Read kalabari Jobu 30 Bible Online

Jobu 30 - kalabari bible

Jobu 30

¹Kụma tomi tẹ yẹrị ḍin kẹ nẹngị apụ mịọkụ ị̀ kẹ kpọọ tii-arị; inima tẹ mgbe à ḍapụ ḍiki-sima tẹ mininitẹ ini ị̀ anana ogbo ma ḍikiḍikiarị obiri ma na sọ tẹ sime ḅịa apụ.

²Tomi tẹ kụrọ ḅụụ ḅụ so tẹ apụ ma, arị ịna aḅara ḅẹ ịnyọ ḅụ inetẹ tọ sọye fị ḅẹ?

³Mịẹ ḅẹ ọkụ ofori na, ḅuru-pọkọtarị kụrọ-ḅara na ḅụ ịn sịkị tẹ fatẹ samụnọ kiri kụngrụm;

⁴Ịkpa mẹ ḅio ḅẹ asịn ma ịn nwẹn soku-soku fịm, jen-a jen-a ọfịnye sịn mẹ ḅẹ ḅẹlẹ-a akuno ma sọ ịn fịm.

⁵Tomina ogboku ḅụ ini in dee pakamam; oloku furuḅọ pịrị ḅara kẹ ini oloku ịn pịrịm.

⁶Minji sịkịrịma pakama wararị ḅẹ ogilolo ma na, kiri mẹ ḅio ḅẹ ịḅụkụ ma na ịkụ ma ḅẹ aị ma na ḅio ini anga nyanam.

⁷Nangị asịn ma suku ịn sịḅịḅio pikiri ḅara kẹ kobirim, tẹ piri ma ogboku, owu kịka ḅara kẹ olokum.

⁸Gbọrụ sakị anyị ḅio kẹngẹ wararị ye-nimia kụn nyana apụ ini ịn fomu pakama tẹ ama mẹ ḅụ.

⁹Tẹ mịọkụ à ḅo ịna nume sọ tẹ yẹrị anie ịn kẹ egberi gbaa ḅẹrẹ ḍukoarị.

¹⁰Ini ị̀ sịkịm, ini ị̀ ḅụụ ịna aḅụụ ḅelemam; ini ị̀ ẹrị tẹso ọkụma, ịn ḅụụ ọlọ-a ḅara kẹ fịla ngumam.

¹¹Kẹ gotẹ ọkọ ḅẹẹarị, Tamụnọ ì ḍigi mẹ fima tẹ ị̀ iderima tẹ, ịn ḅarị ị̀ tọrọkọ ịna aḅụụ ọlọ-a.

¹²Ị̀ ama ḅara anga ì fomu ḅẹ tomina-ogbo mẹ saakịm, ini ì dee mangịmam, ịna kịnị ḅaa etela ma ịn nwẹn koroma ị̀ pịrịm.

¹³Ini ị̀ kala etela kikim, ini ị̀ ḅụụ-fụka mịẹ ḍụḅamam, gbọrụḅọ-sọ ịn dasịẹma-a.

¹⁴Gbala ye kaan finji wararị anga ḅụ ịn sọ ḅom tẹ kaan-sara wararị aị ma ogboku ini mbelembele ma ḅom.

¹⁵Tẹmẹ-naịn-naịnma-aị pịkị ḅo ị̀ gbaịn tẹẹ; fẹrụ mẹ ye dogi ḅara kẹ ini ị̀ kụn dogi ḅẹ ḍukam, tẹ ì lolo mẹ kpiti-so ḅọrọ ḅara kẹ ḅọrọ so tẹ.

¹⁶Anịsakị mịọkụ ị̀ tẹmẹ ì ḅio ḅụ ọsụ sara tẹẹ; ḅụụ-fụka ene ma ị̀ ọlọ sịẹma tẹẹ.

¹⁷Ḍin mẹ ị̀ mgbe ma fụkamarị, tẹ ị̀ kụngụrụarị fụka mẹ ịnyọsara-a.

¹⁸Ye kẹ kịnị lama ḅara anị nwẹn kẹ ị̀ kapa kobiri ọlọm ì elemu kapa pọkọ ị̀ fịna ḅara kẹ anị ị̀ ọlọ-sịẹmam.

¹⁹Tamụnọ mie ị̀ kẹ ḅụụ-fụka mẹ ḅio suu ye, tẹ à ḅo ḅụọ-kuḅu na, ọpọ ḅio ḅẹ afọn na sọ tẹ yee.

²⁰Àrị owu ị́ pịrịm Yei Tamụnọ, kụma ị́ ị̀ pakịrị-a, à saakị sịẹsimem, kụma ị́ tọrụ pịkị ì ḍiki-a.

²¹Í ye kẹ tomḅọ mịẹ ḅụụ-akụma ḅara pịkị ị̀ da tẹ; tẹ ị́ ḅara ḅẹ ịnyọ kẹ ḅaa-ḅọkọ kẹ ị̀ ḍọkị tẹ.

²²Fẹrụ mẹ ọgọnọ ḅụ ị́ ị̀ saakị-gelemam, tẹ ị̀ mịẹ tẹ àrị anị ọgọnọ dọkụm, tẹ erise mẹ ḅẹ fie ḅio ị́ ị̀ ḅakụ ikele-ikelem.

²³Inn à nimi wararị mịnẹ ị́ ị̀ kẹ ḅo fịị ḅio suu ḅa na tọọn koro ḍumo wararị apụ mamgba pịrị warị mẹ na

²⁴Anịsọ ye ḅụụ ḅụ si ḅọ ḅụụ ḅụ si aị ma ogbo-ḅio mḅọ ḅara sụn-pakama, tẹ ḅụụ-fụka ḅio ḅụ ḅarasụa gotẹ owu-owu-a mọ?

²⁵Anị ḅọ ḅe tẹ ene ḅụụ ḅụ kụrọ-kụrọ ḅọ ḅe arị owu ọ̀ pịrị-a? Ị̀ tẹmẹ ḅioḅu kẹ igoinḅọ ḅe pịrị-a?

²⁶Kụma à tọrụ kẹ iḅiye ḍiki sakị, siye ḅom; tẹ à bele koru sakị kanakana mie ḅo ye

²⁷Ị̀ ḅioḅẹngbọ ḅụụ-fụka ḅụ emi, tẹ gbala-gbala gbene-sime-a; ḅụụ-fụka ene ḅo-ḅo ị̀ na bịamarị.

²⁸À kurukurutẹ mẹnjị ma-ḅọrọarị, kụma ịrụa mẹ ì kurukuruma-a; à kobiri-ogbo ḅio saakị-saakị tẹ ḅarasụa gotẹ owuarị.

²⁹À ḅo tuu iyimbere na okpo ikiaḅọ na sọ tẹẹ.

³⁰Ì oju apara nwẹnị pịkị kurukuru tẹ ị̀ ḅụụ sara, tẹ ọfịrị nwẹnị ị̀ mgbe ma dọkịma.

³¹Ị̀ ọbọ pịkị ḅo kururu ye sọ tẹ, tẹ ì ofuro ye mẹ ḅo inima tẹ owuarị apụ pọkọ fie tẹẹ.