Read kalabari Devidi-Anume 118 Bible Online

Devidi-Anume 118 - kalabari bible

Devidi-Anume 118

¹Ọmịnị ịmịẹtẹ kẹ KỊNỊNYANAḄỌ ḅe ḅẹẹ, ori iḅim ẹrẹsị, tẹ ọ̀ ḅẹlẹma mẹ sime-gbamasom.

²Yee Izirẹlịapụ ma ḅẹẹ, “Ọ̀ ḅẹlẹma mẹ sime gbamasom.”

³Yee Tamụnọ agbamịẹapụ ma ḅẹẹ, “Ọ̀ ḅẹlẹma mẹ sime gbamasom.”

⁴Yee sunsin ọ̀ pịrịarị apụ mamgba ḅẹẹ “Ọ̀ ḅẹlẹma mẹ sime gbamasom.”

⁵Ì opu tọrụsiẹrị ḅụ à KỊNỊNYANAḄỌ ḅe sịnm; ori ị̀ ḅịḅị ọkị tẹ ị̀ pakama-ḅom.

⁶KỊNỊNYANAḄỌ ḅe ị̀ na emi, à ḅalafa ḅịa; tụḅọ inetẹ tiye kẹ ị̀ mịẹ ḅẹ?

⁷KỊNỊNYANAḄỌ ḅe anie ḅarasụa ị̀ pịrịarị ḅọ, tẹ àrị ẹrị ḅa mịnẹ owu si kẹ ị̀ tọn apụ ma ḅara si tẹ.

⁸KỊNỊNYANAḄỌ ḅe kẹ ḅiokpọma, iḅi tomḅọ ḅụ sịrẹrẹ nẹngịm.

⁹KỊNỊNYANAḄỌ ḅe kẹ ḅiokpọma, iḅi tomina sịḅịdapụ ḅụ sịrẹrẹ nẹngịm.

¹⁰Si kẹ ị̀ tọn tọnwa-apụ ì ikelema-korom; kụma KỊNỊNYANAḄỌ ḅe kụrọ ḅụ àrị ịn ḅaa gulugulumam!

¹¹Ini ì ikelema-korom anga, anga ḅụ; kụma KỊNỊNYANAḄỌ ḅe kụrọ ḅụ àrị ịn ḅaa gulugulumam!

¹²In ḅo ì gbori ḅara akama ọkụ, kụma ala-a ịn dọkị faam, nangị fịnị ḅio dọkị ḅara KỊNỊNYANAḄỌ ḅe kụrọ ḅụ àrị ịn ḅaa gulugulumam.

¹³Ịn ḅalafama ḅara kẹ owu kẹ ị̀ paka tẹ ị̀ nẹngịma simem, kụma KỊNỊNYANAḄỌ ḅe ḅarasụa ị̀ pịrịm.

¹⁴KỊNỊNYANAḄỌ ḅe ị̀ kụrọma tẹ à kụrọ-sịẹm; ori ị̀ ḅọrọma tẹ.

¹⁵Ọ̀ Tamụnọ atomi ma akpụrụ-awarị ma ḅio ịn kọn-arị owu-ḅara-iḅi ḅioḅẹlẹ oloku ma pokii: “KỊNỊNYANAḄỌ ḅe opu kụrọ mẹ anị kọrịm!

¹⁶Ọ̀ kụrọ owu-ḅara-iḅi ọkị-ḅo wa pịrịm — ori opu kụrọ mẹ ọmụ ḅio!”

¹⁷À fịị ḅịa; anie nakara, à ḍumo tẹ KỊNỊNYANAḄỌ ḅe kọrị tẹ ye mẹ ḍuko wasama ḅa.

¹⁸Ori ikutẹ ḅara kẹ fomu-ḅara kẹ ị̀ pịrịm, kụma ọ̀ ḍụkụ tẹ à fịị-a.

¹⁹Tamụnọ-warị mẹ ḅẹ ogigo-aḅọkọ ma finji ị̀ pịrị; à sọ mu tẹ ịmịẹtẹ kẹ KỊNỊNYANAḄỌ ḅe ḅẹ ḅa!

²⁰Mie KỊNỊNYANAḄỌ ḅe ogigo-ḅọkọ mẹ; karakaraye-mịẹapụ kịngẹ mie inetẹ anị ḅio sọ mu ḅarịye.

²¹KỊNỊNYANAḄỌ, àrị í tokiniarị, ị́ ị̀ naam ẹrẹsị, í owu-ḅara-iḅi kẹ ị̀ pịrị tẹ ẹrẹsị.

²² Warị nama apụ ma ye ḅụ ofori ḅara kẹ sịkị ḍụḅarị mẹ ḅo arịmgba ḅụ kụrọ nyana tẹịn ye sọ tẹ.

²³Miemẹ KỊNỊNYANAḄỌ ḅe kọrịm; anị ḍiki kụma kpọma ḅụụ-buamam!

²⁴Mie KỊNỊNYANAḄỌ ḅe owu-ḅara-iḅi nyana ene mẹ; ó yee wa ḅioḅẹlẹ, ó yee wa tii.

²⁵Wa ḅọrọmaa, KỊNỊNYANAḄỌ, wa ḅọrọmaa! Yei KỊNỊNYANAḄỌ, mịẹ tẹ wamịna amịẹaị wamịnị na iḅi!

²⁶Yee Tamụnọ, KỊNỊNYANAḄỌ ḅe ẹrẹ ḅụ ḅoarị ḅọ ḅe boma! KỊNỊNYANAḄỌ ḅe Warị mẹ ḅio wa sime tẹ í bomarị.

²⁷KỊNỊNYANAḄỌ ḅe anie Tamụnọọ; ori iḅi ḅara kẹ wamịnị na mịẹ tẹ. Ọ́ sịn aḅara ọlọ-ọlọ tẹ alalị mẹ saakị fị, tẹ nwẹnị mẹnjị agbamịẹ-anga mẹ ikelemaa.

²⁸Ị́yẹrị anie ị̀ Tamụnọ; àrị ịmịẹtẹ kẹ ị́ ḅẹẹarị, àrị í opu ḍuko wasama ḅa.

²⁹Ọmịnị ịmịẹtẹ kẹ KỊNỊNYANAḄỌ ḅe ḅẹ, ori iḅim ẹrẹsị, tẹ ọ̀ ḅẹlẹma mẹ sime gbamasom.