Read kalabari Jobu 37 Bible Online

Jobu 37 - kalabari bible

Jobu 37

¹Miemẹ ḅụ sọ ḅioḅẹngbọ mẹ ḅalafa ḅụ sẹkịmarị, tẹ anị ḅẹ sime kiri ḅụ ḍosi paka-ḅoarị.

²Ọ̀ pọkọ mẹ ḅẹ so-alagba mẹ poki, na ọ̀ ḅịḅị ḅụ ḍụrụkụ paka-ḅoarị aị ma na.

³Ọ̀ mịẹ tẹ anị bebe So mẹ suku-ḅio mamgba mum, tẹ ọ̀ ḅalapụ-so mẹ tomikiri mẹ ḅẹ ịkọlị ma lam.

⁴Anị ḅọrọ tẹso, ọ̀ pọkọ ekirem; ori ori ama-da opu pọkọ kẹ so-alagba tẹịn ḅara tẹịnm, tẹ ịn ọ̀ pọkọ naa sakị, ọ̀ ḅalapụ-so ma dasịẹma-a.

⁵Tamụnọ ḅụụ-gbiripuma ḅara kẹ ọ̀ pọkọ kẹ so-alagba tẹịn ḅara tẹịn-arị gburo-gburo aị tẹ wa inetẹ nimi ḅịa aị ọ̀ nwẹn mịẹarị.

⁶Kẹ gotẹ ọkọ ḅẹẹarị, ori eene-mgbọ mẹ ḅẹẹm: Kiri mẹ ọgọnọ sara-a; tẹ nwẹịn-nwẹịn eene mẹ ḅẹẹm: Kụrọma koroo.

⁷Ò tomḅọ goḅọ-goḅọ ḅara fịnam, mịẹ tẹ tomi mamgba ọ̀ kọrịnama nimi ḅẹ ḅara.

⁸Anịtẹso piri anama ma ịna ịnyọsara anga sọ-mum, tẹ ịna ịḅụkụ ma ḅio simem.

⁹Erise afẹrụ ma suku-jụ mẹ ḅụ ḅom, anị sakị jimtẹ-oḅoku mẹ ọgọnọ-jụ mẹ ḅụ ḅom.

¹⁰Tamụnọ sararị ọwụ mẹ ḅụ mie minji oḅoku kpoo tẹ kụrọ tẹ paka-ḅoarị, anịsakị finjima wararị minji mie fọnya oḅoku kpooarị.

¹¹Ò minji kalịye kẹ kpiti lamatẹ So-tọrụ mẹ pisimarị; kpiti aso-tọrụ ma ọ̀ ḅalapụ-so mẹ gala-galamarị.

¹²Ịn pịkị ikelema-ikelemam ori etela kẹ ịn ḍiearị ḅara ḅụ, mịẹ tẹ ọ̀ tọn ịn pịrị aị mamgba mịẹ ḅẹ ḅara, tomikiri tọrụ anga na-iḅi anga mẹ ḅụ.

¹³Ọ̀ ḅọrọ datụkụma, anịanịa ori ama, anịanịa ḅẹlẹma gotẹ ọ̀ mịẹ tẹ anị paka ḅoto.

¹⁴Yei Jobu, miemẹ pokii; daasịẹ tẹ Tamụnọ ḅụụ-gbiripuma akọrịnama ma kẹ ḅiokoroma

¹⁵Tamụnọ kẹ ọ̀ tọn ye mẹ tọn arị ọgọnọ gbana ḅara í nimi, tẹ mịẹ tẹ ò kpiti-so mẹ ḅẹ ḅalapụ mẹ ḅịyarị?

¹⁶Mịẹ tẹ kpiti-so ma jen iku jen nẹngị-a ye í nimi, anịḅọ ḅe tẹ nimi ḅụ kara-gbasị wararị ḅọ ḅe ḅụụ-gbiripuma akọrịnama ma?

¹⁷Ị́yẹrị ḅe tẹ suku-jụ ḅẹ fẹrụ mẹ gotẹ tomikiri mẹ dein sakị ḅụ ọgọnọ gbana opu akapa ọfịrịarị ḅọ ḅe,

¹⁸Ị́ inetẹ ò ye ḅara ḍikima So-tọrụ ma finjimatẹ, arị ịn sọọ-sara wararị tẹmẹ-ḍikiye kụrọ-ḅara kụrọ ḅẹ?

¹⁹Wa ḍuko ọ̀ pịrị ḅẹ ye kẹ wa toluma; wa kanakana ḅio emi gotẹ wa inetẹ wamịna ḅẹrẹ tẹlẹma-a.

²⁰Wa ḍuko ọ̀ pịrị ḅẹ mụnọọ, mịnẹ yẹrị ẹkwẹn ḅa, Jene ḅii tẹ ḅọ emi, mịnẹ ini mḅọ sịẹma mẹnị?

²¹Fẹrụ mẹ fie ḅọrọ tẹ bele mẹ ọfịn fịafịama tẹso kụma, mịọkụ tomi ḅarị inetẹ arị ḍiki ḅịa, anị So-tọrụ ma ḅụ ḅịyarị ogbo.

²²Ọgọnọ-jụ mẹ ḅụ mie golu-golu iḅi ebube mẹ paka ḅoarị; Tamụnọ tẹmẹ-naịn-naịnma na-iḅi ama-da opu kẹ ọ̀ ḅụụ gbaịn wararị. Elihu piki ḅẹẹm:

²³Kụrọmamgba Nyanaḅọ ḅe — wa inetẹ ori ẹrị ḅịa; kụrọ na, karakara ḅẹrẹkọn na ọ̀ kan ḅịa, ḅakatẹ karakara ḅụ ò gburo-gburom.

²⁴Anịẹrẹsị, tomi ò ḍiki-ḅalafarị; ḅẹḅọ-ḅẹḅọ amịna soku-ḅẹ kuroma ḅụ ye-nimi kẹ amịna ḅụụ sịn apụ sịn apụ, ori ịn kẹ ye-sịn-a.