Read kalabari Devidi-Anume 37 Bible Online

Devidi-Anume 37 - kalabari bible

Devidi-Anume 37

¹Si-sịḅịḅio-sụa tomḅọ ḅe gotẹ ḅụụ-ḅalaḅala ma: afana tẹmẹ sụa kura-aye mịẹarị ḅọ mẹ pịrị ma.

²Ala-a kịnị ḅarị ini ẹrị ḅịa, osuka samụnọ ḅara; kpatụ tẹ asịn fịị ḅara mie ịn fịị ḅarịye.

³KỊNỊNYANAḄỌ ḅe kẹ ḅiokpọma tẹ iḅiye mị; amakiri mẹ ḅụ anga tẹ kpaịn simee.

⁴KỊNỊNYANAḄỌ ḅe ḅụ í ḅioḅẹlẹ ḍọkị; anịsakị ori ị́ tẹmẹ ịgbanịarị aị ma kẹ ị́ pịrị ḅa.

⁵Ị́ ḅụụ saakị KỊNỊNYANAḄỌ ḅe pịrị: ọ̀ kẹ ḅiokpọma, tẹ ọ̀ ḅarasụa ị́ pịrị ḅa.

⁶Ọ̀ mịẹ tẹ ị́ karakara mịẹ mẹ: eneḅaka ogbo ḅẹ ịrụa ḅịya ḅara ḅịya ḅa.

⁷Inema tẹ KỊNỊNYANAḄỌ ḅe koruu, ọ̀ mịẹ ḅa: lọkọlọkọarị apụ ma gotẹ ị́ ḅụụ-fụkama ma, anịanịa amịna si amịẹaị ịn tọn ḅara pakarị apụ ma.

⁸Kiri kẹ ḅalaḅala na ịganị na pịrị ma ị́ ḅụụ ḅio; anị mịẹ ḅarịye jen-a, ị́ kẹ ḅụụ-fụka ḅio suu.

⁹KỊNỊNYANAḄỌ ḅe kẹ ḅiokpọmarị apụ ma amakiri mẹ sime ịn pịrị ḅa: kụma in si-sịḅịḅio-sụapụ ma dee pakama ḅa.

¹⁰Ala-a si-sịḅịḅio-sụapụ ma kịnị ḅarị ini ẹrị ḅịa; í ini ẹrị ḅẹ ḍọkị ḅa kụma ị́ ịn ḍọkị-ẹrị ḅịa;

¹¹ḅụụ lẹgịmarị apụ ma amakiri mẹ ịna nye sọ ḅa: tẹ in ḅioḅẹlẹ kẹ anga ḅa lọkọlọkọ na dein na ḅụ.

¹²Si-sịḅịḅio-sụa tomḅọ ḅe ḅẹrẹ ḅiya iḅi atomi ma pịrịarị: tẹ ḍiki-ḅioḅu ḅụ bio-bioma ò ḍikiarị.

¹³Kụma KỊNỊNYANAḄỌ ḅe si-sịḅịḅio-sụa atomi ma ḍẹrịarị: ò nimi wararị mịnẹ ala-a ini in ḅaa guluguluma ḅẹ ẹrẹsị.

¹⁴Si-sịḅịḅio-sụa apụ ma ịna ogie ma sin-arị, pịkị ịna iboli ma nụnụ kụrọmarị: ịn kẹ igoin-apụ ma na mịẹ ḅẹ ọkụ ofori apụ ma na ḅaa ḅẹ ḅara, kẹ kuraye mịẹarị apụ ma ḅaa siin ḅẹ ḅara;

¹⁵kụma ịna ḅara-kuḅu ḅẹ ogie ma mie ịn ḅaa ḅarịye: tẹ ịna iboli ma anyịma kọsị-sara fama ḅa.

¹⁶Iḅi tomḅọ ḅe nyana kala ye mẹ, si-sịḅịḅio-sụapụ mamgba kọọn sara ngọ ma nẹngị lamam.

¹⁷KỊNỊNYANAḄỌ ḅe si-sịḅịḅio-sụapụ ma ịnyọ siin ḅarị ẹrẹsị: kụma ori iḅi atomi ma gbaịn ḅọrọmarị.

¹⁸KỊNỊNYANAḄỌ ḅe ọ̀ ḅịḅị pokiarị apụ ma kokoarị: tẹ amakiri mẹ ịna nye sọ gbamaso ḅa.

¹⁹Si sakị ḅụ in tọrụsiẹrị ḅịa; ḅuru-ḅa sakị ḅụ ini ini na iḅi ḅẹ ḅara kẹ fịye nyana ḅa.

²⁰Kụma si-sịḅịḅio-sụapụ fịị ḅa; si kẹ KỊNỊNYANAḄỌ ḅe tọn apụ ma ịmaịn-faa ḅa, piri-ḅio-ḅẹ fịlawa ọkụ; kịnị ḅarị ini ẹrị ḅịa, onwin ọkụ.

²¹Si-sịḅịḅio-sụa tomḅọ ḅe gbala-gbala ọ̀ ḅọlọ ye ọ̀ gbẹẹ-gbẹẹ-a: kụma iḅi atomi ma ịna aḅara sarasara lama wararị ye ḍie kịnị pịrị ḅụ.

²²KỊNỊNYANAḄỌ ḅe boma tẹ apụ ma amakiri mẹ sime ịn pịrị ḅa: kụma ò wori tẹ apụ ma ini in dee pakama ḅa.

²³Tomḅọ mẹnjị na-iḅi etela mẹ ḅụ KỊNỊNYANAḄỌ ḅe mie mḅọ datụkụmarị: ọ̀ pịkị ọ̀ ḅụụ-ḅẹlẹ ye mịẹarị apụ gbaịn-arị, ye ịn la ḅịa ḅara.

²⁴Ịn ḅịkị, ḅịkị, ini anịanga gbin koro-sime ḅịa: KỊNỊNYANAḄỌ ḅe ḅarasụa tẹ ịn saakị-sịẹmarị ẹrẹsị.

²⁵Mịọkụ àrị omongi tẹ, à nangwọ sakị kẹ tomikiri anga tẹ: kụma jene-jene amụ àrị ẹrị-a KỊNỊNYANAḄỌ ḅe iḅi tomḅọ kẹ gbin kuroma-so tẹ sakị, anịanịa mḅọ awọmẹ fịye ḅii ma ḅọrọarị anga.

²⁶Ori ḅe sakị mamgba ò ye gbana-a ḅara kẹ ye kẹ ja apụ ḅọlọarị: tẹ ori awọmẹ ma pịkị boma sọ wararị.

²⁷Ọḅụ pịkị siye gbin tẹ iḅiye mị; anịsakị í furo-ḅẹ-apụ sakị mamgba amakiri mẹ anga tẹ;

²⁸kẹ gotẹ ọkọ ḅẹẹarị, KỊNỊNYANAḄỌ ḅe kuraye ḅẹlẹmarị, tẹ Ò minini atomi ma kẹ gbin kuroma so, so-a: ori ịn gbaịn mu ḅẹẹ-sakị ḅẹẹ-sakị laarị, kụma si-sịḅịḅio-sụapụ ma furo ḅẹ apụ ma ini in dee pakama ḅa.

²⁹Amakiri mẹ sime karakaraye-mịẹapụ ma pịrị ḅa: tẹ ini anị ḅio anga mu ḅẹẹ-sakị ḅẹẹ-sakị la ḅa.

³⁰Iḅi tomḅọ ḅe ẹkwẹn ma nimi àrị ḅio emi, tẹ sakị mamgba ọ̀ pịkị jen tomḅọ inoma-a ḅara kẹ ye mịẹarị.

³¹Ori ọ̀ Tamụnọ ḅe oloko mẹ kẹ ò ḅioḅẹngbọ koko wararị: tẹ gbala-gbala anị ḅụ sikima-a.

³²Si-sịḅịḅio-sụa tomḅọ ḅe ẹbịarị, ori iḅi tomḅọ ḅe ḅaa ḅẹ ḅara.

³³Kụma KỊNỊNYANAḄỌ ḅe si kẹ ọ̀ tọn-arị ḅọ ḅe kụrọ ḅara-ḅio ò kuroma so ḅịa: anịanịa ḍụkụ tẹ ini ọ̀ kọn-arị sakị ḅụ ḅẹrẹ ọ̀ ḅara sii.

³⁴KỊNỊNYANAḄỌ ḅe kẹ ḅiokpọma tẹ ọ̀ tọn aị ma kokoo: ọ̀ kụn kẹ ị́ pịrị ḅa amakiri mẹ kẹ ị́ pịrị ḅụ, tẹ ị́ ẹrị ḅa si-sịḅịḅio-sụa ḅọ ḅe ini ò dee pakama tẹẹ.

³⁵Gbọrụ sakị à gbọrụ si-sịḅịḅio-sụa tomḅọ nimim, kụrọ-kụrọ ḅara mịẹ-mịẹ ḅọ; ò gele ḅẹḅọ-ḅẹḅọ nẹngịm, Lẹbanọnị tụndụ ọgọnọ ḅẹ sida sịn-arị gele ḅara;

³⁶Kụma sakị ḅọrọ tẹ àrị anịanga ḅọrọ sakị ọ̀ ḅarị ofori; àrị ori ẹrị ḅẹ ḍọkịm, kụma àrị inetẹ ọ̀ ḍọkị ẹrị-a.

³⁷Kireinma iḅi atomi ma ḍikii, karakaraye-mịẹapụ ma kẹ elekima sụaa; gbala deintẹ atomi anie awọ nyana apụ;

³⁸kụma si-mịẹapụ ma in ye kọnma-a ḅara kẹ ịn ḅaa guluguluma fama ḅa: ịna furo-ḅẹ-apụ ma in ye kọnma-a ḅara kẹ in fama-fama ḅa.

³⁹KỊNỊNYANAḄỌ ḅe karakaraye-mịẹapụ ma ḅọrọmarị; ḅụụ-fụka asakị ḅụ ori ịn gbaịn ḅọrọmarị.

⁴⁰Ọ̀ ḅarasụa ịn pịrị tẹ ịn pụkọ-pakamaḅoarị; si-sịḅịḅio-sụapụ ḅara-ḅio ori ịn ḅọrọmarị, in mu-mu tẹ ori ịn gbaịn-arị ẹrẹsị.