Read kalabari Jobu 23 Bible Online

Jobu 23 - kalabari bible

Jobu 23

¹Anịtẹso Jobu nwẹnị pakịrị:

²“Mịmgbaa sọ ì ḍuko-sụaye mẹ akụarị mịẹ tẹ ì iningi mẹ ḅụ sọ ọ̀ ḅara iku wararị

³yei, mgbe à paa ọ̀ ḍọkị-ẹrị ḅẹ anga nimi namịna, mịẹ tẹ à paa ḅo ọ̀ lẹgịye mẹ la kụma!

⁴Arị ị̀ ḅẹrẹ kẹ ọ̀ tọrọkọ koroma ḅa, tẹ ḅịḅị-dama-aị kẹ ị̀ ḅịḅị ḅinma ḅa.

⁵Arị ọ̀ kẹ ị̀ pakịrị ḅẹ ye naa ḅa, tẹ ọ̀ kẹ ị̀ ḅẹẹ ḅẹ ye fie ye naa ḅa.

⁶Ọ̀ ḅọrọ ọ̀ kụrọ mẹ gburo-gburo la ḅara kẹ ị̀nịna ye-nụnụa ḅẹ? Ẹn-ẹn, ori ì poki ḅa.

⁷Karakara tomḅọ inetẹ anịjụ ori na ḅẹrẹ-ḅiya ḅa anịsakị ị̀ ḅẹrẹkọnḅọ ḅe à mịẹ ye ofori ḅara kẹ ị̀ wẹrịso gbamaso na-iḅim,

⁸Ḍikii à mẹnjị tọrọkọ mu kụma, anịjụ ori ofori; tẹ arị ọḅụ da kụma, arị inetẹ ori emi ḅara tọnma nimi-a;

⁹ere-ḅara anga ḅụ arị ọ̀ ḍọkịm, kụma arị ori ẹrị-a; à nwẹnị pịkị ama-ḅara da sọ arị inetẹ ori ẹrị-a.

¹⁰Kụma ori à mẹnjịarị etela mẹ nimi wararị ori ị̀ daaḍiki sakị sakị, à golu paka-ḅo ḅara paka-ḅo ḅa.

¹¹Ọ̀ ḅụọ sịẹma akiri ma ḅụ arị ị̀ ḅụọ sịẹma tẹ; à tọrụ-pịkị jen anga da-a ḅara kẹ ori etela koko tẹẹ

¹²Ori aḅịḅị-ḅọkọ ḅẹ oloko mẹ ḅụ à ḅụụ sikima-a; arị ọ̀ ḅịḅị ḅẹ ẹkwẹn-aḅịḅị ma kẹ ngọ sọma koko tẹ ì ekpe ḅio ḅụ.

¹³Kụma ori anie ḍima ḍima-a ḅọ, anịsakị tụḅọ inetẹ ọ̀ pịkị ḅẹ? Ọ̀ mịẹ ḅẹ ḅii ye mẹ mie ọ̀ mịẹarị ye.

¹⁴Kẹ gotẹ ọkọ ḅẹẹarị, ọ̀ mie ị̀ pịrị ḅẹ tọn ye mẹ ori anị mịẹ busunuma ḅa anịsakị ọkọ sime tọnwa aị ò ḅioḅẹngbọ emii

¹⁵Anịẹrẹsị, à tẹmẹ-naịn-naịn nyanam ọ̀ tọrọkọ ḅụ; à kẹ ḅiokoroma sakị ḅiokoroma sakị, à ḅalafa nyanarị ọ̀ ḅụụ ḅụ.

¹⁶Tamụnọ mịẹ tẹ ì ḅioḅẹngbọ naịn-ḅọrọ tẹ; Kụrọmamgba Nyanaḅọ ḅe ị̀ tẹmẹ-naịn-naịnma tẹ;

¹⁷kẹ gotẹ ọkọ ḅẹẹarị, kanakana ì ikelema-korom, tẹ kịtịpụtẹ-furu-minji ị̀ tọrụkuḅu gbaịnm.”