Read kalabari Jobu 5 Bible Online

Jobu 5 - kalabari bible

Jobu 5

¹Mịọkụ sịịn, ị́ pakịrị ḅẹ gbọrụḅọ emi? Fịafịapụ ma ḅụụ ị́ tọrụ-pịkị daa ḅẹ ḅọ emi?

²Tụkụma ḅara ḅụ, ịganị ye-nimia-ḅọ ḅe ḅaa-ḅam; afana, ḅio-sarasara ḅọ ḅe ḅaa-ḅam.

³Ye-nimia-ḅọ ḅe kuno nyanarị tẹ àrị ẹrịm, kụma bẹkẹ-ḅara-ḅụ àrị ori angarị anga worim.

⁴Ori awọmẹ ye ḅụụ laa ḅara sime ḅụ ḅele wararị, ogigo mẹ ḅio ini ịn gbẹẹ-kọsịmam, tẹ ịn ḍụa ḅẹ gbọrụḅọ-sọ ofori,

⁵Ḅuru pọkọ-tarị ḅọ ḅe ò soku fịye fịm, ọ̀ nangị ma ḅio anị ọkị-som, tẹ pọkọ samụnọtẹ ḅọ ḅe ori ngọ ọkị ḅẹ ḅio-sẹsẹm.

⁶Kẹ gotẹ ọkọ ḅẹẹarị, tọrụsiẹrị lịka mẹ ḅụ ḅo-a, ḅụụ-fụka sọ kiri mẹ ḅio so-paka-a;

⁷kụma ḅụụ-fụka ḅio anie ịn tomḅọ iyi yee, fịnị-apumbulo wẹrịtẹ polo iwo ḅara.

⁸Ẹlịfazị Jobu ḅẹẹm: Yẹrị ị́yẹrị kụma, à Tamụnọ ḍọkị ḅa, tẹ Tamụnọ ḅara arị ì etela kẹ sụa ḅa.

⁹Oriḅe tẹ inetẹ ḍọkị nimi ḅịa opu aị mịẹarị ḅọ ḅe, kịẹnkịẹn-ọkụ-ofori ḅụụ-gbiripuma aị mịẹarị ḅọ ḅe.

¹⁰Tomikiri mẹ ọgọnọ ori eene pịrịm tẹ minji kẹ ḍụọ ma ọgọnọ fịrịmam.

¹¹Ini tẹ ideri kiri ḅụ sime apụ ma, ori ịn kẹ gele anga ḅụ koromam, tẹ ini tẹ kururuarị apụ ma, saakị mu ye ḅụụ la-a ḅara wẹrịm.

¹²Ori epele atomi ma tọn aị ma pikirimam, anieḅụ ịna aḅara ma gbọrụ iḅiye sọ mịẹ-a.

¹³Ò ye-nimiapụ ma epele ma ḅụ ini ọkịm; tẹ epele atomi ma mịẹ ḅẹ tọn aị ma fọnya kunomam

¹⁴Eneḅaka ḅụ ịn kanakana na doniam, tẹ ḍin ḅara kẹ eneḅaka-fịafịa-ogbo ḅụ irima-irimam.

¹⁵Kụma ọ̀ ḍaḅọ fịtẹ tụḅọ ḅe ḅọrọmam, ịna ḅịḅị ḅụ, tẹ ngiri-ngiriḅọ ḅe ḅọrọmam opuḅọ ḅe ḅara ḅụ.

¹⁶Anieḅụ igoin-apụ ma ḅiokpọ nyana tẹ, tẹ iri ḅẹrẹkọn aḅịḅị gbaịn tẹ.

¹⁷Ẹlịfazị pịkị Jobu ḅẹẹm: Ḍikii, ḅioḅẹlẹ sime tomḅọ tẹ Tamụnọ ḍiki ịganịḅọ ḅe pịrịm; anị ẹrẹsị Kụrọmamgba Nyanaḅọ ḅe daa-karakarama mẹ ḍiki-sima ma.

¹⁸Ò ye kẹ kịnị lama ḅa, kụma ọ̀ fịna gbaịn ḅa; ò fomu ḅa, kụma ori aḅara gwọ ḅa.

¹⁹Sonio ḅụụ-fụka ḅụ ori ị́ ḍụa-ḅọrọma ḅa; sọnọma ḅụ sọ gbọrụ siye sọ ị́ la ḅịa.

²⁰Ịnụ ḅio ọ̀ fịị ḅụ ị́ ḅọrọma ḅa tẹ ọmụ ḅio okologie kụrọ mẹ ḅụ ị́ ḅọrọma ḅa.

²¹Ḅẹlẹ mẹ ḅẹ fie-sima ḅụ ori ị́ ḅọị ḅa, tẹ ye-sima sakị ḅo sọ, ị́ anị ḍiki ḅalafa-a ḅịa.

²²Ye-sima na, ịnụ na ḅụ ị́ ḍẹrị ḅa, tẹ ḅarị tomikiri ḅẹ anama ma ḍiki-ḅalafa ḅịa.

²³Kẹ gotẹ ọkọ ḅẹẹarị, ị́ ḍụọ mẹ ḅio ḅẹ aḍụḅarị ma na, ogbo sọ ḅa tẹ piri mẹ ḅio ḅẹ anama ma, dein ḅara kẹ ị́nịna sime ḅa.

²⁴Í nimi ḅa mịnẹ ị́ akpụrụ-warị mẹ ye anị la-a, anịsakị í mu ị́ nama ogbo ḍiki ḅa tẹ ye fa ḅịa.

²⁵Ị́ pịkị nimi ḅa mịnẹ tọnwa-apụ ị́ ḅụụ paka-ḅo ḅa, tẹ ị́ ḅụụ so-paka apụ kiri ḅio ḅẹ osuka sime ḅara sime ḅa.

²⁶Í omongi kpọọ tẹrẹmẹ ị́ í ḍuḅu ḍọkụma-ḅo ḅa, sịnmgbọlị anịsakị ḅụ ḅịya tẹrẹmẹ mgbọlị sẹlẹ kiri ḅo ḅara.

²⁷Ḍikii, miemẹ wa nwẹn ḍọkị-pakama-ḅo tẹ, karakara yee. Naa, tẹ í iḅi gotẹ anị nimii.