Read kalabari Egberima-Ẹkwẹn 20 Bible Online

Egberima-Ẹkwẹn 20 - kalabari bible

Egberima-Ẹkwẹn 20

¹Iru ḅụụ ḅaka ị́ mịẹ tẹ í oloku-ma ḅọrọ ḅa, pịkị oḅori-sọ ḅa. Iru ḅuu tọrụ-ḅaamarị ḅọ anie apantu.

²Ịganịarị amadaḅọ ḍiki-ḅalafa-a, ị́ kẹ ekirearị ọkụkụ ḍiki-ḅalafa ḅẹ ḅara pembe ḅara. Ori ịganịma tẹ ị́ ḅụụ ḅaa ma.

³Oḅori ḅọ goḅọ-goḅọ inetẹ ye-nụnụa saakị ḅa; kụn nyana ye tẹ ị́ mịẹ ḅẹ ye anie, ị́ ḅụụ ḅelemaa, anị ḅio.

⁴Ḍụọ-kọrịḅọ tẹ kọrịnama ḅụụ-lọkọ ḅụ iḅi sakị amịna ḍụọ soku tẹlẹma ḍiḅi pịrị-a ḅọ soku-ḅẹ ye nyana ḅịa soku sakị ḅụ.

⁵Tomḅọ akuroma ma kịkarị ye anie pokolotẹ suḅe ḅio ḅẹ minji, kụma ye ḅio sime ye-nimiḅọ inetẹ ḍuu pakama-ḅo ḅa.

⁶Ḅẹḅọ-ḅẹḅọ mḅọ sịḅị-tuu la ḅara na ḅioḅẹngbọ-kẹ-sịrẹrẹ-niḅi ḅara na ḅẹ aị ḍukoarị, kụma ị́yẹrị paa ḅụụkụrọma tẹ karakaramatẹ ọkọ sime ḅọ mẹ ḍọkị-ẹrịị!

⁷Kịnị mingirima-a, pịkị kuraye mịẹarị ḍaḅọ nyana awọmẹ ma ini iḅi fụḅara sụam.

⁸Amadaḅọ ḅe lẹgị-lẹgị tẹ ḅẹrẹkọn-arị, ọ̀ pịkị siye nimiarị ori anị ẹrị sakị.

⁹Tọ gbọrụḅọ inetẹ karakara ḅara kẹ ḅẹẹ ḅa mịnẹ mḅọ tẹmẹ-ḅioḅẹngbọ fịafịa wararị, mịnẹ mḅọ si goyegoye ḅụ ḅara-siin tẹ?

¹⁰KỊNỊNYANAḄỌ ḅe kịnị mingirima ye-tọn-aị kẹ ye tọn-arị apụ ḍiki-ḅioḅuarị.

¹¹Kala tụḅọ kịngẹ sọ ọ̀ mịẹarị ye ḅụ ò sime-ḅara ḍie-pakamarị; í inetẹ ḍuko ḅa ọ̀ kịnị mingirima-a tẹ iḅi wararị ḅẹḅẹ.

¹²KỊNỊNYANAḄỌ ḅe tọrụngbọ kẹ wa pịrịtẹ wa kẹ ye ẹrị, pịkị ḅeri na wa kẹ ye naa.

¹³Ị́ ị́ nyana sakị kẹ mono fama-fama, í igoin ḅa. Kọrịnama kọrị ma-muu, tẹ ị́ tọnwa fịaị nyana tẹ fị ḅa.

¹⁴Ye-fẹarịḅọ mẹ sakị mamgba dẹrị ḅịḅị mẹ iwo ḅakam ḅẹẹarị, kụma anịtẹso mḅọ pịkị-so tẹ ḅụụ-bomarị mḅọ iḅi ḅịḅị kẹ fẹ tẹẹ.

¹⁵Ị́ ẹkwẹn-arị ye nimi tẹ ẹkwẹn-arị ḅẹḅẹ, í yela golu na ịn kẹ juwẹlị sịn-arị yela ḅiri aị na nẹngị ye nyana tẹẹ.

¹⁶Ḅẹḅọ-ḅẹḅọ tẹ apantu sọ nwenii tẹ minini tẹ kịnị tọrụ-nimi-a ḅọ fị saa ḅẹ onyo-sẹịnḅọ mẹ, ini mḅọ nyana kiri anịanịa warị ọlọ-sịẹma nwenii saa ma gbẹẹ ḅa.

¹⁷Kịnị mingirima ḅụ ị́ nyanaḅọ ye mẹ, ẹbịsịya í ḅioḅẹlẹ kẹ anị fị ḅa, iḅi tẹịn fịye ọkụ, kụma ala-a sakị, anịanịa ala sakị ḅụ, anị ị́ ḅịḅị ḅio onwin ḅin wararị ye kịka ḅa.

¹⁸Iḅi toluma karakarama ẹkwẹn nyana, anịsakị ye ị́ na iḅi ḅa; ye kẹ ọrụtọn-a ḅara kẹ sakị-paka mu ọmụ gbin ma.

¹⁹Ọḅụ-ẹkwẹn kọn-arị ḅọ inetẹ gbala-gbala ḅọị ye koko ḅịa. Ẹkwẹn ḅakarị apụ ḅụụ ị́ ḅụụ ḅelemaa.

²⁰Ị́ ị́ ḍa-na-iyingi-na woriarị ḅẹḅẹ, í ḍumo kunoma ḅarị ḅara kanakana ḅio tọnjọ biin ḅara.

²¹Ị́ ḅụụ-fụkama-a ḅara kẹ ye kọn ḅẹḅẹ, anie anị kẹ ị́ mịẹ ḅẹ iḅi pịkị ḅo ḅịa ḅara.

²²Ḅarana tomḅọ kẹ ị́ mịẹ siye ḅẹ gbẹẹ-ye kẹ mḅọ gbẹẹ ma. KỊNỊNYANAḄỌ ḅe kẹ ḅiokpọmaa, ori anị tẹlẹma ḅa.

²³KỊNỊNYANAḄỌ ḅe kịnị mingirima ye-tọn-aị kẹ ye tọn-arị apụ ḍiki-ḅioḅuarị.

²⁴KỊNỊNYANAḄỌ ḅe wa mẹnjị ḅọrọ ḅarị yọ tọn wẹrị wararị; ọkọ kụma ndẹẹ tomḅọ inetẹ mḅọ ḍumo mẹ ọkị ḅarị etela nimi ḅẹ ḅara?

²⁵Iḅiọkụma kuroma lama tẹrẹmẹ ị́ kẹ Tamụnọ pịrị ḅẹ ye mininii. Ẹbịsịya anịtẹso í tiye-ì-gbo ḅẹẹ ḅa.

²⁶Ye-nimi amadaḅọ kura-aye mịẹarị ḅọ ḍọkị pakama-ḅo ḅa, tẹ ọkụrụkụrụ ofori ḅara kẹ ó fomu ḅa.

²⁷KỊNỊNYANAḄỌ ḅe kuroma na tẹmẹ-ḅioḅẹngbọ na kẹ wa pịrịm wa inetẹ ḅụụ ḅọị ḅịa.

²⁸Amadaḅọ da tọrọkọ-tọrọkọ mu ḅa, ori ama-da mẹ ḅụ kịnị mingirima-a na, karakara na, tomḅọ la kiri kẹ mḅọ pịrị na emi ḅẹḅẹ.

²⁹Wa asambịrịma ịnyọ mẹ tokiniarị; pịkị mangịma kẹ omongi ḅụ ḅo iḅulu mẹ pịrịarị.

³⁰Ja sakị ḅụ anị akụye sọ wa pịrịarị wa wa ye mịẹ sime-ḅara ḍima mẹ.