Read kalabari Jobu 26 Bible Online

Jobu 26 - kalabari bible

Jobu 26

¹Anịtẹso Jobu nwẹnị pakịrị:

²“Ị́ tọ-ḅara sime-ḅara kẹ ḅarasụa oriḅe tẹ kụrọ nyana-a ḅọ ḅe pịrị tẹ! Ị́ tọ-ḅara sime-ḅara kẹ ịnyọ nyana-a ḅara kọngọ mẹ ḅọrọma tẹ!.

³Ị́ tọ-ḅara sime-ḅara kẹ nimi kẹ oriḅe tẹ ye-nimia-ḅọ ḅe toluma tẹ, tẹ tọnwa ḅara kẹ karakara iḅi nimi ḍie-pakama tẹ!

⁴Tụḅọ ḅarasụa kẹ ị́ ẹkwẹn-aḅịḅị kọn tẹ, anịsakị tụḅọ tẹmẹ ị́ ḅụụ ḅụ sime tẹ paka-ḅo tẹ?”

⁵“Suku-ḅio sime sịḅị-kikima-yọ ma sẹkịmam, minji ma na, arị ḅio sime aị na arị na.

⁶Tamụnọ tọrọkọ ḍuḅu mẹ paụ wararị, anịsakị guluguluma gbaịn ye ofori.

⁷Ori ọgọnọ-jụ ḅẹ So-tọrụ mẹ sụn-pakamam ye ofori anga mẹ ḅụ tẹ kiri mẹ kẹ gberie-sọ ọgọnọ sololo-a.

⁸Ori akpakpa sọ tẹ kpiti so ma ḅio, minji ma ọlọ gbolomam tẹ kpiti So-tọrụ mẹ sọ puu-a arị suku-ḅio ḅụ.

⁹Ori akalụ mẹ tọrụkuḅu mẹ gbaịnm tẹ ò kpiti So-tọrụ mẹ kẹ anị ḅụ sụn saḅamam.

¹⁰Bele na kanakana na ogboku ḅụ, ori ejikila mịẹ-pakamam minji mẹ ọgọnọ ḅụ.

¹¹Ò ḍiki-ịganị ḅụ, so mẹ ḅẹ ḅeriaị ma ḅụụ-gbiripum, tẹ jikem.

¹²Ọ̀ kụrọ ḅụ ori opu tọrụ mẹ deinmam; ò yefieye naa ḅụ ò Rehabụ ḅaam

¹³Ò ḅịḅị ḅẹ fẹrụ mịẹ tẹ So ma tọrụ-gbẹm; ori ḅarana mangị-soarị oronwi ḅe ḅaam.

¹⁴Ḍikii, ma aị ma anie ọ̀ kụrọ mẹ ḅẹ iḅoma; anịsakị ḅeri-ḅio wa ọ̀ ḅụụ naarị aị ma, tọ-ḅara sime ịrụ kọn! Kụma tụḅọ inetẹ ọ̀ kụrọ mẹ ḅe so-alagba fie ye naa ḅẹ?”