Read kalabari Devidi-Anume 35 Bible Online

Devidi-Anume 35 - kalabari bible

Devidi-Anume 35

¹KỊNỊNYANAḄỌ, ị̀ na tụḅụrụarị apụ ma na tụḅụrụụ: owu kẹ ị̀ pakarị apụ ma na sọ!

²Í ekpeke na owuna-aị na ọkị: tẹ ḅo ị̀ pụkọ-pakamaḅoo ịna aḅara-ḅio.

³Ị́ ḅẹkẹrẹ na í kumbu na saakị gelema ì ḍukarị apụ ma da: Ị̀ ḅẹ ị́ ị̀ ḅọrọma ḅa.

⁴Yee ị̀ ḅaa ḅẹ ḍọkịarị apụ ma owu kiri ḅịkị tẹ ḅụụ-jịrị! Yee ḅẹrẹ-ḅiya ị̀ pịrịarị apụ ma pịkị ọḅụ da tẹ pikiri-pikiri!

⁵Yee ịn fẹrụ kẹ fiin soarị samụnọtẹ asịra kịka: anie KỊNỊNYANAḄỌ ḅe enjẹlị in ḍukarị sakị!

⁶Yee ịna etela kpiti, pịkị sịnịnị: KỊNỊNYANAḄỌ ḅe enjẹlị in fomu gbin-arị sakị!

⁷Gotẹ ọkọ mịẹ-mịẹ ḅọkọ ofori ḅara ḅụ ini ḍiein tuu ị̀ pịrịm: ịn pịkị pokolo tẹ olulu soku ị̀ pịrịm à ḅịkị sọ ḅẹ ḅara.

⁸Kụma amụ in nimi-a ogbo fịị-faa ḅo in kuun-sịẹma ḅa: ini tuu ḍiein mẹ ini ọlọ tẹ ịn ḅịkị tẹ fịị gulugulu ḅa!

⁹Anịtẹso KỊNỊNYANAḄỌ ḅe mịẹ tẹ ì ḅioḅẹlẹ ḅa; à ḅioḅẹlẹ ḅa ori ḅe ị̀ ḅọrọma tẹ ye mẹ gotẹ.

¹⁰Àrị ì ḅioḅẹngbọ mamgba kẹ KỊNỊNYANAḄỌ ḅe ḅẹ ḅa, “Ị́ kịkaḅọ ofori. Ị́yẹrị anie kụrọ ḅọ ḅe ḅụ ịnyọ nyana-a ḅọ ḅe gbaịn-arị, pịkị igoin ḅọ ḅe gbaịn-arị ò ponomarị ḅọ ḅe ḅụ.”

¹¹Si atomi ḅẹrẹ ḍuko ị̀ sịḅị sịn-arị: à ḅụụ ḅụ gberie-sọ nimi-a ye mie in ḍuko ị̀ ọgọnọ gbanarị.

¹²In si kẹ ị̀ gbarị à mịẹ iḅi ḅụ, ì ḅioḅẹngbọ gbọrsịḅị kan sara tẹ à koro-simearị.

¹³Kụma ini obi sakị arị ono ịnwaịnm; fịye sọ à kẹ ḅịḅị lama-a: àrị ị̀ sịḅị-tuu iderima tẹ tẹkẹm,

¹⁴à tẹkẹ ì ikiaḅọ anịanịa ị̀ mịnaḅọ pịrịarị ye ọkụ. À tọrụ-tuu tẹ ḍụẹịn ḍuu ḅara kẹ mẹnjịm, amịna iyingiḅọ ḍuuarị ḅọ ọkụ.

¹⁵Kụma ḅụụ-fụka ị̀ la sakị, in ḅioḅẹlẹ tẹ kobiri ḅo ì gbori tẹ ì kombom: jen ama ḅẹ apụ ma ì fomum, dasịẹma-a ḅara mie ịn kẹ ì fomu ye.

¹⁶Ḅụọ ma fịtẹ gbin koro sime wararị ḅọ kombo ḅara mie ịn kẹ ì kombo ye, ịn nwẹnị ḍiki-ḅioḅu ḅara kẹ bio-bioma ì ḍiki.

¹⁷KỊNỊNYANAḄỌ, ị́ tọrụ, tọrụ kẹ mie mẹ ḍiki mu tọ-sakị la ḅẹ? Ini owu kẹ ị̀ paka, paka, pakarị; mịna ọkụkụ ma ḅara-ḅio ị̀ pụkọ-pakamaḅo!

¹⁸Anịtẹso àrị ịmịẹtẹ kẹ ị́ ḅẹ ḅa, ị́ atomi ma kobiri wararị anga ḅụ: àrị í tokini ḅa inimgba tọrọkọ ḅụ.

¹⁹Ḍụkụ tẹ si kẹ ị̀ tọn apụ ma, àrị iruo apụ ma, owu-kiri à ḅịkị ye kẹ ì ḍikiḍiki ḅioḅẹlẹ ma. Ḍụkụ tẹ à mịẹ ye ofori ḅara kẹ ì ḍiki-ḅioḅuarị apụ ma ì kururu gotẹ ị̀ ḍẹrị-ḍẹrịtẹ tọrụ-ḅẹlẹ ma.

²⁰Ini ikiapụ ḅara kẹ ẹkwẹn-a: anie nakara iruo aị mie in kuroma ḅo tẹ kẹ dein ḅẹlẹmarịapụ ma ḅụ ḍukoarị.

²¹Ini oloku-oloku tẹ ị̀ ḅẹẹarị: “Ị́ mịẹ ye wa ẹrịm.”

²²Kụma, Yei KỊNỊNYANAḄỌ, í miemẹ ẹrị tẹẹ. Ọkọẹrẹsị gbọsime ma; ị́ ḅụụ ḅelema tẹ sime ma!

²³Ị́ ḅụụ jike saakị, Yei KỊNỊNYANAḄỌ, tẹ ị̀ ḍụa: ị̀ Tamụnọ, saakị sịẹ tẹ ị̀ ḅịḅị pakịrị.

²⁴Yei KỊNỊNYANAḄỌ, karakara mịẹ ḅọ, à mịẹ ye ofori mẹ ḍuko pakama; ḍụkụ tẹ si kẹ ị̀ tọn apụ ma ì ḍikiḍiki tẹ ḅioḅẹlẹ ma.

²⁵Ḍụkụ tẹ ini ịna aḅụụ ḅẹẹ ma, “Wa ọ̀ fama tẹẹ! Miemẹ kịngẹ mie wa ḅii ye.”

²⁶Yee ị̀ tọrụsiẹrị mẹ ḍikiḍiki tẹ ḅioḅẹlẹarị apụ ma gbọrsịḅị owu-ḅara-sii fama tẹ pikiri-pikiri mẹnjị kọn: yee ọkịarị ini iḅi ị̀ nẹngịm nwẹn ḅẹẹ apụ ma, gbọrsịḅị ḅụụ-jịrị fama.

²⁷Yee ẹrị ḅẹ-ḅiiarị mịnẹ Tamụnọ kẹ ị̀ ọgọnọ gbana ye ofori nwẹn ḅẹẹ apụ ma, ḍereku oloku-oloku tẹ ḅẹẹ, “KỊNỊNYANAḄỌ ḅe opu la ḅara ḍikii! Ye ọ̀ fịrịmẹnjịḅọ ḅe na iḅi ḅara mẹ ọ̀ ḅụụ-ḅẹlẹarị.”

²⁸Anịtẹso àrị ị́ karakara mịẹ mẹ ḍuko wasama ḅa: bebe ene mamgba à kẹ í tokini ḅa.