Read kalabari Devidi-Anume 39 Bible Online

Devidi-Anume 39 - kalabari bible

Devidi-Anume 39

¹À ḅẹẹm, “À mịẹ ḅẹ ye ḅụ àrị ẹbị ḅa, tẹ ị̀ ḅẹlẹ mịẹ tẹ à si mịẹ ḅịa ḅara; si-mịẹapụ ị̀ na kpeki wararị ogbo à gberie-sọ ḍuko ḅịa.”

²À yaụ-simem, ẹkwẹn gbọrụmgbọ sọ kọn-a ḅara ḅụ, anị ḅọrọ iḅiye gbolomaye sọ! Kụma ị̀ ḅụụ-fụka mẹ sii tọrọkọ-tọrọkọ mum,

³tẹ ḅụụ-ḅalaḅala nwẹnị ị̀ nẹngịma, à kuroma mu laa anga laa anga, ị̀ ḅụụ-fụka mẹ pịkị owi ọkọ lam; à ḅarị inetẹ inema-a tẹ gbelam:

⁴“KỊNỊNYANAḄỌ, à ḍumo mu tọ sakị la ḅẹ? Tọ sakị à fịị ḅẹ? Ì ḍumo mẹ kunoma ḅẹ sakị gotẹ ị̀ pịrị.”

⁵Í ì ḍumo sakị mẹ mịẹ kpụlụma la ḅiri ḍiki! Ị́ tọrọkọ ḅụ ì ḍumo sakị mẹ ị́ ḅụ gberie-sọ gberie-a: karakaramatẹ ḍumo wararị tomḅọ goḅọ-goḅọ gbọrụ ḅịḅị ḅụ sara pakama ọwụ,

⁶ịrụa ḅịya ye saramatẹ kiri-ḅio tọn-arị tẹmẹ mẹ kịngẹ, ori mịẹarị aị mamgba sọ gberie-sọ gberie-a: ori ngọ kobiriarị, kụma anị ọkị ḅẹ ḅọ ò nimi-a.

⁷Ọkọ kụma, KỊNỊNYANAḄỌ, ndẹẹ ì ḅiokpọmaye? Ị́yẹrị mie à kẹ ḅiokpọmarị.

⁸Ị̀ asi mamgba ḅụ ị̀ ḅọrọma-a: tẹ ḍụkụ tẹ oḅori atomi ị̀ ḍẹrị ma.

⁹À yaụ-sime ḅa, ẹkwẹn gbọrụmgbọ-sọ à kọọn ḅịa: kẹ gotẹ ọkọ ḅẹẹarị, ị́yẹrị mie mịẹ tẹ à mị-ḅara kẹ tọrụsiẹrịarị.

¹⁰Ḅarị jen kẹ ì fomu ma: í ì fomu ḅaa ḅẹ-yearị.

¹¹Tomḅọ asi gotẹ ị́ ò ḍiki-ịganị tẹ ò fomuarị, tẹ akarakaraḅa ye sima ḅara, ị́ ọ̀ ḅẹlẹmarị ye mẹ gulugulumarị. Karakaramatẹ tomḅọ anie gbọrụ sakị kẹ sara pakamarị ọwụ kịngẹ!

¹²KỊNỊNYANAḄỌ, ị̀ tẹkẹ naa, tẹ à kọn-arị owu mẹ pokii, ḅo ḅarasụa ị̀ pịrị owu minji ị̀ tọrụ sararị ogbo: Ì elemu aḍapụ mamgba sime-ḅara ḅụ, yẹrị boowa kala-sakị kẹ ị́ warị bịanḅọ kịngẹ.

¹³Ị̀ wẹrịso à koro-sime, tẹ kẹlẹ ḅioḅẹlẹ nyana: tẹrẹmẹ à mị yọ ḅụ so tẹ ḅarị ofori sakị la.