Read kalabari Jobu 20 Bible Online

Jobu 20 - kalabari bible

Jobu 20

¹Anịtẹso Zọfa, Nahama ḅẹ ḅọ ḅe nwẹnị pakịrị:

²“Ì ḅio ḅụ à fọnyam ẹrẹsị, ì ḅiokoroma ị̀ pakịrịm.

³À gọlị ẹkwẹn naam, tẹ ì ye fie ye naa ḅụ gbọrụ tẹmẹ ị̀ pakịrịm.” Jọfa piki ḅẹẹm:

⁴“Elemu sakị ḅụ in tomi kẹ tomikiri mẹ ḅụ koroma kụra-ḅio miemẹ í nimi-a,

⁵mịnẹ si-sịḅịḅio-sụaḅọ ḅe opu sọ mẹ kpụlụ wararị, anịsakị Tamụnọ nimi-a ḅọ ḅe ḅioḅẹlẹ mẹ boowa sakị ngẹrị anie anị kẹ simearị?

⁶Ò gele mu So ma la, tẹ ọ̀ sịḅị mu So-tọrụ oḅuto akpo ma la sọ,

⁷ori ḅarana bịyẹ fịnya mẹ kọsị faa gbamaso ḅara, mie ọ̀ kọsị faa ḅarịye; inima tẹ ori ẹrị tẹ apụ ma gbela ḅa, ‘Ndẹẹ ori?’

⁸Ḍawọ fiin-so ḅara kẹ ò fiin-fa tẹ kịnị ḅarị ọ̀ ḍọkị-ẹrị ḅịa; ḍin ḅụ ẹrị ịkịan sịkịrịma fa ḅara kẹ ini ò ḍuka fama ḅa.

⁹Tọrụngbọ mẹ tẹ ori ẹrị ye mẹ, ḅara jen-maaịn kẹ ori ẹrị ḅịa, ò sime kiri sọ ḅarị jen kẹ ori ẹrị ḅịa.

¹⁰Ori awọmẹ igoin-apụ ma tọrụ iḅi ḍọkị ḅa, tẹ ori aḅara ori ngọ pịkịma anị nyana apụ pịrị ḅa.

¹¹Minji amụ ḅụụ ḅụ ḅọrọ-a kụrọ ori mgbe ma ḅio ḅin wararị, kụma anị ori na koro-sime ḅa fọọn mẹ ḅio.” Jọfa piki ḅẹẹm:

¹²“Si-sịḅịḅio si-sịḅịḅio-sụa ḅọ ḅe ḅịḅị-ḅio ḅẹlẹarị tẹ ori anị kẹ ọ̀ ḅẹlẹ suku-ḅio ḅọịarị sọ,

¹³ori inetẹ mininitẹ anị so-a, tẹ anị kẹ ọ̀ ḅịḅị-ḅio koko sọ,

¹⁴anịsọ ò fịye pịkị kunu ḅa ò furo ḅio; tẹ oronwi lakwọ sọ ḅa ọ̀ ḅụụ ḅio

¹⁵Ori ngọ mẹnị mu ori ombu suku koromam, tẹ pịkị arị ọsụm; Tamụnọ ò furo ḅio arị tan pakamam.

¹⁶Ori ịsẹm-fụlọ nwẹn-sịn oronwi ma kịnị ḅaa ḍiri mẹ nọnjị ḅa, tẹ oruḅuruḅuru nwẹn-sịn oronwi ḅe ḅịḅị-ḅio ḅẹ ḅẹlẹ mẹ ọ̀ ḅaa ḅa.

¹⁷Ọ̀ ḅarị tọrụ saakị ḅuu-minji atọrụ ma ḍiki ḅịa, ḅẹm na ndo-minji na sararị ḅuu-minji kala tọrụ ma

¹⁸Ọ̀ nụnụ tẹ nyana sịnmgbọlụ mẹ, ori anị wẹrịso ḅa, tẹ anị mẹnị mu ombu suku koroma ḅịa; ọ̀ kọn tuḅo ḅụ ọ̀ fị sọye mẹ, ori anị ḅẹ tọrụ-ḅẹlẹ nyana ḅịa.

¹⁹Kẹ gotẹ ọkọ ḅẹẹarị, ori igoin-apụ ma gbẹẹ-kọsịma tẹ ịn wẹrịso tẹ, ọ̀ warị tẹ ori nama-a ye kọrị ọkị tẹẹ.

²⁰Ọ̀ fịarị opu fịye mẹ ịnyọsara nimi-a ẹrẹsị, ọ̀ ḅụụ-ḅẹlẹ ḅẹ gberie tẹ ò koko ḅẹ ye ofori.

²¹Ọ̀ fị fịye mẹ kẹlẹ-sọ ọ̀ fị kọnma-a anịẹrẹsị ọ̀ lọkọlọkọ mẹ sime ala-a.

²²Ori ò ḅii ḅara kẹ ye nyana ḅinma wararị ogbo, ọ̀ kụrọ-kụrọ ḅio sọ ḅa; mịẹ ḅẹ ọkụ ofori kụrọ mamgba ḅo ori ọgọnọ gbana ḅa

²³Kẹ mịẹ tẹ ò furo ḅin-jịkịjịkị, Tamụnọ ọ̀ ḅalafama ịganị fịrịma ọ̀ ḅụụ ḅio suu ḅa tẹ anị kẹ ori ọgọnọ sara ḅa ò fịye mẹ wẹrịtẹ sime-ḅara.

²⁴Ikulele ọmụgbinye ḅụ ọ̀ mangị-so ḅa; gbọrụ ojo okuro-ḍiein ọ̀ kpịra tolu ḅa.

²⁵Ini anị nụnụm tẹ anị ori oju ḅio pịọnị paka-ḅom, pịọ-pịọtẹ sanịarị anga mẹ, ọ̀ pụmbụra ḅụ paka-ḅom; tẹmẹ-naịn-naịn nwẹnị ḅo ori ọgọnọ gbana.

²⁶Kịtịpụtẹ-furu-minji sime ori ngọ koko ayọ ma koruarị, kịnị ofuro-a fịnị ọ̀ dọkịma guluguluma ḅa; ori akpụrụ-warị ḅio kọn ye, kọn ye dọkị fama ḅa.

²⁷So ma ọ̀ mịẹ-irima ye mẹ mịẹfinji ḅa tẹ tomikiri mẹ saakị tẹ ori na tụḅụrụ ḅa.

²⁸Ọ̀ warị ḅio sime-aị mamgba in dogi-so ḅa; Tamụnọ ịganị eneḅaka mẹ ḅụ in arị fọnọ-so ḅa.

²⁹Mie tomḅọ ḅe ḍiekiri, Tamụnọ sụa oloko ḅụ sime ọ̀ pịrị kiri.”