Read kalabari Devidi-Anume 9 Bible Online

Devidi-Anume 9 - kalabari bible

Devidi-Anume 9

¹KỊNỊNYANAḄỌ, àrị ì ḅioḅẹngbọ mamgba kẹ í tokini ḅa: àrị ị́ mịẹ tẹ ḅụụ-buama-aị mamgba ḍuko ḅa.

²Àrị í gotẹ ḅioḅẹlẹ nume su ḅa. Kụrọ mamgba nyana Tamụnọ, à nume-su tẹ kẹ í tokini ḅa.

³Í tolu-sịẹarị sakị si kẹ ị̀ tọn apụ ma pịkị ọḅụ daarị: ịn ḅịkị-ḅịkị tẹ fịịarị.

⁴Ị́ karakara ḅẹrẹkọn-arị, aḍụa ofori ḅara, tẹ í iḅi ḅẹrẹ-pẹlẹ ị̀ pịrị tẹ.

⁵Ị́ ḅẹrẹ-ḅarasii pẹlẹ oru nimi apụ ma pịrị tẹ si-sịḅịḅio-sụapụ ma ḅaa guluguluma tẹ: kịnị ḅarị jen kẹ ịn kẹ ḅiokoroma ḅịa.

⁶Si kẹ wa tọn apụ ma ịna ḅẹrẹ fa gbamaso tẹ: ị́ ịna opu ama ma guluguluma famatẹ, tomi gbọrsịḅị ịn kẹ ḅioḅọrọma fama tẹ.

⁷Kụma KỊNỊNYANAḄỌ ḅe ama-da gbamasoarị: Ori ọ̀ ḅẹrẹkọn emine mẹ tẹlẹma ḅẹrẹkọn wẹrịma tẹẹ.

⁸Karakara mịẹ mie ọ̀ kẹ tomikiri ḅụ ḅẹrẹtọn-arị: aḍụa ofori ḅara mie ọ̀ kẹ sịẹ-sịẹ ma kọn-arị.

⁹KỊNỊNYANAḄỌ ḅe anie kịnị ponomarị apụ ḅụụ-ḅọị-yọ, ḅụụ-fụka sakị ḅụ ye-ḅụụ-la-a ḅara kẹ sime ḅẹ anga.

¹⁰KỊNỊNYANAḄỌ, í nimi apụ ma ị́ kẹ ḅiokpọma ḅa: ị́ ḍọkụma-ḅo ḅọ ḅo ḅọ ị́ mḅọ kẹ gbin kuroma-so ḅịa.

¹¹Ó nume-su Zayọnị daarị KỊNỊNYANAḄỌ ḅe boma! Ọ̀ kọrị tẹ ye mẹ ḍuko sịẹ goyegoye pịrị.

¹²Tamụnọ tọrụsiẹrịarị apụ ma kẹ ḅiokoromarị: Ori ịna owu kẹ ḅioḅọrọma-a: tẹ ò fomu-ḅara kẹ kura-aye kẹ ịn mịẹarị apụ pịrịarị.

¹³Yei KỊNỊNYANAḄỌ, ị̀ ḍiki tọrụ-kụrụkụrụ! Si kẹ ị̀ tọn apụ ma dogi-ḅo ị̀ pịrịarị atọrụsiẹrị ma ḍiki! Yei KỊNỊNYANAḄỌ, fịị ḅio ị̀ pụkọ-pakamaḅo,

¹⁴tẹ à kpọma-ḅẹlẹmarị Jeruselemu ḅẹ apụ ma tọrọkọ sịẹ tẹ à gotẹ í tokiniarị aị mamgba ḍuko ịn pịrị. À ḍereku ḅa ị́ ị̀ ḅọrọma tẹ ye mẹ ẹrẹsị.

¹⁵Oru nimi apụ ma ini soku olulu ḅio ḅịkị sọ tẹẹ: ini ḅarana tuu ọnya in kun sịẹma tẹẹ.

¹⁶KỊNỊNYANAḄỌ ḅe amịna karakara aḅẹrẹkọn ma ḅụ ọ̀ ḅụụ ḍie-pakama tẹ, tẹ si-sịḅịḅio-sụapụ ma amịẹaị ma ọnya sọ tẹ in kun sịẹma tẹ.

¹⁷Fị sime si-sịḅịḅio-sụapụ mamgba pịrịm, pịkị Tamụnọ sịkị tẹ apụ mamgba sọ.

¹⁸Mịẹḅẹ-ọkụ-ofori apụ ma Tamụnọ sakị mamgba in ḍiki-tọrụ siin ḅịa: igoin-apụ ma ḅiokpọma ye mẹ papaa fa gbamaso ḅịa.

¹⁹KỊNỊNYANAḄỌ, ḅoo! Ḍụkụtẹ tomi ị́ kẹ papaa ye mịẹ ma! Oru nimi apụ ma kẹ ị́ tọrọkọ ḅo tẹ ḅẹrẹ-pẹlẹ ịna ọgọnọ gbanaa.

²⁰Yei KỊNỊNYANAḄỌ, mịẹtẹ ịn ḅalafaa: mịẹtẹ in nimi mịnẹ ini anie papaa fịị-fịị atomi.