Read kalabari Jobu 14 Bible Online

Jobu 14 - kalabari bible

Jobu 14

¹Jobu piki ẹkwẹn ma-mum: Ẹrẹḅọ iyi tomḅọ boowa aḍin nwẹn nyanam, anịsakị ḅụụ-fụka mḅọ ḅụụ ḅin wararị.

²Ò brebrema fịlawa paka ḅara paka tẹ kpatụm; ori ịrụa ḅio ḅẹ tẹmẹ mẹnjị ḅara mẹnjịm, tẹ faam.

³Ọkọ sime ḅọ ọgọnọ mie ị́ tọrụ finji tẹ ị́nịna ḅẹrẹkọn ḅẹ tẹ ị́ kẹ ḅẹrẹkọn ḅoarị?

⁴Tụḅọ inetẹ muno ḅio fịafịatẹ ye pakama-ḅo ḅẹ? Gbọrụḅọ-sọ ofori.

⁵Ori ene ma la ḅara tọn-pẹlẹ wararị, tẹ ori akalụ ma kịẹn-ḅịḅị ị́nịna emi, anịsakị ị́yẹrị pịkị ọ́ laa tẹ inetẹ ḅọrọ ḅịa anga tọn wararị ḅẹẹ sakị,

⁶ò ḍiki-tọrụsin, tẹ ọ̀ ḅụụ wẹrị ḅelemaa, mịẹ tẹ ori ori ene ma ḅẹ tọrụ-ḅẹlẹ nyana, ye ọkọ ḅọ igbigi gbẹẹ tẹ anị ḅẹ tọrụ-ḅẹlẹ nyana ḅara. Jobu piki ḅẹẹm:

⁷Sịn ḅiokpọ nyana wararị mịnẹ anị pịkị siin so-paka ḅa, ịn anị pẹlẹ-gbin gbin, anieḅụ anịḅẹ sịn-iyingi mẹ so-paka kunoma ḅịa.

⁸Anị ḅẹ kuno mẹ kiri mẹ ḅio sime omongim, tẹ anị ḅẹ ikiḅa mẹ kiri mẹ ḅio fịịm ḅẹsọ,

⁹anịsọ minji mẹ ḅẹ ọwụ mẹ ḅụ anị so-paka ḅa, tẹ ịwọma so-paka sịn ḅara sụa ḅara kẹ sịn aḅara sụa ḅa.

¹⁰Kụma tomḅọ fị-fịị, ini mḅọ iderima koromam; tomḅọ ọwụ-sara kunoma kụma ọ̀ pịkị tọ-anga emi?

¹¹Minji ḍaḅa ḅio fa kpalịkpalị ḅara, anịsakị puu mu tọrụ koroarị minji kụlụkụlụ tẹ samụnọ ḅara

¹²anị ḅara mie tomḅọ ḅọlọlọ tẹ ḅarị siin saakị-a ḅara, nwenii so ma ḅarị ofori sọ ọ̀ saakị ḅịa, anịanịa ò mono ḅụ naa-saakị.

¹³Yei, mịẹ tẹ ị́ ị̀ kẹ ḍuḅu ḅio ḅọị ḅẹ ḅara, mịẹ tẹ ị́ ị̀ ḅọị wẹrị nwenii ị́ ịganị mẹ ḅọrọ ḅẹ ḅara, mịẹ tẹ ị́ ị̀ kẹ ḅiokoroma ḅarị sakị pẹlẹ ị̀ pịrị ḅẹ ḅara!

¹⁴Tomḅọ fịị kụma ò siin ḍumo ḅarị mọ? Arị à fịrịmẹnjị ḅarị ene mamgba kẹ kọrị ḅa, nwenii ḅụụ-fụka ḅụ ị̀ paka-ḅo sakị ḅo ḅa.

¹⁵Anịtẹso ị́ ị̀ sịn ḅa, tẹ arị ị́ pakịrị ḅa; ị́ ị́ aḅara kẹ tẹmẹ ye mẹ ẹrị ḅẹ ḅii ḅa.

¹⁶Anịsakị ị́ ị̀ amẹnjị-aḅụọ ma kịẹn ḅa, ị́ ḅarị tọrụ kẹ ì si ḅụ wẹrị ḅịa;

¹⁷opu akpa ḅio ini ì oloko kan mẹ fịna gbaịn ḅa, tẹ ị́yẹrị nwẹnị ị̀ mịẹ-irima gbaịn-kpịtịpụma ḅa.

¹⁸Kụma tụndụ mẹ ḅịkịm tẹ kọsị faam, tẹ ịkụ mẹ sime kiri ḅụ ini anị saakị siinm;

¹⁹minji ma ḍụḅarị ma sịkịrịma siinm; mẹnjịarị minji mẹ kiri mẹ ḅẹ fịye ḍiḅi anga mẹ sịkịrịma siinm; anị ḅara mie ị́ kẹ tomḅọ ḅiokpọ mẹ ḅaa sin-arị.

²⁰Ị́ ori na tụḅụrụ gbamasom, tẹ ọ̀ ḅọrọm; ị́ ọ̀ tọrụkuḅu ḍimam, tẹ ọ̀ fịrịma-som.

²¹Ori owiapụ-awọmẹ ḅo kụn nyanam, tẹ ori anị nimi-a; ini ini iderima koromam, tẹ ori anị kuroma ḅo-a.

²²Ori oju la ye ḅẹ akụ ngẹrị mie ọ̀ ḅụụ nimiarị, anịsakị ọ̀ ḅụụ ngẹrị mie ò kururu pịrịarị.