Read kalabari Devidi-Anume 91 Bible Online

Devidi-Anume 91 - kalabari bible

Devidi-Anume 91

¹Ḅẹḅọ-ḅẹḅọ tẹ ye mḅọ lama gotẹ KỊNỊNYANAḄỌ ḅẹ ḍọkụma-muarị ḅọ mẹ, ḅẹḅọ-ḅẹḅọ tẹ Kụrọ mamgba Nyanaḅọ ḅe gbaịn wararị ḅọ mẹ,

²inetẹ ọ̀ ḅẹ ḅa, “Ị́yẹrị ị̀ gbaịn tẹ ị̀ ḅọrọmarịḅọ. Ị́yẹrị ị̀ Tamụnọ; arị ị́ kẹ ḅiokpọmarị.”

³Tọrụ ẹrị-a si-aị ḅụ ori ì koko kpaịnma ḅa pịkị kịnị-ḅaaḅa obi ma ḅụ sọ.

⁴Ori amịna apamba kẹ ị́ gbaịn ḅa; ori í ḍikiḍikiarị ogbo ị́ la ḅẹ ye ofori; ḅioḅẹngbọ kẹ ọ̀ ḅụụ ḅụ gbana na-iḅim mẹ ị́ gbaịn tẹ ị́ ḅọrọma ḅa.

⁵Ị́ gbọrụ siye sọ gotẹ ḅalafa na-iḅi-a ḍin ḅụ anịanịa bẹkẹ owu kẹ ị́ paka ḅẹ aị eneḅaka ḅụ,

⁶anịanịa kanakana ḅio kịnị la-la obi, anịanịa eneḅaka ḅụ kịnị-ḅaaḅa si-aị.

⁷Ẹbịsịya kịnị maa ẹndẹ oyia asi finji ị́ akaka fịị sara ḅa, kịnị apuku sọnọ ẹndẹ finji sọ ị́ ikelema-koro ḅụ fịị ḅa, kụma ị́ la ḅẹ ye ofori.

⁸Ị́ tọrụngbọ kẹ ẹrị ḅa Tamụnọ kẹ si-sịḅịḅio-sụapụ ma fomu-fomu ḅara.

⁹Ị́ KỊNỊNYANAḄỌ ḅe kẹ ị́ ḍụaḅọ sọma tẹ, Gele Tẹịnḅọ ḅe anie ị́ gbaịn-arị ḅọ,

¹⁰anie ḅụ gbọrụ siye sọ ị́ ḅụ paka ḅịa kụrọ, kụrọ amịẹaị sọ ị́ sime-yọ kpeki ḅịa.

¹¹Tamụnọ ị́ kẹ ori enjẹlị apụ ḅara sụa tẹ í muarị anga, muarị anga ini ị́ gbaịn ḅa.

¹²Ini ịna aḅara kẹ ị́ ọlọ saakị-gelema ḅa tẹ ḍụkụ tẹ ị́ aḅụọ ḍụḅarị bịan tẹ kọsị ḅịa.

¹³Ị́ nambulo amẹẹ na, ododo amẹẹ na nanga kiri pịrị ḅa, owi lamarị ọkụkụ ma na si ododo amẹẹ na sọ.

¹⁴Tamụnọ ḍukoarị, “Àrị ị̀ ḅẹlẹmarịapụ ma ḅọrọma tẹ yẹrị KỊNỊNYANAḄỌ ḅe nimi apụ ma gbaịn ḅa.

¹⁵Ịn ḅarasụa gotẹ ị̀ sịn sakị àrị ịna ḅịḅị ọkị ḅa, ịn ḅụụ-fụka ḅio sọ sakị, àrị ini na sime ḅa. Àrị ịn pụkọ-pakamaḅo tẹ ịn kẹ kụn nyana kiri ḅụ wẹrị ḅa.

¹⁶À nangwọ ḍumo kẹ ịn pịrị ḅẹ; arị ịn ḅọrọma ḅa.”