Read kalabari Devidi-Anume 90 Bible Online

Devidi-Anume 90 - kalabari bible

Devidi-Anume 90

¹Yei KỊNỊNYANAḄỌ, ị́yẹrị anie ḅụọ-fa-ḅụọ-paka ḅụ wamịna sime-yọ.

²Tẹrẹmẹ ị́ tụndụ ma tẹmẹ anịanịa mịẹ tẹ tomikiri mẹ paka-ḅo tẹ sime, ị́yẹrị sime gbamaso Tamụnọọ, tẹ ị́ Tamụnọ sọ nwenii gbamaso la ḅa.

³Í ḍuko tomḅọ pịrịarị ọ̀ pịkị-ḅo tarị ò sime-ḅara sime; í ò ḍima ḅo fọọn sọmarị.

⁴Ị́ ḅụụ ḅụ kụra maa ẹndẹ oyia asi finji gbọrụ ene kịkarị; gbala ḅịẹịn ọkụ, ḅọrọ so tẹ ye mẹ, ḍin ḅẹ naa-saakị mẹ ḅẹ boowa sakị mẹ ọkụ.

⁵Í opu minji ye fọnọ so ḅara kẹ wa dogi-soarị, wa sime mu laarị sakị mẹ ḍawọ kọn sakị nẹngị-a. Wa dede-ḅio puu-pakarị osuka kịkarị,

⁶anie so-paka tẹ ḅo iḅi ye mẹ, tẹso, ḅoḅiri-so anị kpatụ tẹ fịịarị.

⁷Ị́ ịganị wa ḅaa gulugulumarị; í owi ịganị mẹ wamịna tẹmẹ-naịn-naịnmarị.

⁸Wamịna asi ma ị́ tọrọkọ emi, wamịna ḅọị tẹ asi ma í inetẹ ẹrị ḅa.

⁹Ị́ ịganị wamịna ḍumo-ene ma kpụlụmarị, arị ḅọrọ-soarị ḅeri-ḅio ḅeri-ḅio kọn ẹkwẹn mịẹ ḅara.

¹⁰Wa kẹ tomikiri ḍumo ḅẹ akụra anie tesi oyi finji; wamịna ḅụụ kụrọm ḅẹḅẹ, kụra inia si; anịsọ arịmgba dogi-ḅoarị ḅụụ-fụka na kururu na; ala-a ḍumo mẹ pẹlẹ tẹ wa ḅarị ofori.

¹¹Ḅintẹ ḅara kẹ ị́ ịganị mẹ ḅẹ iku da tẹ ḅọ tụḅọ? Tụḅọ nimi, í owi ịganị mẹ inetẹ dogi-ḅo ḅẹ ḅalafa?

¹²Kẹ wa toluma mịnẹ wamịna ḍumo sakị boowa, mịẹ tẹ wa ye-nimiapụ sọ ḅẹ ḅara.

¹³Ị́ ịganị nwenii mu tọ sakị la ḅẹ? Yei KỊNỊNYANAḄỌ, wamịnị ị́ afịrịmẹnjịapụ ma ḍiki-sịḅị-kụrụkụrụụ.

¹⁴Dede goyegoye í kuno-a ḅẹlẹma mẹ kẹ wa pịrị ḅinmaa, mịẹ tẹ wa ḍumo sime ḅarị ene mamgba ḅụ wa nume su-su ḅioḅẹlẹ ḅẹ ḅara.

¹⁵Wa ḅụụ-fụka da sime akụra ma ḅụ í kururu kẹ wa pịrịm, mịọkụ pịkị ọkọ la ḅioḅẹlẹ kẹ wa pịrịị.

¹⁶Yee wamịnị ị́ afịrịmẹnjịapụ ma í opu kụrọtẹ amịẹaị ma ẹrị, yee wamịna awọmẹ í ebube opu kụrọ mẹ ẹrị.

¹⁷KỊNỊNYANAḄỌ wamịna Tamụnọ, yee ị́ aboma ma wamịnị na sime. Wamịna amịẹaị mamgba ḅụ lolo kẹ wa pịrịị.