Read kalabari Devidi-Anume 95 Bible Online

Devidi-Anume 95 - kalabari bible

Devidi-Anume 95

¹Ó ḅoo, wa KỊNỊNYANAḄỌ ḅe tokini! Ó yee wa ḍereku kẹ nume-su wa gbaịn-arị Tamụnọ ḅe pịrị.

²Ó yee wa ịmịẹtẹ kẹ ọ̀ tọrọkọ ḅo tẹ ḍereku kẹ nume su-su ò tokini.

³KỊNỊNYANAḄỌ ḅe opu Tamụnọ ẹrẹsị, pịkị opu amadaḅọ, oru mamgba nẹngị ḅọ.

⁴Ori bebe tomikiri mẹ ḅụ ḅẹrẹtọn-arị pokolo tẹịn akiri ḅio ma ḅụ mu geletẹịn tụndụ ma la.

⁵Ori ḅẹrẹ tọn abajị mẹ pịrịarị, ori tẹmẹ ye mẹ; kpongbo-kiri mẹ sọ, ori ḅarana mịẹ kụrọma ye mẹ.

⁶Ó ḅoo, wa iḅo tẹ sunsin ọ̀ pịrị; ó yee wa KỊNỊNYANAḄỌ ḅe tọrọkọ kparakị, wa Tẹmẹḅọ ḅe.

⁷ Ori anie wamịna Tamụnọ; wamịnị anie ọ̀ balarị atomi. Ọ̀ ḅẹẹye-ḅẹẹye mịẹ pịrịarị anana ogbo. Mịmgba ọmịnị ò ḍukoarị ye pokii:

⁸“Ọ́ kọngọ kụrọma ma, ọmịna elemu aḍapụ ma mịẹ ḅara Mẹrịba ḅụ, anị eneḅaka ḅụ ịn mịẹ ḅara ịkpa mẹ ḅio Masa ḅụ.

⁹Anịjụ ini ị̀ daaḍiki tẹ ẹrị ḅẹm, tụkụmaye ini à kọrị ịn pịrị tẹ ye ẹrị tẹ sọ.

¹⁰Kụra amesi ịna amịẹaị nwẹn kẹ ị̀ ḅụụ siinm. À ḅẹẹm, ‘Ịn sịḅị-tuu ị̀ pịrị-a la ḅara ḍiki! Ini à tọn kuroma aị ma poki tẹ mịẹ ḍụkụ-a.’

¹¹Àrị ịganị tẹ karakara ḅara kẹ ye mininim, ‘À kẹ ọ́ pịrịm ó mu ịnyọsara ḅẹ amakiri mẹ, gbala-gbala ọ́ sọ mu ḅịa.’ ”