Read kalabari Devidi-Anume 33 Bible Online

Devidi-Anume 33 - kalabari bible

Devidi-Anume 33

¹Ọmịnị karakaraye-mịẹapụ mamgba ọ́ KỊNỊNYANAḄỌ ḅe kọrị tẹ aị gotẹ olokuu ḍereku ḅụ: ọmịnị ọ̀ ḅịḅị pokiarị apụ mamgba, ọmịnị ò tokinii.

²Ọmịnị ọbọ farị-farị tẹ kẹ KỊNỊNYANAḄỌ ḅe tokinii: Ọmịnị iboli-ọnụnụ ma kẹ su ò bomaa.

³Ọmịnị ịwọ nume-su ò bomaa: ḅara-ḍịn tẹ ḅọ ọbọ mẹ farị, tẹ ó ḍereku kẹ olokuu!

⁴KỊNỊNYANAḄỌ ḅe ẹkwẹn ma karakaram: anịsakị ori akọrịnama mamgba ḅụụ ḅụ sịrẹrẹ na-iḅi aị famam.

⁵KỊNỊNYANAḄỌ ḅe karakara ye na inoma ofori ye na ḅẹlẹmarị: ò kuno-a ḅẹlẹma mẹ tomikiri mẹ ḅin wararị.

⁶KỊNỊNYANAḄỌ ḅe tọn tẹ So ma tẹmẹm: ịrụa mẹ na akalụ mẹ na, lolia ma na sọ ori ẹkwẹn ḅụ tẹmẹm.

⁷Ori opu atọrụ mamgba kobiri ḅo gbọrụ anga kuromam; ọ̀ nwẹnị abajị mẹ ḅẹ pokolo ayọ ma kẹ ḅio, ḅio ḅụ ịkasị wẹrị.

⁸Tomikiri mẹmgba KỊNỊNYANAḄỌ ḅe ḍiki-ḅalafaa; ọmịnị tomikiri ḅẹ apụ mamgba ọ̀ kụn!.

⁹Ori ẹkwẹn sakị tomikiri mẹ tẹmẹm: ori tọn tẹ ye goyegoye tolu-pakam.

¹⁰Tomikiri ḅẹ asịẹ ma mịẹ ḅẹ tẹ kẹ ḅiotọn aị ma KỊNỊNYANAḄỌ ḅe ḍụkụ tẹ arị sịẹsime-a: ori ini ọlọ-sịẹma tẹ ịn ḅarị ịn tọn aị ma mịẹ-a.

¹¹Kụma ori tọn aị ma sịẹsime mu ḅẹẹ-sakị ḅẹẹ-sakị laarị: ori tọn tẹ mịẹ ḅẹ aị ma sime gbamasoarị.

¹²KỊNỊNYANAḄỌ ḅe kẹ amịna Tamụnọ ọkị tẹ sịẹ mẹ ḅioḅẹlẹ sime anị pịrịm: ori sẹlẹ ọkị tẹ kẹ ori atomi sọma tẹ apụ ma ḅioḅẹlẹ sime ịn pịrịm!

¹³KỊNỊNYANAḄỌ ḅe So-ḅio sime tẹ ḍiki iderimarị: tẹ tomikiri simearị tomḅọ goḅọ-goḅọ ẹrịarị.

¹⁴So-ḅio ò sime tẹ ḅẹrẹtọn-arị anga mẹ ḅụ: ò tomikiri angarị apụ mamgba ḍikiarị.

¹⁵Ori mie in kuromarị aị kẹ ịna ḅioḅẹngbọ suuarị: tẹ ịn mịẹarị ye goyegoye nimi wararị.

¹⁶Gbọrụ amadaḅọ sọ mḅọ nyana kụrọ tẹ ọmụ-ogbo ḅụ ḅọrọ tẹ owu-ḅara-iḅi nyana-a: ọmụḅọ mḅọ ịnyọ ḅụ ḅọrọ tẹ jen ọmụḅọ nẹngịma-a.

¹⁷Ọmụgbin-asụ kẹ owu-ḅara-iḅi nyana ḍọkị mẹ, anie papaa ye: ịna opu ịnyọ ma inetẹ kịnị ḅọrọma ḅịa.

¹⁸KỊNỊNYANAḄỌ ḅe ọ̀ ḅịḅị pokiarị apụ ma ḍikiḍikiarị: ini ma tẹ ò kuno-a ḅẹlẹma mẹ kẹ ḅiokpọmarị apụ ma.

¹⁹Ọ̀ fịị ḅụ ịn ḅọrọmarị: ḅuru-ḅa ḅụ ọ̀ mịẹ tẹ in ḍumo tọrọkọ muarị.

²⁰Wa KỊNỊNYANAḄỌ ḅe kẹ ḅiokpọmarị: ori wa gbaịn ḅọ, pịkị ḅarasụa wa pịrị ḅọ.

²¹Ori ẹrẹsị wa ḅioḅẹlẹarị; wa ọ̀ fịafịa ẹrẹ mẹ kẹ ḅiokpọmarị.

²²KỊNỊNYANAḄỌ, yee í kuno-a ḅẹlẹma mẹ wamịnị na sime: wa ị́ kẹ ḅiokpọmarị ḅara ḅụ.