Read kalabari Jobu 7 Bible Online

Jobu 7 - kalabari bible

Jobu 7

¹Tomikiri ḅụ tomḅọ nyana ye kụrọ fịrị mẹnjị anị-a, tẹ ori ene ma ọkọ-fịrịmẹnjịḅọ ene ma sime-ḅara sime-a?

²Omoniḅọ tẹ sịḅị-kikima-yọ ḍọkịarị ḅọ pembe ḅara, na ọkọ fịrịmẹnjịḅọ tẹ amịna gbẹẹ-ye ḍọkịarị ḅọ sime-ḅara;

³anie à ye ofori ḅara kẹ akalụ-akalụ ḅụ koro-simearị ḅara tẹ sịḅị-kanakanama aḍin ịn nwẹn ḍie ị̀ pịrị tẹ ḅara.

⁴À ḅọlọlọ tẹso, kụma, à ḅẹẹ tẹ, Ḍin mẹ kọkọ ala tẹ, à tọ sakị saakị ḅẹ? Ḅụụ-gbene-a ị̀ ḅụụ ḅaka nwenii ene ḅaa ḅa.

⁵Angule na, muno na, kapa sọ tẹ ì oju-meni mẹ gbaịnm; ì oju-kiri mẹ akpakpa sọm, tẹ pịkị ịwọma gẹẹm.

⁶Ì ene ma fiin ḅịtẹ ḍori-ḅọ ọja nẹngịm, tẹ ḅiokpọ ofori ḅara kẹ arịḅẹ kunoma lam. Jobu ḅẹẹm:

⁷Yei Tamụnọ, kẹ ḅiokoroma mịnẹ ì ḍumo anie ọwụ; ị̀ tọrụngbọ gbala-gbala ḅarị siin iḅi ẹrị ḅịa.

⁸Anị ḅọ ḅe tọrụngbọ mẹ tẹ ị̀ ẹrị ye mẹ, ḅarị jen kẹ ị̀ ẹrị ḅịa; ị́ atọrụngbọ ma ị̀ ḅụụ emi ogbo, à so ḅa.

⁹Kpiti So-tọrụ mẹ sịkịrị tẹ mẹnịma-faa ḅara, mie anịḅọ ḅe tẹ ideri ḍuḅu sọ ḅọ ḅe ḅarị ḅo-a ḅara;

¹⁰ọ̀ ḅarị jen kẹ pịkịma ọ̀ warị ḅo-a, ò sime yọ mẹ sọ ḅarị jen kẹ ò nimi-a.

¹¹Anị ẹrẹsị arị ị̀ ḅịḅị gbaịn wẹrị ḅịa; ị̀ tẹmẹ ḅẹ fụka ye mẹ ḅụ arị ẹkwẹn ḅa; à nyana tẹmẹ akụ ḅụ à ye ḍuko sụa ḅa.

¹²Yẹrị ḅọrọ opu tọrụ mọọ, anịanịa owu-ẹḅẹkẹlẹḅa tẹ ị́ kịnị kẹ koroma tẹ ì ẹbị ḅẹ?

¹³Ì monoye ì ḅio kpọma ḅa, ị̀ ḅọlọlọ anga ì ḍuko-sụaye mẹ mịẹ sarasarama ḅa à nwẹn ḅẹẹ sakị,

¹⁴anịrẹ ị́ nwẹnị ḍawọ kẹ ị̀ ḅalafama, tẹ ịkịan kẹ ị̀ tẹmẹ-naịn-naịnma,

¹⁵mịẹ tẹ arị ì mgbe ma sẹlẹ-ọkị ḅẹ nakara à fangala ḅaa na, fịị na sẹlẹ-ọkị ḅẹ ḅara.

¹⁶Àrị ì ḍumo mẹ ḍiki-simam; à ḍumo gbamaso ḅịa. Ị̀ wẹrịso à koro-sime, kẹ gotẹ ọkọ ḅẹẹarị, í ene ma anie ọwụ. Jobu ḅẹẹm:

¹⁷Tomi anie tiye tẹ í opu ḅara kẹ ịn ḍikiarị, tẹ í ḅioḅẹngbọ kẹ ịna ọgọnọ gbanarị,

¹⁸tẹ dede-ḅio goyegoye mu-mu toluma ịn ḍikiarị, tẹ sakị goyegoye ḅụ ịn da-da ḍikiarị?

¹⁹Ị́ ì ḍiki nwenii mu tọ sakị la tẹ tọrụ siin ḅa, anịanịa ị̀ wẹrịso tẹ à koro-sime nwenii arị ị̀ fịla mẹnị ḅẹ?

²⁰À nwẹnị si mịẹ kụma, à tiye kẹ ị́ mịẹ, ị́yẹrị tomi ẹbị ma ḅọrọarị ḅọ? Í tiegotẹ ị̀ kẹ í elekima mịẹarị? À tiegotẹ ḅụụ-palịmaye sọ ị́ pịrị tẹ?

²¹Í tiegotẹ ì mịẹ-irima wẹrịso-a, tẹ ị̀ karakara-a mẹ saakị sin-a? Kẹ gotẹ ọkọ ḅẹẹarị, mịọkụ à mu kiri mẹ ḅio koro-sime ḅa; Ị́ ị̀ ḍọkị ḅa, kụma à ḅarị paka ḅịa.