Read kalabari Devidi-Anume 2 Bible Online

Devidi-Anume 2 - kalabari bible

Devidi-Anume 2

¹Tomikiri ḅẹ asịẹ ma tiegotẹ kọngọ kụrọma ḅẹ aḅẹrẹ-ḅiyarị? Tomi tiegotẹ sọye mịẹ ịn pịrị ḅịa aḅẹrẹ-ḅiyarị?

²Ịna amadapụ ma ịn ḍụkụ ḅịa ḅẹ amịẹaị mịẹarị, ịna ḅẹrẹtọn apụ ma sịḅị gboloma tẹ ḅẹrẹ-ḅiya KỊNỊNYANAḄỌ ḅe pịrịarị, pịkị ori sẹlẹ pakama-ḅo amadaḅọ ḅe na.

³Ini mẹẹ, “Ó yee wa ịna ḅẹrẹtọn suku-ḅio paka so, ó yee wa ịna fịna ḍiki ḅụ fima so.”

⁴KỊNỊNYANAḄỌ ḅe So-ḅio ori emine ọgọnọ lẹgị tẹ ịn ḍẹrịarị tẹ ịn tọn-arị papaa aị ma komboarị.

⁵Ọkọẹrẹsị ori ịganị kẹ ịna aḅeri nụnụarị tẹ owi ịganị kẹ ịna tẹmẹ-naịn-naịnmarị.

⁶Ori mẹẹ, “Zayọnị, ị̀ fịafịa tụndụ mẹ ọgọnọ àrị ama-da ị̀ pịrị ḅẹ ḅọ tọn pakama tẹ.”

⁷Amadaḅọ ḅe ḅẹẹm, “À KỊNỊNYANAḄỌ ḅe ḍuko ye mẹ ḍuko wasama ḅa. Ori ị̀ ḅẹm, ‘Ị́yẹrị ì owiḅọtụḅọ, mịmgba à ḅo ị́ ḍa sọ tẹẹ.

⁸Ḅii, tẹ à tomikiri ḅẹ asịẹ mamgba kẹ ị́ pịrị ḅa; bebe tomikiri mẹ í nye sọ ḅa.

⁹Í ikulele mkpara kẹ ịn fomu kọsịma ḅa; ị́ ịn ḅaa gẹrẹ-gẹrẹma ḅa, aḅaịn-ḅẹlẹ ḅaa gẹrẹ-gẹrẹma ḅara.’ ”

¹⁰Amadapụ, mịọkụ ọ́ mị ḅeri nụnụ ẹkwẹn mẹ pokii; Ọmịnị tomikiri ḅẹrẹtọn-arị apụ, ó miemẹ ḍawọọ;

¹¹Ọ́ ḅalafa ḅụ fịrịmẹnjị KỊNỊNYANAḄỌ ḅe pịrịị;

¹²Ọmịnị oju sẹkịma mu ọ̀ tọrọkọ iḅoo; ọkọ-a kụma ori ịganị ala-a saakị ḅa, tẹ ó ḅiotọn-a sakị kẹ fịị ḅa. Ḅioḅẹlẹ sime ọ̀ ḍọkụma-ḅo tẹ ọ̀ gbaịn-arị apụ ma pịrịm.