Read kalabari Devidi-Anume 89 Bible Online

Devidi-Anume 89 - kalabari bible

Devidi-Anume 89

¹Yei KỊNỊNYANAḄỌ, sakị mamgba arị í kuno-a ḅẹlẹma mẹ ḅẹ nume su ḅa; à ḅioḅẹngbọ kẹ ị́ ḅụụ ḅụ gbana na-iḅim mẹ ḍuko wasama gbamaso ḅa.

²À nimi wararị mịnẹ ị́ ḅẹlẹma mẹ sime mu ḅẹẹ-sakị ḅẹẹ-sakị la ḅa, mịnẹ ḅioḅẹngbọ kẹ ị́ ḅụụ ḅụ gbana na-iḅim mẹ sime gbamasom, So-tọrụ mẹ sime-ḅara.

³Ị́ ḅẹẹm, “Àrị à sẹlẹ ọkị tẹ tomḅọ ḅe na ọḅọkụ fị tẹẹ; à ye minini ị̀ fịrịmẹnjịḅọ Devidi pịrị tẹ,

⁴‘Í furo-ḅẹ-ḅọ sakị mamgba ama-da ḅa; ị́ ama-da ọrụ mẹ arị anị wẹrị kpaịnma mu ḅẹẹ-sakị ḅẹẹ-sakị la ḅa.’ ”

⁵So ma ị́ kọrịarị ḅụụ-buama-aị ma ḅẹ nume-suarị; KỊNỊNYANAḄỌ, fịafịa apụ ma ḅioḅẹngbọ kẹ ị́ ḅụụ ḅụ gbana na-iḅim mẹ ḅẹ nume-suarị.

⁶KỊNỊNYANAḄỌ, So-ḅio gbọrụḅọ-sọ ị́ kịka-a; So-ḅio ḅẹ apụ ma ḅụ ị́ na gbasị ḅọ ofori.

⁷Fịafịa apụ ma kobiri mẹ ḅụ ini ị́ mangịmarị; tẹ inimgba ị́ tọrọkọ ḅụ ḅụụ ḅaa ḅara kẹ sịẹ wararị.

⁸KỊNỊNYANAḄỌ, kụrọmamgba Nyana Tamụnọ, gbọrụḅọ-sọ opu kụrọ nyana ị́ na gbasị-a; Yei KỊNỊNYANAḄỌ, ye mamgba ḅụ ḅioḅẹngbọ kẹ ị́ ḅụụ ḅụ gbana na-iḅim.

⁹Ị́ ḅẹrẹtọn kụrọ nyana wararị abajị mẹ pịrịarị, anị ḅụ ọnụngọ ḍụrụkụ sakị í deinmarị.

¹⁰Ị́yẹrị Rehabụ, minji ḅio ḅẹ si opu nama ḅe ponoma kọsịma tẹ ọ̀ ḅaam; í opu kụrọtẹ ịnyọ ḅụ í si kẹ ị́ tọn apụ ma mịẹ tẹ owu ịna ḅara siinm.

¹¹So í nye, kiri mẹ sọ í nye; tomikiri mẹ na anị ḅio simearị ye goyegoye na tẹmẹm.

¹²Ị́yẹrị ọgọnọ-jụ mẹ na abajị suku mẹ na tẹmẹm; Tabọ Tụndụ na Hamọnị Tụndụ na ḍereku ḅụ nume-su í bomarị.

¹³Í opu kụrọ mẹ la ḅara ḍikii! Í opu ịnyọ mẹ la ḅara ḍikii!

¹⁴Ị́ ama-da ḅẹrẹtọn mẹ karakara mịẹ na karakara ḅẹrẹkọn na ọgọnọ mie anị sịẹsime wararị; ị́ mịẹarị aị mamgba ḅẹlẹma na ḅioḅẹngbọ kẹ ị́ ḅụụ ḅụ gbana na-iḅim na ḍie-pakamarị.

¹⁵Ini ma tẹ nume kẹ sunsin ị́ pịrịarị apụ ma ịn kpọma ḅioḅẹlẹarị ḅara ḍikii, anie í iḅi-yemịẹ-ḅara ḅụ ḅẹ bele ḅụ angarị apụ ma!

¹⁶Í gotẹ bebe ene mẹ ḅụ in ḍerekuarị ịn pịkị í iḅi gotẹ í tokiniarị.

¹⁷Í opu owu-ḅara-iḅi-ḅi-ḅi kẹ wa pịrịarị; ị́ ḅẹlẹma ḅụ ị́ mịẹ tẹ wa owu-kụrọnịapụ sọarị.

¹⁸Yei KỊNỊNYANAḄỌ, wa gbaịn-arị ḅọ sẹlẹ wa pịrịm; Izirẹlị tẹkẹarị Fịafịa Tamụnọ ḅe, wamịna amadaḅọ kẹ wa pịrịm.

¹⁹Ḍawọ-jụ pembe ḅara ḅụ, alatẹ sakị ḅụ, ị́ ị́ afịrịmẹnjịapụ, ḅioḅẹngbọ kẹ ḅụụ ḅụ gbana na-iḅi apụ ma ḅẹẹm: À ḅarasụa kẹ eresoarị gbọrụ ọmụḅọ pịrị tẹ arị emine mẹ kẹ tomi ma ogboku à sẹlẹ pakama-ḅo pịrị tẹ.

²⁰Àrị ị̀ fịrịmẹnjịḅọ Devidi kẹ amadaḅọ mịẹ tẹ fịafịa olo kẹ ọ̀ sịḅị sara ḅụ.

²¹Ị̀ ịnyọ sakị mamgba ori na sime ḅa, ị̀ kụrọ ọ̀ mịẹ kụrọma ḅa.

²²Gbala-gbala si kẹ ọ̀ tọn apụ ma ọ̀ ḅụụ in ḅii ye nyana ḅịa; si-sịḅịḅio-sụapụ ma owu kiri ọ̀ nẹngịma ḅịa.

²³Àrị owu kẹ ọ̀ paka apụ ma gbẹẹ kọsịma tẹ ò ḍiki-ḅioḅuarị ḅọ goḅọ-goḅọ ḅaa ḅa.

²⁴Àrị ọ̀ ḅẹlẹma tẹ à minini ọ̀ pịrị ḅara mịẹ ḅa; à mịẹ tẹ sakị mamgba owu ọ̀ ḅara iḅi ḅa.

²⁵Àrị ọ̀ daarị anga mẹ ḍụḅama ḅa Mẹdịterenanị abajị mẹ ḅụ ọkị mu Yuferetisi Tọrụ mẹ la.

²⁶Ori ị̀ ḅẹẹ ḅa: Ị́yẹrị ị̀ ḍa pịkị ị̀ Tamụnọ; ị̀ gbaịn-arị ḅọ pịkị ị̀ ḅọrọma ḅọ.

²⁷Àrị ọ̀ kẹ ị̀ tarị owiḅọtụḅọ sọma ḅa, amadapụ mamgba ḅụ tẹịnḅọ.

²⁸Sakị mamgba àrị à minini ọ̀ pịrị ḅara mịẹ ḅa anịsakị àrị ori na fị wararị ọḅọkụ mẹ sime mu ḅẹẹ-sakị ḅẹẹ-sakị la ḅa.

²⁹Ori ama-da ọrụ mẹ sime-gbamaso ḅa So-tọrụ mẹ sime-ḅara; ò furo-ḅẹ-ḅọ sakị mamgba ama-da ḅa.

³⁰Kụma ò furo-ḅẹ-apụ ma ì oloko koko tẹ à tọn kuroma aị ma ḍiki anga-a ḅẹḅẹ,

³¹ini ịn mịẹ ḅẹ tẹ à ḍuko aị ma kẹ ye-sịn-a tẹ à tọn aị ma koko-a ḅẹḅẹ,

³²anị sakị rẹ mie àrị ịna asi gotẹ fomu-ḅara kẹ ịn pịrị ḅarịye; à mịẹ tẹ ịna mịẹ-irima ma ḅụ ịn tọrụsiẹrị ḅa.

³³Anịsọ à ḅarị Devidi ḅẹlẹma-a so ḅịa, anịanịa à minini ọ̀ pịrị ḅara mịẹ-a so.

³⁴Àrị ori na fị wararị ọḅọkụ mẹ à kan siin ḅịa anịanịa à minini ọ̀ pịrịye mẹ ḅẹ gberie ḅụ ḅịḅị ḍima.

³⁵“Àrị ị̀ fịafịa ẹrẹ mẹ ḅụ minini ye mẹ à gbọrsịḅị minini fama tẹ: gbala-gbala arị iruo Devidi pịrị ḅịa.

³⁶Sakị mamgba ori ò furo-ḅẹ-apụ nyana ḅa, tẹ à tọrụ kẹ ọ̀ daarị ama mẹ ḅụ wẹrị ḅa ịrụa paa ḅịyarị sakị goyegoye.

³⁷Anị sime gbamaso ḅa akalụ mẹ sime-ḅara, anie So-tọrụ ḅụ sime tẹ ḅioḅẹngbọ-kẹ-sịrẹrẹ-niḅi ḅẹrẹ-kiri-sime ye sọ wararị ye mẹ.”

³⁸Kụma ị́ ịganị ị́ sẹlẹ ọkị tẹ amadaḅọ ḅe pịrịarị; ị́ ọ̀ ḅụ puu so tẹ ọ̀ sịkị tẹ.

³⁹Ị́ ị́ fịrịmẹnjịḅọ ḅe na fị ọḅọkụ mẹ kan-siin tẹ ori ama-da sun kẹ lịka ḅio gbin tẹẹ.

⁴⁰Ori opu ama mẹ onu ma í sukuruma-gbin tẹ ọ̀ kụrọnị-anga mamgba wẹrịso tẹ arị kan sara simearị.

⁴¹Mẹnjị-ḅọrọarịapụ mamgba ori aị furuarị ori na kpeki wararị asịẹ mamgba ọ̀ ḍẹrịarị.

⁴²Ị́ owu-ḅara-iḅi mẹ kẹ si kẹ ọ̀ tọn apụ ma pịrị tẹ; ị́ mịẹ tẹ inimgba ḅioḅẹlẹ tẹ.

⁴³Ị́ ori owuna-aị ma kẹ ye-ḅụ-sọ-a aị mịẹ tẹ owu ọ̀ ḅara si tẹ ọmụ kiri ḅụ.

⁴⁴Ị́ ọ̀ ḅara ama-da mkpara mẹ ọkị tẹ ori emine mẹ sukuruma kiri gbin tẹẹ.

⁴⁵Ị́ mịẹ tẹ ọ̀ la-a sakị kẹ omongi tẹ ọ̀ tọrụ-tuu tẹ ḅụụ-jịrị ḅụ.

⁴⁶KỊNỊNYANAḄỌ, ị́ ị́ ḅụụ ḅọị gbamaso ḅẹ? Ị́ ịganị mẹ fịnị kọrị ḅara kọrị mu tọ sakị la ḅẹ?

⁴⁷Ì ḍumo kpụlụ la ḅara kẹ ḅiokoroma; pịkị kẹ ḅiokoroma mịnẹ wamịnị-mgba fịị, fịị oju ḅara mie ị́ kẹ wa tẹmẹ ye.

⁴⁸Tụḅọ inetẹ ḍumo tẹ gbala-gbala fịị ḅịa? Ndẹẹ tomi inetẹ ḍuḅu gbarị ḅẹ ḅara?

⁴⁹KỊNỊNYANAḄỌ, tarị-pịrịpịrị-ḅụ ị́ ḅẹlẹma mẹ ḍie pakama pakama aị ma tọ-anga emi? Í minini Devidi pịrị-aị ma tọ-anga emi?

⁵⁰Ịn kẹ yẹrị ị́ fịrịmẹnjịḅọ ḅẹ gulugulumarị ḅara mẹ kẹ ḅioḅọrọma ma, à kẹ oru nimi apụ ma gbo aị na karị aị ma na inema alama tẹ ḅara mẹ.

⁵¹Yei KỊNỊNYANAḄỌ, si kẹ ị́ tọn apụ ma sẹlẹ ọkị amadaḅọ ḅe gulugulumarị! Ò mu anga, mu anga ini ò gulugulumarị.

⁵²KỊNỊNYANAḄỌ ḅe tokini mu ḅẹẹ-sakị ḅẹẹ-sakị la! Amẹnị! Amẹnị!