Read kalabari Devidi-Anume 77 Bible Online

Devidi-Anume 77 - kalabari bible

Devidi-Anume 77

¹Àrị oloku pakama tẹ owu Tamụnọ pịrịarị; arị oloku pakama tẹ ori ị̀ naarị.

²Ḅụụ-fụka sakị ḅụ à KỊNỊNYANAḄỌ ḅe tẹkẹarị; bebe ḍin mamgba àrị ị̀ aḅara saakị-gelema tẹ tẹkẹarị, kụma arị inetẹ ḅiokpọmaye ḍọkị-ẹrịa.

³À Tamụnọ kẹ ḅiokoromarị sakị, àrị ẹsịmarị; à Tamụnọ gboloma aị kẹ ì ḅioḅẹngbọ ḅụ pekele ḍikiarị sakị, ì ḅioḅẹngbọ ḅịkịm.

⁴Ọ̀ mịẹ tẹ bebe ḍin mẹ ḅụ mono ị̀ tọrụ sọ-a; à ḅụụ-ḅalaḅala la ḅara ḅụ ẹkwẹn sọ àrị inetẹ ẹkwẹn-a.

⁵À ḅọrọ tẹ ene ma kẹ kuroma ḅụ suuarị, tẹ ala lamatẹ akụra ma ḅẹ aị sọ à kẹ ḅiokoromarị.

⁶Ḍin mẹ à kẹ pokolotẹ kuroma nyanarị; à ye kẹ ì ḅioḅẹngbọ ḅụ pekele-ḍiki, tẹ miemẹ kẹ ị̀ ḅụụ gbelarị:

⁷“KỊNỊNYANAḄỌ ḅe ọ̀ sakị mamgba wa sịkị ḅa aro? Gbala-gbala ọ̀ ḅarị jen kẹ wa ḍiki-ḅioḅẹlẹ ḅịa aro?

⁸Wa ḅẹlẹma ḅụ ọ̀ daasịẹ tẹ? Ò mininiye mẹ ḅarị jen kẹ sịẹ sime-a?

⁹Tamụnọ ori ọkụrụkụrụ nyana kẹ ḅioḅọrọma tẹ? Ori ịganị ọ̀ kịnị ḍiki-sịḅịjịrị mẹ tọrụ-ḍima tẹ?”

¹⁰Anịtẹso à ḅẹẹm, “Ị̀ ịnọ tẹịn-arị ye anie mie: mịnẹ Tamụnọ ḅarị jen kẹ kụrọ nyana-a.”

¹¹KỊNỊNYANAḄỌ, àrị ị́ kọrị tẹ opu aị ma kẹ ḅiokoroma ḅa; ḅọrọ tẹ sakị ḅụ ị́ mịẹ ḅụụ-buama-aị ma à sịn pịkị-ḅo ì ḅioḅẹngbọ suu ḅa.

¹²Àrị ị́ mịẹ tẹ aị mamgba kẹ kuroma ḅụ suu ḅa; àrị ị́ kọrị tẹ opu kụrọtẹ aị mamgba pekele-ḍiki ḅa ì ḅioḅẹngbọ ḅụ.

¹³Yei Tamụnọ, ị̀ mịẹ ye mịẹ ye fịafịam. Gbọrụ Tamụnọ sọ ḅe ḍụḅa ḅara ḍụḅa-a.

¹⁴Ị́yẹrị anie ḅụụ-buama akọrịnama kọrị-kọrị Tamụnọ ḅe; í í opu kụrọ mẹ ḍie-pakamam sịẹ-sịẹ ma ogboku.

¹⁵Ị́ kụrọ ḅụ ị́ ị́ atomi ḅọrọmam, Jekọbụ na Josẹfụ na furo-ḅẹ-apụ ma.

¹⁶Yei Tamụnọ, minji ma ị́ ẹrị sakị arị ḅalafa, tẹ tọrụ mẹ ḅẹ owolo ma jikemam.

¹⁷Oḅuto ma ene ọsụma saram; so-alagba ḍụrụkụm So-tọrụ ḅụ, tẹ pakịrị-pakịrị mamgba ḅụ so ḅalapụma kọrị ḅọrọm.

¹⁸Í so-alagba mẹ ḍụrụkụ ye mẹ wasamam, tẹ so-ḅalapụ ye mẹ pịkị bele kẹ tomikiri mẹ pịrịm; tẹ kiri mẹ jịpụma sọ ḅẹ ḅara kẹ jikem.

¹⁹Ị́ ọnụngọ ma ọgọnọ mẹnjị-tolum; í pokolo tọrụ mẹ saḅa korom, kụma ị́ mẹnjị ḅọrọ tẹ ị́ aḅụọ tọn elekima sọ kịnị ẹrị-a.

²⁰Ị́yẹrị anana-ḍikiḍikiḅọ ḅara kẹ ị́ atomi ma tọrọkọ-sụn, Mozizi na Erọnị na ịn kẹ sịḅịda ḅara ḅụ.