Read kalabari Egberima-Ẹkwẹn 19 Bible Online

Egberima-Ẹkwẹn 19 - kalabari bible

Egberima-Ẹkwẹn 19

¹Tomḅọ igoin wararị kụma mḅọ kịnị mingirima-mingirima-a mẹ iḅi iruo ma ḅọrọarị oḅori-ḅọ nẹngịm.

²Ḅio-sẹsẹarị tẹ ye ḍawọ ḍin-a mẹ, iḅi-a; ḅioḅẹngbọ sịẹ-sịẹ ḅaka, tomḅọ kẹ ḅụụ-fụka ḅio suu-sum.

³Japụ ịna apantu amịẹaị ḅụ ịna ḅụụ guluguluma fama tẹ, anịtẹso kẹ KỊNỊNYANAḄỌ ḅe sịḅị-sẹịn-arị.

⁴Ngọ-kọnapụ sakị mamgba ịwọ ikia ẹrị-ẹrị tẹ sọarị, kụma igoinḅọ ḅe nyana wararị boowa apụ ma sọ ori inetẹ ini ọlọ wẹrị-a.

⁵Ḅẹrẹ-siri ḅụ í iruo ye ḍuko-ḍuko, in fomu-ḅara kẹ ị́ pịrị ḅa — ị́ pụkọ-so ḅẹ ọkụ ofori.

⁶Ọrụḅọ-ọrụḅọ ḅụụkụrọma tẹ opu-apụ tọrụ iḅi ọkị ḅẹ ḅara ḍọkịarị; ọrụḅọ-ọrụḅọ ikia kẹ iḅi kẹ kịnị mịẹarị apụ ḍọkịarị.

⁷Igoin wararị tomḅọ ḅe ori amịnapụ kịngẹ sọ ọ̀ kẹ mịẹ ḅẹ ye nyana-a; ori ikia nyana-a ye mẹ ḅarị ḅụụ-buamaye so-a. Ọ̀ lịlị ḅara lịlị ḅara sọ, ori inetẹ gberie-sọ nyana ọkị-a.

⁸Iḅi kẹ ị́ ḅụụ mịẹẹ, tẹ í inetẹ ḅẹ ye goyegoye ḍawọọ, anịtẹso ị́ ḍawọ ye mẹ kẹ ḅiokoromaa, tẹ í lolo ḅa.

⁹Ḅẹrẹ-siri ḅụ iruoye ḍukoarị gbọrụḅọ tẹ fomu-ḅara gbarị ḅẹ ḅọ ofori; ọ̀ fa tẹẹ.

¹⁰Oḅori atomi woso-woso ḍumo kọn ma, tẹ omoniapụ pịkị ḅẹrẹtọn karakara atomi pịrị ma.

¹¹Ị́ sịḅịḅio nyana wararị ḅẹḅẹ, ị́ ị́ ḅụụ ọlọ tẹ sarasarama ịganị ḅịa. Gbọrụḅọ kura-aye kẹ ị́ mịẹarị sakị anị kpọma iḅi lamatẹ ye-mịẹ-ḅara sọ ḅa ị́ kẹ ye-sịn-a kụma.

¹²Amadaḅọ ḅe ịganị mẹ ọkụkụ ekirearị ye na kịkam, kụma ọ̀ kẹ kịnị mịẹarị iḅi mẹ koro ḅẹ tẹ sụa wararị tẹ koro eene na kịkam.

¹³Oḅori-sọarị tụḅọ inetẹ ọ̀ ḍa warị fama ḅa. Ẹkwẹn pẹlẹ-pẹlẹ-a taḅọ tọịn-tọịn-tọịnma koro pẹlẹ-a minji kịkarị.

¹⁴Tomḅọ inetẹ ḍaḅọ-na-iyingiḅọ-na ḅara ḅụ warị na igbigi na ḍuu fị ḅa, kụma KỊNỊNYANAḄỌ ḅe kịngẹ mie inetẹ sịḅịḅio nyana ẹrẹḅọ kẹ ọ̀ pịrị ḅarịye.

¹⁵Ị́ kọrịnama ḅụ ḅụụ-lọkọ ḅiiarị ḅẹḅẹ, ị́ nyana ḅa; mono ma-muu, kụma ḅuru ị́ tarị ḅa.

¹⁶Tamụnọ oloko ma kokoo, anịsakị í ḍumo nangwọ ḅa; ị́ arị kẹ ye-sịn-a kụma ị́ fịị ḅa.

¹⁷Í ye kẹ igoin-apụ pịrịarị sakị anị kịkarị ị́ ye Tamụnọ ḅọlọarị, tẹ KỊNỊNYANAḄỌ ḅe anị kẹ ị́ gbẹẹ ḅa.

¹⁸Ị́ awọmẹ kala-sakị ḅụ, in ḅo ye ḍawọ na-iḅi ḅiri la tẹ ḅẹḅẹ, in fomu-fomu tẹ ịn datụkụmaa. Ị́ ọkọ mịẹ-a kụma ị́ ḅarasụa tẹ ini ịna aḅụụ gulugulumarị.

¹⁹Gbọrụḅọ owi ḅioḅẹngbọ nyana-nyana, yee mḅọ anị dogi-ḅo ḅẹ aị ma ọkị. Ị́ gbọrụ sakị kẹ ḅụụ-fụka ḅio ọ̀ pakama-ḅoḅo, ị́ pịkị jen gbọrụ sakị kẹ anị mịẹ-a so ḅịa.

²⁰Ị́ datụkụma tolumaye ọkị tẹ ye-ḍawọ ḅẹ-ḅiiarị ḅẹḅẹ, gbọrụ ene í ye-nimi ḅa.

²¹Tomḅọ ẹbịsịya mḅọ mịẹ ḅẹ kịrị-kịrị aị tọn ḅa, kụma KỊNỊNYANAḄỌ ḅẹ tọn ye, anie mịẹ ḅarịye.

²²Opu-pọkọḅẹngbọ sụa mẹ ḅụụ-jịrịmam; igoin-apụ iḅi iruo apụ nẹngị ḅụram.

²³KỊNỊNYANAḄỌ ḅe ḅịḅị poki tẹ nangwọ ḍumo kọn, ye ị́ na iḅi tẹ í ye ḅụụ la-a ḅara kẹ kpaịn sime ḅa.

²⁴Ja atomi kọrịnama-ḅụụ-lọkọ kọn nwenii ḅuru mgbọlị sakị ịna aḅịḅị ḅio suu sọ ini ine-a.

²⁵Opu ẹkwẹn-kọn fomu-ḅara nyana-a so ḅịa, mịẹ tẹ gberie-sọ nimi-a apụ ma ye-ḍawọ ḅẹ ḅara. Í ye-nimim ḅẹḅẹ, ini ị́ datụkụmarị sakị í ye ḍawọ ḅa.

²⁶Ḅụụ-jịrịmarị tẹ tọrụ-tuuarịḅọ ngẹrị mie si ḅara kẹ amịna ḍaḅọ mịẹ ḅarịye, pịkị amịna warị ḅụ mḅọ iyingiḅọ dee-siin ḅarịye.

²⁷Tụḅọ, í ye-ḍawọ dasịẹma kụma, ala-a í nimi ḅọrọma tẹ ye sọ ị́ sịkị ḅa.

²⁸Ḅẹrẹ-kiri sime-ḅọ mḅọ ye kẹ kịnị lama-lama-a ịgbanịarị anga ḅẹrẹ tọrụ paka-paka-a. Si-sịḅịḅio-sụapụ siye gbọn ḅẹlẹ lama mie ịn ḅẹlẹmarị.

²⁹Ḅụụ-gelemarị oḅori-ḅọ ḅe mịẹ tẹ ò fomuye da-da-a ye ofori.