Read kalabari Devidi-Anume 115 Bible Online

Devidi-Anume 115 - kalabari bible

Devidi-Anume 115

¹Ị́yẹrị kịngẹ, Yei KỊNỊNYANAḄỌ, ị́yẹrị kịngẹ — wamịnị-a — mie ebube sime pịrị na-iḅi ḅọ, í kuno-a ḅẹlẹma mẹ na ḅioḅẹngbọ kẹ ị́ ḅụụ ḅụ gbana na-iḅim mẹ ẹrẹsị.

²Tomikiri ḅẹ asịẹ ma tiegotẹ wa gbelarị, “Ọmịna Tamụnọ ḅe ọ̀ tọ-anga emi?”

³Wamịna Tamụnọ ḅe ò So-ḅio emi; ọ̀ ḅụụ ḅẹlẹ ye ḅẹlẹ ye mie ọ̀ mịẹarị.

⁴Ini kẹ Tamụnọ sịn-arị aị ma tomi ḅara kẹ golu na seleḅa na kẹ mịẹ aị.

⁵Ịn ḅịḅị nyana wararị, kụma ini inetẹ ẹkwẹn-a, ịn pịkị tọrụngbọ nyana wararị, kụma ini inetẹ ye ẹrị-a.

⁶In ḅeri nyana wararị, kụma ini inetẹ ye naa-a, pịkị nini sọ, kụma ini inetẹ fụrụye naa-a.

⁷Ịn ḅara nyana wararị, kụma ini inetẹ ḅara kẹ ye lama-a, pịkị ḅụọ sọ, kụma ini inetẹ mẹnjị-a. Ini inetẹ ḅịḅị fie-a.

⁸Yee arị mịẹ tẹ arị kẹ ḅiokpọmarị apụ mamgba ḅo ịn tẹmẹ mḅudu ma sọ tẹ ịn kịka.

⁹Ọmịnị Izirẹlịapụ, Ọ̀ KỊNỊNYANAḄỌ ḅe kẹ ḅiokpọma. Ori mie ḅarasụa ọ̀ pịrị tẹ ọ̀ gbaịn-arị.

¹⁰Ọmịnị Tamụnọ agbamịẹapụ, ọ̀ KỊNỊNYANAḄỌ ḅe kẹ ḅiokpọmaa. Ori mie ḅarasụa ọ̀ pịrị tẹ ọ̀ gbaịn-arị.

¹¹Ọmịnị-mgba tẹ sunsin ọ̀ pịrịarị apụ, ọ̀ KỊNỊNYANAḄỌ ḅe kẹ ḅiokpọmaa. Ọ̀ ḅarasụa ọ̀ pịrị tẹ ọ̀ gbaịn-arị.

¹²KỊNỊNYANAḄỌ ḅe wa kẹ ḅiokoromarị, tẹ ọ̀ wa boma ḅa; ori Izirẹlịapụ ma boma ḅa pịkị Tamụnọ agbamịẹapụ mamgba sọ.

¹³Ọ̀ kụn-arị ḅọ kụn-arị ḅọ, ori mḅọ boma ḅa, opu na kala na gbọrụ ḅara mẹ.

¹⁴Yee KỊNỊNYANAḄỌ ḅe awọ kẹ ọ́ pịrị, ọmịnị na ọmịna furo-ḅẹ-apụ na!

¹⁵Yee KỊNỊNYANAḄỌ ḅe ó boma, So na Kiri na tẹmẹḅọ ḅe!

¹⁶So mẹ sime Tamụnọ ngẹrị pịrịm, kụma Kiri mẹ ọ̀ kẹ tomḅọ pịrịm.

¹⁷Fịtẹ-apụ KỊNỊNYANAḄỌ ḅe tokini tokini-a, ideri-mu kịnị yaụ-simearị anga mẹ la tẹ gbọrụḅọ-sọ ò tokini-a.

¹⁸Kụma, wamịnị ḍumo wararị apụ ma, ịmịẹtẹ kẹ ọ̀ ḅẹ ḅa mịọkụ na ḅẹẹ-sakị ḅẹẹ-sakị na. Ọ́ KỊNỊNYANAḄỌ ḅe tokinii!