Read kalabari Jobu 8 Bible Online

Jobu 8 - kalabari bible

Jobu 8

¹Jobu ẹkwẹn fama tẹso, Bilidadị Suha ḅẹ ḅọ ḅe nwẹnị pakịrị:

²“Ịya! Ị́ paa mịna aị ma ḍuko mu tọ sakị la ḅẹ tẹ ị́ ḅịḅị ḅẹ ẹkwẹn-aḅịḅị opu fẹrụ sọ mu tọ sakị la ḅẹ?

³Tamụnọ, ọ̀ karakara ḅẹrẹkọn pịkị-iḅo-ḅo? Anịanịa Kụrọmamgba Nyanaḅọ ḅe karakaraye mẹ pịkị-iḅo-ḅo?

⁴Ị́ awọmẹ ọ̀ ḅụụ si mịẹ tẹ ḅẹḅẹ, ori ịn ḅọrọma mu ịna mịẹ-irima kụrọ mẹ ḅio suu tẹ.

⁵Ị́ nwẹnị Tamụnọ ḍọkị ḅa, tẹ Kụrọmamgba Nyanaḅọ ḅe ḅara ye ḅii ḅarị ḅẹḅẹ,

⁶ị́ yori-yoritẹ karakaram ḅẹḅẹ, anịrẹ tụkụma ḅara ḅụ, ori amịna ḅụụ saakị ị́ pịrị ḅa, tẹ sime ị́ pịrịtẹ í sime ḅarị anga kẹ ị́ gbẹẹ ḅa.

⁷Anịsakị, suku-saakị ḅụ ị́ ịrụm ḅẹsọ, í kunoma ene ma gburo-gburo lama ḅa.” Bilidadị pịkị ẹkwẹn Jobu pịrịm:

⁸Àrị ị́ tẹkẹm, iḅere-iḅerea kụra-ḅio ḅọrọtẹ asakị ma gbela nimi; tẹ ḍapụ ma ḍọkị-ẹrị tẹ aị ma kẹ ḅiokoromaa;

⁹kẹ gotẹ ọkọ ḅẹẹarị, wamịnị anie ḅịẹịn ḅẹ awọmẹ, tẹ gberie-sọ nimi-a apụ, gbala tomikiri ḅụ wamịna ene ma anie ịrụa ḅio ḅẹ tẹmẹ.

¹⁰Ịn ye kẹ í toluma tẹ ye ḍuko ị́ pịrị, ḅịa, tẹ ịna ye fie ye naa ḅụ, ẹkwẹn pakama-ḅo ḅịa?

¹¹Ịn kẹ papịrọsị sịn ịnya ḅẹlẹ tẹ tarị ịn kẹ ḍiri kẹẹ abịlala pakịrị mẹ, opou lịka ofori anga anị inetẹ so-paka ḅẹ? Minji ofori anga anịḅẹ ịmụnụmụnụ mẹ inetẹ brebrema so-paka ḅẹ?

¹²Arị paa fịlawa sụa wararị tẹ amụ pẹlẹ koro-a ogbo, arịḅẹ sịn, ḅẹ sịn tọrọkọ tarị kpatụarị.

¹³Anị ḅara anie inima tẹ Tamụnọ kẹ ḅioḅọrọma apụ mamgba kala etela sime-ḅara; Tamụnọ nimi-a ḅọ ḅiokpọ mẹ fịị fa ḅa.

¹⁴Ọ̀ ḅiokpọ kaan-kọsịm, tẹ ò ḅioḅẹngbọ kẹ gbana ye anie olokongoḅa warị.

¹⁵Ori ọ̀ warị ḅụ sịrẹrẹm, kụma anị sịẹsime-a; ori anị dasịẹmam kụma anị daasịẹ-a,

¹⁶Ịrụa mẹ ḅio ò brebrema so-pakam tẹ ọ̀ ḅụụ so-paka aị ma wasama ọ̀ ḍụọ gbaịnm.

¹⁷Ori akuno kpoli wararị aḍụḅarị ma fịnamam; ịkụ ma ogboku ḅụ ori angam.

¹⁸Ori ò sime anga ḅụ sime tẹ fị-fịị, anịrẹ anị ò pịkị ḅa tẹ ḅẹẹm, Gbala-gbala amụ àrị ị́ ẹrị-a.

¹⁹Ḍikii, miemẹ anie ori etela mẹ ḅẹ ḅioḅẹlẹ; anịsakị kiri mẹ ḅio jen-apụ paka-ḅo ḅa

²⁰Ḍikii, Tamụnọ ḅịḅị ḅụụ la-a tomḅọ sịkị ḅịa, anịanịa siye mịẹarị apụ ma aḅara mịẹ kụrọma.

²¹Anịsọ ọ̀ ḍẹrị kẹ ị́ ḅịḅị ḅinma ḅa, tẹ oloku kẹ ị́ ḅịḅị aḅọkọ ḅinma ḅa.

²²Í ḍiki-ḅioḅu apụ ma, ḅụụ-jịrị ịn gbaịn ḅa tẹ si-sịḅịḅio-sụapụ ma akpụrụ-warị mẹ ḅarị jen kẹ sime ḅịa.