, ị́yẹrị mẹẹ: Ì ḍukoye mẹ karakara wararị, anịsakị Tamụnọ tọrụ-ḅio à fịafịa wararị.

⁵Kụma yei, mgbe Tamụnọ paa ọ̀ ḅịḅị finji, tẹ ẹkwẹn kọn ị́ pịrị,

⁶tẹ nimi mẹ ḅẹ ḅọị aị ma ḍuko ị́ pịrị ḅa! Kẹ gotẹ ọkọ ḅẹẹarị, yefieye naa ḅụ ọ̀ pakịrị-pakịrị nyana wararị, Anịẹrẹsị nimi mịnẹ Tamụnọ í si la ḅara gbẹẹ fomu-ḅara kẹ amụ ị́ pịrị-a.” Jọfa nwẹnị paa ẹkwẹn tẹ ḅẹẹ:

⁷“Í inetẹ Tamụnọ pokolotẹ aị ma ḍọkị-ẹrị ḅẹ? Í inetẹ Kụrọmamgba Nyanaḅọ ḅe ḍụḅa mu kunoma anga ḍọkị-ẹrị ḅẹ?

⁸Anị gele So nẹngịm — í inetẹ tiye mịẹ ḅẹ? Pokolo ḍuḅu nẹngịm — í inetẹ tiye nimi ḅẹ?

⁹Anị tọn kụma, anịḅẹ nangwọ tomikiri mẹ nẹngịm, anịsakị anịḅẹ finjima opu tọrụ mẹ nẹngịm.

¹⁰Ọ̀ nwẹnị ḅọ ḅọrọ tolu, tẹ ị́ kẹ ikoli suu tẹ ḅẹrẹkọn sịn kụma, tụḅọ inetẹ ọ̀ dasịẹma ḅẹ?

¹¹Kẹ gotẹ ọkọ ḅẹẹarị, papaa tomi ma ori ịn nimi wararị; ọ̀ mịẹ-irima ẹrị kụma, ori anị kẹ ḅiokoroma ḅịa?

¹²Kụma ye-nimia-ḅọ ḅe ye fie ye naa ḅa, piri-ḅio-ḅẹ yedogi-nama ḅe tụḅọ pịkị-ḅo tomḅọ ḍi sakị.

¹³Ị́ í ḅioḅẹngbọ wẹrị tụkụmam ḅẹḅẹ, ị́ ị́ aḅara sụn-pakama ọ̀ da ḅa.

¹⁴“Mịẹ-irima ị́ ḅara-ḅio emi-emii, anị kẹ ala-jụ koroma, tẹ ḍụkụtẹ si-sịḅịḅio ị́ akpụrụ-awarị ma ḅio anga ma.

¹⁵Anịrẹ ḅụụ-ịmbụkụ-a ḅara ḅụ, ị́ tụkụma ḅara kẹ ị́ tọrụ saakị ḅa; gberie-sọ ị́ la ḅịa, ị́ pịkị ḅalafa ḅịa.

¹⁶Ị́ ị́ la sịḅị-kanakanama aị ma kẹ ḅioḅọrọma ḅa; ọmọ ḅọrọ-so tẹ opu minji kẹ ḅiokoroma ḅara, ị́ nwẹn kẹ anị kẹ ḅiokoroma ḅa.

¹⁷Anịsakị ị́ ḍumo ḅịya paka eneḅaka-fịafịa-ogbo mẹ nẹngị ḅa; anịḅẹ fururu, dede mẹ sime-ḅara sime ḅa.

¹⁸Anịsakị í ḅiokpọ nyana ḅa, gbala ḅiokpọ emi ẹrẹsị; in í ḍikiḍiki ḅa, tẹ í ye ḅụụ la-a ḅara ḅẹ ịnyọsara ḅa.

¹⁹Ị́ ḅọlọlọ ḅa, tẹ gberie-sọ ị́ ḅalafama ḅịa; tọnwa-apụ í ḍiki-ḅụụjịrị ḅii ḅa.

²⁰Kụma si-sịḅịḅio-sụaḅọ ḅe atọrụngbọ ma gbarị ḅa; ḍumo-mangị kọn so so etela mamgba fa ịn pịrị ḅa, anịsakị ịna ḅiokoroma anie ịna kunoma ọwụ sara.”