Read kalabari Devidi-Anume 94 Bible Online

Devidi-Anume 94 - kalabari bible

Devidi-Anume 94

¹KỊNỊNYANAḄỌ, ị́yẹrị anie si-mịẹḅọ fomu-fomu Tamụnọ; mịẹẹ tomi ị́ ịganị ẹrị!

²Ị́yẹrị tomi mamgba ḅẹrẹkọnḅọ; saakị tẹ ḅụụ-gelema atomi ma gbẹẹ kiri ḅụ in kuroma!

³Si-sịḅịḅio-sụa apụ ma paa ḅioḅẹlẹ nwenii mu tọ sakị la ḅẹ? KỊNỊNYANAḄỌ, nwenii mu tọ sakị la?

⁴Si amịẹaị mịẹ apụ ma paa ḅụụ-gelema nwenii mu tọ sakị la ḅẹ tẹ ịna si amịẹaị ma kẹ ḅụụ-boma ḅẹ?

⁵KỊNỊNYANAḄỌ, ini ị́ atomi ma gbẹẹ kọsịmarị; in sime ị́ pịrị apụ ma ponomarị.

⁶In diapụ-fịtẹ-ereme ma na ḍapụ na iyingi apụ na ofori awọmẹ ma na ḅaarị, tẹ wamịna amakiri mẹ ḅụ angarị kịnị tọrụ-nimi-a apụ ma niniarị.

⁷Ini mẹẹ, “KỊNỊNYANAḄỌ ḅe ọ̀ wamịnị ẹrị; Izirẹlịapụ tẹkẹarị Tamụnọ ḅe ọ̀ kẹ elekima sụa-a.”

⁸Ị̀ atomi, ndẹẹ ọmịnị inetẹ nwẹn sime opu oḅori-sọarị ḅara? Tọ sakị ḅụ ọ̀ ḅọrọ ye ḍawọ ḍin ḅẹ?

⁹Wamịna aḅeri ma tẹmẹ Tamụnọ ḅe ori inetẹ ye naa ḅịa aro? Ori wamịna atọrụngbọ ma tẹmẹḅọ ḅe ori inetẹ ye ẹrị ḅịa aro?

¹⁰Tomikiri ḅẹ asịẹ mamgba ọ̀ ḅara-ḅio emi, ọ́ sịn-arị ò fomu-ḅara kẹ ịn pịrị ḅịa? Ori ye kẹ tomi mamgba tolumarị ḅọ ḅe, gbọrụ nimi sọ ọ̀ ḅụ ofori aro?

¹¹KỊNỊNYANAḄỌ ḅe in kuromarị aị ma nimi wararị; ò nimi wararị in kuroma ḅoarị aị ma ḅụ nimi gbọrụmgbọ-sọ ofori ḅara.

¹²KỊNỊNYANAḄỌ, mḅọ mịẹ ḅẹ ye ḍuko pịrịarị ḅọ mẹ nyana ḅioḅẹlẹ ḍiki, anie í í oloko kẹ tolumarị ḅọ mẹ!

¹³Ḅụụ-fụka ene ma ḅụ ị́ ḅụụ-dein kẹ ọ̀ pịrị nwenii si-sịḅịḅio-sụapụ ma ḅịkị sọ ḅarị olulu mẹ soku sakị la ḅa.

¹⁴KỊNỊNYANAḄỌ ḅe ori atomi kẹ gbin kuroma so ḅịa; sime ọ̀ pịrị apụ ma ori ịna ḅụ mangị-so ḅịa.

¹⁵Kọtị ma ḅio ịn pịkị siin karakara kọn ḅa, tẹ karakara mịẹ atomi mamgba anị mịẹ kụrọma ḅa.

¹⁶Tụḅọ sịẹsime ị̀ pịrị tẹ si-sịḅịḅio-sụapụ ma na tụḅụrụ? Tụḅọ ị̀ jụ sọ tẹ siye mịẹarị apụ na tụḅụrụ?

¹⁷KỊNỊNYANAḄỌ ḅe ḅarasụa ị̀ pịrị-a som namịna, mimgbe à fịị ḅọrọ tẹ.

¹⁸À ḅẹẹm “À ḅịkịarị”; kụma, Yei KỊNỊNYANAḄỌ, í kuno-a ḅẹlẹma mẹ ị̀ ọlọ sịẹmam.

¹⁹Ḅio-sẹsẹ na ḅụụ-ḅalaḅala na ḅo ị̀ la sakị, la sakị, í ì ḅiokpọmatẹ ị̀ mịẹ tẹ à ḅioḅẹlẹarị.

²⁰Ọḅụ-fị tẹ iri ḅẹrẹ kọn-arị ḅẹrẹkọn-apụ ma í ini na mịẹ ye nyana-a, anie inoma kẹ karakara oloko sọmarị apụ ma,

²¹anie si ḅẹrẹ-ḅiya iḅi atomi ma pịrị tẹ ḅaa-ḅẹrẹ-pẹlẹ mịẹ ye ofori apụ ma ọgọnọ gbanarị apụ ma.

²²Kụma KỊNỊNYANAḄỌ ḅe ị̀ ḍụarị; ị̀ Tamụnọ ị̀ gbaịn-arị.

²³Ori ịna si-sịḅịḅio-sụa mẹ gotẹ in fomu tẹ ịna asi ma gotẹ ịn ḅaa guluguluma ḅa; KỊNỊNYANAḄỌ wamịna Tamụnọ ḅe, ịn ḅaa guluguluma ḅa.