Read kalabari Devidi-Anume 129 Bible Online

Devidi-Anume 129 - kalabari bible

Devidi-Anume 129

¹Izirẹlị, ḍuko wa pịrị, si kẹ ị́ tọn apụ ma wẹrịtẹ ḅaa-ḅọkọ kẹ ị́ ḍọkị tẹ ḅara, ị́ asambịrịma sakị kụra-ḅio.

²“Ị̀ asambịrịma sakị kụra-ḅio, si kẹ ị̀ tọn apụ ma kụrọ-ḅara kẹ ḅaa-ḅọkọ kẹ ị̀ ḍọkị tẹ, kụma amụ ini ị̀ nẹngịma-a.

³Ini ì oḅukulo fomu kọsịma tẹ pokolo, pokolotẹ ịnọ pakamam, tẹ mịẹ tẹ anị nwẹnị ye ḍiḅi ḅẹ tẹ soku yaka-yakama tẹ kiri kịka.

⁴Kụma KỊNỊNYANAḄỌ, karakaraye-mịẹḅọ ḅe, ị̀ pakama-ḅo tẹẹ omoni ḅara-ḅio.”

⁵Yee Zayọnị ḍiki-ḅioḅuarị ḅọ goḅọ-goḅọ owu-ḅara-sii nyana tẹ ini mḅọ dee pịkị.

⁶Yee inimgba warị isun ọgọnọ so-pakarị osuka kịka, anie tẹrẹmẹ anị inetẹ gburo-gburo samụnọarị ye mẹ,

⁷gbọrụḅọ-sọ anị kobiri kobiri-a, anịanịa kẹ poku-poku fịna tẹ dogi-so.

⁸Gbọrụḅọ sọ mẹnjị-ḅọrọarị tẹ ịn ḅẹ ḅịa, “Yee KỊNỊNYANAḄỌ ḅe ó boma! KỊNỊNYANAḄỌ ḅe ẹrẹ ḅụ wa ó bomarị.”