Read kalabari Jobu 34 Bible Online

Jobu 34 - kalabari bible

Jobu 34

¹Anịtẹso Elihu nwẹnị ḅẹẹ:

²“Ì ẹkwẹn-aḅịḅị naa ọmịnị Ye-nimiapụ tẹ ḅeri-tokoloma ị̀ daa, ọmịnị ma tẹ ye-nimi wararị apụ.

³Kẹ gotẹ ọkọ ḅẹẹarị, ḅeri ẹkwẹn-aḅịḅị pekele-ḍikiarị, ḅẹlẹ ọgọnọ mẹ fịye ḅẹlẹ ḍiki ḅara.

⁴Yee wa kuraye mẹ sẹlẹ-ọkị; yee wa wamịna ogboku iḅiye tọn pẹlẹ.

⁵Kẹ gotẹ ọkọ ḅẹẹarị, Jobu ḅẹẹm, ‘À mịẹ ye ofori, tẹ Tamụnọ sime ị̀ pịrị karakara ọkị-so tẹẹ;

⁶sime ị̀ pịrị karakara mẹ nakara, ini ị̀ kẹ iruoḅọ kịẹn tẹẹ; oloko kan-a ḅara ḅụ ị̀ la ye mẹ sọ, gwọ gwọ-a ye sọ tẹẹ.’

⁷Jobu ḅọrọ tọ-ḅara sime tomḅọ, tẹ kombo kẹ minji ḅuu ḅara ḅuuarị,

⁸tẹ si mịẹ apụ na ogbo sọ tẹ mẹnjịarị, tẹ si-sịḅịḅio-sụapụ na mẹnjịarị?

⁹Gbala ọ̀ ḅẹẹarị, ‘Anị mịẹ tomḅọ pịrịarị gbọrụ sọye sọ ofori mịnẹ ori gotẹ Tamụnọ ḅụụ tọrụ-ḅẹlẹ ḅẹ ye.’ ” Elihu piki ḅẹẹm:

¹⁰“Ọkọẹrẹsị ọmịnị yefieye naarị atomi, ọ́ naa, mịnẹ Tamụnọ si-sịḅịḅio-sụarị ḅẹẹ ye mẹ, gbala-gbala paka ma; mịnẹ Kụrọmamgba Nyanaḅọ ḅe mịẹ-irimarị ḅẹẹ ye mẹ, paka ma.

¹¹Kẹ gotẹ ọkọ ḅẹẹarị, tomḅọ kọrịnama wẹrịtẹ sime-ḅara mie ọ̀ kẹ ọ̀ gbẹẹ ḅarịye, anịsakị ori etela ma wẹrịtẹ sime-ḅara, mie ọ̀ mịẹ tẹ anị ḅo ọ̀ mịẹ tẹ anị ḅo ọ̀ la ḅarị ye.

¹²Karakaraye ḍuko ḅụ, Tamụnọ si-sịḅịḅio-sụa ḅara kẹ ye mịẹ ḅịa anịsakị Kụrọmamgba Nyanaḅọ ḅe karakara ḅẹrẹkọn pịkị-iḅo ḅịa.

¹³Tụḅọ tomikiri mẹ ḍikiḍiki tọn ọ̀ pịrị, anịsakị tụḅọ bebe tomikiri mẹ kẹ ori ọgọnọ gbana?

¹⁴Ọ̀ nwẹnị ọ̀ tẹmẹ mẹ ọkị ọ̀ ḅụụ pịrị, tẹ ori ọwụ mẹ kobiri ọkị ọ̀ ḅụụ pịrị kụma,

¹⁵meni mamgba fịị fa gboloma ḅa, tẹ tomḅọ pịkịma-so fọọn ḍọkụma-mu ḅa.” Elihu paa ẹkwẹnm:

¹⁶Í yefieye naarị ḅẹḅẹ, miemẹ naa; à ḍuko ye mẹ pokii.

¹⁷Karakara ḅẹrẹkọn ḍiki-ḅioḅuarị ḅọ ḅẹrẹtọn ḅẹ? Ị́ ḅẹrẹ-ḅarasii pẹlẹ karakaraye-mịẹḅọ pịkị gburo-gburo wararị ḅọ ḅe pịrị ḅẹ?

¹⁸Oriḅe tẹ “Papaa tomḅọ” kẹ amadaḅọ sịn-arị ḅọ ḅe tẹ “Si-sịḅịḅio-sụa tomḅọ” kẹ opu atomi sịn-arị ḅọ ḅe;

¹⁹oriḅe tẹ aḍụa nyana amadapụ owiapụ-awọmẹ ma pịrị-a ḅọ, anịanịa alaḅọ ḅe kẹ ye sịn igoinḅọ ḅe nẹngị-a ḅọ, inimgba ori aḅara ḅẹ kọrịnama mẹ ẹrẹsị?

²⁰Bẹkẹma paka ḅara ḅụ ịn fịị tẹ ḍin ogbo, tomi ma saakị jike tẹ ịn ḅọrọ-som, anịsakị gbọrụ tomḅọ ḅara sọ opu atomi ma ọkị-so-a.

²¹Anị kẹ gotẹ ọkọ mịẹarị, ori atọrụngbọ tomḅọ etela ma ḅụ emi. Tẹ ori ori amẹnjị-ḅụọ mamgba ẹrịarị.

²²Siye mịẹ apụ amịna ḅụụ ḅọị ḅẹ kpititẹ anịanịa furu-kịtịpụtẹ anga ofori.

²³Kẹ gotẹ ọkọ ḅẹẹarị, Tamụnọ amụ gbọrụ sakị sọ pẹlẹ gbọrụ tomḅọ sọ pịrị-a, ọ̀ tọrọkọ ḅẹrẹkọn mu ḅarị sakị.

²⁴Ye gbela tẹ pekele-ḍiki-a ḅara ọ̀ nwẹn kẹ opu apụ ma kẹ pakịrị-pakịrị puuarị bẹkẹ-ḅara-ḅụ, tẹ jen-apụ kẹ ịna kiri koromarị.

²⁵Mị-ḅara kẹ ịna akọrịnama nimi tẹso, kụma, ḍin ḅụ ori ịn pịkị-tungbom, tẹ ịn gbẹẹ kọsịmam.

²⁶Tomina tọrụ ogbo ḅụ, ori ịna si-sịḅịḅio gotẹ ịn fomum,

²⁷gbala ini ò ḍukamẹnjị ḅụ pịkị jen anga dam, tẹ ori etela ma ḅẹ gberie-sọ kẹ ḅarị ye-sịn-a ẹrẹsị.

²⁸Anieḅụ ịn mịẹ tẹ igoin-apụ ma owu mẹ ọ̀ ḍọkụma-ḅom, tẹ ọ̀ ḅụụ-fụka ḅụụ ḅụ simearị apụ ma owu naam.

²⁹Tụḅọ inetẹ ò gbọsime wararị sakị ḅụ ye kẹ ori ọlọ ḅẹ? Tụḅọ inetẹ ori ọ̀ tọrụ ḅọị wararị sakị ḅụ mu ò ḍiki ḅẹ, anị ḅọrọ gbọrụ opu sịẹ-o, anịanịa gbọrụ tomḅọ-o?

³⁰Mịnẹ tamụnọ nimi-a tomḅọ ama-da na-iḅi-a; mịnẹ ò ḍiein tuu tomi ma pịrị na-iḅi-a.

³¹Kẹ gotẹ ọkọ ḅẹẹarị, Tamụnọ ḅẹẹ tẹ ḅọ emi, “À fomu-ḅara daa lama tẹẹ; à ḅarị jen-maaịn kẹ ị́ ịganịma ḅịa.”

³²“Àrị ẹrị-a aị kẹ ì tolumaa; à mịẹ-irima tẹ ḅẹḅẹ, à ḅarị jen-maaịn kẹ anị mịẹ ḅịa.”

³³Ori anị tẹrẹmẹ ị́ na iḅi ḅẹ ḅara kẹ ị́ gbẹẹ ḅẹ, ị́ anị sịkịm ẹrẹsị? Kẹ gotẹ ọkọ ḅẹẹarị, ị́yẹrị mie sẹlẹ nyana ye, yẹrị-yaa; ọkọẹrẹsị í nimi ye mịẹfinjii.

³⁴Yefieye naa atomi ị̀ ḅẹẹ ḅa, anịsakị ye-nimi atomi ma tẹ ị̀ naa apụ ḅẹẹ ḅa:

³⁵Jobu ye-nimia ḅara kẹ ẹkwẹnm, ori ẹkwẹn-aḅịḅị ma ḅio nimi ofori.

³⁶Mimgbe Jobu pekele-ḍiki mu kunoma la namịna! gbala si-sịḅịḅio-sụa atomi ye pakịrị ḅara, mie ò ye pakịrịarị ḅara.

³⁷Kẹ gotẹ ọkọ ḅẹẹarị, ọ̀ sịḅị-kụrọ kẹ ò si ḅụ sụam, ọ̀ wamịna ogboku ori aḅara farịm, tẹ Tamụnọ ḅụụ si-ẹkwẹn si-ẹkwẹn kọnm.