Read kalabari Devidi-Anume 66 Bible Online

Devidi-Anume 66 - kalabari bible

Devidi-Anume 66

¹Ọmịnị tomi mamgba, ọmịnị oloku-oloku tẹ ḍereku ḅụ Tamụnọ tokinii!

²Ó nume-su ori ebube ẹrẹ mẹ pịrịị; ebube kẹ ọ̀ pịrị ḅẹ tokini kẹ ọ̀ pịrịị!

³Ọ́ Tamụnọ ḅẹẹ, “Ị́ mịẹarị aị ma ḅụụ-buama ḅara ḍikii! Ị́ kụrọ ḅaka ḅara gotẹ si kẹ ị́ tọn-arị apụ ma ḅalafa ḅụ ị́ tọrọkọ iḅoarị.

⁴Tomikiri ḅẹ tomḅọ goḅọ-goḅọ sunsin ị́ pịrịarị; in nume su-su í tokiniarị; in su-su ị́ ẹrẹ tokiniarị.”

⁵Ó ḅo Tamụnọ mịẹ tẹ ye ḍikii, ọ̀ ḅụụ-buama-aị ma tomina ogboku ḅụ.

⁶Ori tọrụ mẹ ḍima tẹ kẹ kpongbo-kiri mịẹm; wamịna elemu-a ḍapụ nwẹnị ḅụọ kẹ mẹnjị saḅa. Anịanga wa ḍerekum ọ̀ mịẹ ye mẹ ẹrẹsị.

⁷Ori opu kụrọ ḅụ ọ̀ ḅẹrẹtọn mu ḅẹẹ-sakị ḅẹẹ-sakị laarị, tẹ ori atọrụngbọ ma sịẹ-sịẹ ma ọgọnọ emi. Yee kọngọ kụrọmarị apụ saakị tẹ ori na tụḅụrụma.

⁸Ọmịnị sịẹ-sịẹ mamgba, ọ́ wamịna Tamụnọ ḅe tokinii; yee kịnị ọ́ kẹ ò tokiniarị ye naa.

⁹Ọ̀ wa koko tẹ wa ḍumo tẹẹ, ọ̀ pịkị ḍụkụ tẹ wa ḅịkị-a.

¹⁰Tamụnọ, ị́ wa daaḍiki tẹ, seleḅa kẹ fịnị ḅio fọị tẹ anị ḅẹ iḅi paka-ḅo ḅara mie ị́ wa daaḍiki tẹ ḅara.

¹¹Ị́ wa ḍiki-tọrụsin tẹ wa ḍiein ḅio koroarị, ị́ pịkị iku lamarị dogi-aị kẹ wamịna apana ma ọgọnọ gbana tẹ.

¹²Ị́ ḍụkụ tẹ si kẹ wa tọn-arị apụ ma wa nanga ḅọrọarị, wa fịnị ḅio na ẹgẹnẹ-minji ḅio na mẹnjị tolu-ḅọrọm, kụma mịọkụ ị́ wa kẹ ḅo ye wa la ḅịa anga lama tẹ.

¹³À dọkịma-agba-agba kẹ ị́ warị ḅo ḅa; Àrị à minini ye mẹ kẹ ị́ pịrị ḅa.

¹⁴À ḅụụ-fụka ḅio sime sakị à ḅẹẹm à kẹ ị́ pịrị ḅẹ ye mẹ à kẹ ị́ pịrị ḅa.

¹⁵Àrị anana pịrị tẹ ịn kẹ agbamịẹ-anga mẹ ḅụ dọkịma ḅẹ; À nambulo amẹẹ na oḅori amẹẹ na kẹ agbamịẹ ḅa, tẹ onwin mẹ turee-tureema iwo So-tọrụ mu ḅa.

¹⁶Tamụnọ kụn-arị apụ mamgba, ó ḅo pokii, tẹ àrị ọ̀ mịẹ ị̀ pịrịtẹ aị ḍuko ọ́ pịrị ḅa.

¹⁷À ḅarasụa gotẹ owu ọ̀ pịrịm; à nume su-su tẹ kẹ ò tokinim.

¹⁸Àrị à mịẹ asi ma kẹ ye-sịn-a namịna, KỊNỊNYANAḄỌ ḅe ori ì poki-a so tẹ.

¹⁹Kụma karakara-ḅara-ḅụ Tamụnọ ị̀ naa tẹ; ori ị̀ tẹkẹ mẹ poki tẹẹ.

²⁰À Tamụnọ tokiniarị, ori ị̀ tẹkẹ da-sikima-a ẹrẹsị, ò kuno-a ḅẹlẹma mẹ sọ ị̀ ḅụụ ọ̀ dasịẹma-a.