Read kalabari Devidi-Anume 49 Bible Online

Devidi-Anume 49 - kalabari bible

Devidi-Anume 49

¹Ḅẹḅọ-ḅẹḅọ miemẹ naa! Ọmịnị ḅẹẹ-anga ḅẹẹ-anga simearị apụ mamgba, ó pokii,

²opu na kala na gbọrụ ḅara, ngọ-kọnapụ na igoin-apụ na gbọrụ ḅụ.

³Ị̀ akuroma ma pokolo ḅa; nimi ẹkwẹn mie à kọn ḅarịye.

⁴Egberi-egberi mie à tọrụ kẹ da tẹ gbaa ḅarịye, tẹ ọbọ ḅụ arị fiearị ye ḍuko finji ḅarịye à farịarị ogbo.

⁵Ḅalafamaye sakị ḅụ à ḅalafa ḅịa, si kẹ ị̀ tọn apụ ì gbori wararị sakị,

⁶anie si-mịẹapụ tẹ amịna ngọ kẹ ḅiokpọmarị, tẹ ịn kọn sara opu ngọ kẹ ḅụụ-bomarị apụ ma.

⁷Gbala-gbala gbọrụ tomḅọ sọ inetẹ amịna ḅụụ pakịrị ọkị ḅịa; ori inetẹ ò ḍumo la ye kẹ Tamụnọ gbẹẹ ḅịa,

⁸kẹ tomḅọ ḍumo gbẹẹ ḅẹ ye ḍụḅa ḅakam ẹrẹsị. Ori inetẹ gbẹẹ ḅẹ ye sọ gbala-gbala ḅo ḅịa,

⁹kẹ mịẹ tẹ ọ̀ ḅarị ḍuḅu sọ ḅịa tẹ ḍumo mu ḅẹẹ-sakị ḅẹẹ-sakị la ḅẹ ye.

¹⁰Ḅẹḅọ-ḅẹḅọ inetẹ ẹrị ḅa mịnẹ ye-nimi atomi fịịarị gbọrụ ḅara mẹ anie ye-nimia tẹ apantu atomi ma so fịịarị ḅara. Inimgba ịna ngọ ma kuroma-so ịna furo-ḅẹ-apụ pịrịarị.

¹¹Ịna aḍuḅu ma ḅo ịna sime ayọ sọ gbamaso tẹ; anịanga mie in sakị mamgba sime ḅarịye, karakaraye sakị ḅẹ gbọrụ sakị ḅụ ini ịna ḅara-kuḅu ḅẹ akiri nyanam ḅẹ sọ.

¹²Tomḅọ opu inetẹ mḅọ fịị kiki ḅịa; ọ̀ paa piri-ḅio-ḅẹ anama ma fịị ḅara fịị ḅa.

¹³Amịna aḅụụ kẹ ḅiokpọmarị apụ ma ḅụ pakarị ye ḍikii, anie ịn kọọn sara ngọ gotẹ ọkịarị mịnẹ ye ini na iḅi wararị nwẹn ḅẹẹ apụ ma;

¹⁴in sime fị pịrịm, anana sime fị pịrị ḅara; tẹ fị ḅo in ḍikiḍikiarịḅọ sọ ḅa. Karakaraye-mịẹapụ ma ịn nẹngịma ḅa, anie ịna oju ma sarasarama ḅụrụ-kọsịarị sakị ịna sime yọ mẹ Ḍuḅu ḅio mẹ ḅụ ḅele fa wararị in sime-sime ama mẹ ḅụ.

¹⁵Kụma Tamụnọ ị̀ pụkọ-pakamaḅo ḅa; ori ị̀ ḅọrọma ḅa fị kụrọ mẹ ḅio.

¹⁶Tomḅọ ngọ kọn-arị gotẹ ḅioḅẹngbọ sima, ori ngọ ma ḅaka-ḅaka-ḅakarị sakị sọ;

¹⁷ọ̀ fịịarị sakị ori inetẹ anị kẹ so ḅịa, ọ̀ kọn sara aị ma ori na ḍuḅu sọ ḅịa.

¹⁸Tomḅọ nwẹnị ọkị mịnẹ mịẹ ḍumo mẹ ḅụ ye mḅọ na iḅi fama tẹ, tẹ kịnị anịẹrẹsị mḅọ tokiniarị sọ,

¹⁹mḅọ, mḅọ elemu aḍapụ mamgba ḅụ sọ ḅa fịị ḅụ, anie kanakana sime gbamasoarị anga mẹ.

²⁰Tomḅọ opu inetẹ mḅọ fịị kiki ḅịa; mḅọ paa piri-ḅio-ḅẹ anama ma fịị ḅara fịị ḅa.