Read kalabari Egberima-Ẹkwẹn 24 Bible Online

Egberima-Ẹkwẹn 24 - kalabari bible

Egberima-Ẹkwẹn 24

¹Si atomi mọnị ma, pịkị ḅụụkụrọma tẹ ini na ikia-sọ ma.

²In kuromarị aị mamgba ḅụụ-fụka dogi-ḅo aị famam ịn ḅịḅị finji sakị goyegoye ye gbọrụḅọ laarị.

³Warị pakamarị apụ nimi na yefieye naa na mie ịn kẹ suku-saakịarị.

⁴Ye-ḍawọ ḍin simearị anga ḅio mamgba yelatẹ iḅi aị mie ịn kẹ arị ḅirima fama wararị.

⁵Ḅo ye-nimi ḅọ sọ mẹ iḅi oju ḅẹ kụrọ-kọn nẹngịm; inn, ye-ḍawọ-ḍịịn kụrọ nyana ịnyọ nyana nẹngịm.

⁶Kunoma, ẹrị mịnẹ ị́ iḅiọkụ ye tọn karakarama tẹrẹmẹ ị́ paka ọmụ mum, ị́ pịkị iḅi datụkụma ẹkwẹn nyana lamam, anị ḅọkọ ḅụ mie ị́ ḅọrọ tẹ owu-ḅara-iḅi nyana ḅarịye.

⁷Nimi ẹkwẹn ma arị pokolo ḅakam apantu ḅe anị fiearị ye naa ḅụ. Ọ̀ nyana tẹ ḍuko ḅẹ ye ofori kịnị kụrọ nyana tẹ aḅẹrẹ ḅụ ẹkwẹn-arị sakị.

⁸Ị́ sakị mamgba ị́ mịẹ ḅẹ si-aị tọn-arị ḅẹḅẹ, ị́ ḅụụ-fụka dogi-ḅoḅo ḅọ kẹ ẹrẹ fị ḅa.

⁹Oḅori-ḅọ sụa ḅo kuroma tẹ si-a ye ofori. Tomi jen-apụ ḍiki-sima ngẹrị kẹ mịẹ-mịẹ sọma tẹ mịẹarị ḅọ ḍiki-ḅioḅuarị.

¹⁰Ye ḅo tọrụ ḅalaḅalama ḅara sime tẹso ị́ ḅụụ-lọkọarị ḅẹḅẹ, karakarama tẹ ị́ ḅụụ ịnyọ ofori.

¹¹Mịẹ si ofori tẹ ịn kẹ ḅaa ḅẹ muarị ḅọ pụkọ-pakamaḅo ḅụ sakị fama ma.

¹²Ẹbịsịya ị́ ḅẹẹ ḅa anị kẹ í gboloma anga ofori, kụma Tamụnọ í kuromarị aị nimi tẹ arị kọn-arị. Ori ị́ ẹbịarị; Ò nimi wararị. Tẹ ị́ mịẹarị ye mie ò ḍiki tẹ ị́ gbẹẹ ḅarịye.

¹³Tụḅọ, ḅẹm taḅaa; anị iḅi wararị. Tẹ ḅẹm mẹ siin ḅoarị-ḅoarị anị ị́ ḅẹlẹ ọgọnọ ḅẹlẹarị ḅara mẹ,

¹⁴ẹbịsịya í nimi lama ḅa mịnẹ nimi sọ ọkọ kẹ iḅi tẹmẹ mẹ pịrị wararị. Nimi nyana tẹ tọrọkọ-jụ mẹ iḅi ị́ pịrị.

¹⁵Si-sịḅịḅio-sụa apụ ma ḍikima ma, anie ẹbị tẹ kịnị mingirima-mingirima-a tomḅọ ḅe aị furu, anịanịa ọ̀ warị ọkị tẹ kẹ amịna nye mịẹarị apụ ma.

¹⁶Kịnị mingirima-mingirima-a tomḅọ ḅe ọ̀ ḅịkị sakị goyegoye ọ̀ pịkị saakị sịẹarị; kụma si-sịḅịḅio-sụapụ ma opu ḅụụ-fụka ịn ḅaa gulugulumarị.

¹⁷Si kẹ ị́ tọn-arị ḅọ ḅe opu ḅụụ-fụka ḅio sọ-sọ ḅioḅẹlẹma; ḍereku ma ọ̀ pụmbụ sakị.

¹⁸KỊNỊNYANAḄỌ ḅe nimi ḅa ị́ ọ̀ ḅụụ-fụka mẹ ḍikiḍiki tẹ ḅioḅẹlẹarị ḅẹḅẹ, tẹ anị ọ̀ ḅụụ-ḅẹlẹ ḅịa; anị tẹso, ẹbịsịya ọ̀ ḅarị fomu-ḅara kẹ ọ̀ pịrị ḅịa.

¹⁹Ḍụkụ tẹ si-mịẹapụ mịẹarị ye í lokolokoma ma, pịkị ịn mọnị ma.

²⁰Si-sịḅịḅio-sụarị ḅọ mẹ iḅi nyana-a tọrọkọ-jụ — mḅọ kẹ tọrụ-ḅaama ḅẹ gberie sọ ofori.

²¹Ị̀ tụḅọ, KỊNỊNYANAḄỌ ḅe ḍiki-ḅalafaa, pịkị amadaḅọ ḅe kụn. Kọngọ kụrọma ịn pịrịarị apụ na gbọrụ mịẹ sọ nyana ma;

²²ọkọ sime atomi ma tọrụ-gbaịn-finji ḅụ ịn faa ḅa. Í nimi ḅẹ, opu ḅụụ-fụka tẹ Tamụnọ, anịanịa amadaḅọ ḅe, inetẹ mịẹ tẹ ḅo ịn la ḅẹ ye?

²³Ye-nimi atomi mịna aị ma sọ ḍukom. Anị kura-a ḅẹrẹkọnḅọ ḅẹrẹ kẹ ḅioḅẹngbọ ḅụ sụa wẹrị mẹ.

²⁴Ọ́ nwẹnị ḅẹrẹ-pẹlẹ siye mịẹ ḅọ ḅara iḅima ḅẹḅẹ, ḅẹḅọ-ḅẹḅọ ó wori tẹ ó ḍiki-ḅioḅu ḅa.

²⁵Fomu-ḅara kẹ siye mịẹ ḅọ pịrịarị ḅẹrẹkọn-apụ ma, anị sime-ḅara sime-ḅara sọ, in lolo tẹ ḍereku ḅa, iḅi ereso ḅụ.

²⁶Tomḅọ jụmọ mingirima-a ḅara kẹ ḅẹrẹ pakịrị mẹ anie ikia karakara elekima.

²⁷Tarị ị́ ḍụọ tẹlẹmaa, tẹ ye ḍiḅii, tẹrẹmẹ ẹrẹḅọ sime tẹ warị pakamaa; anịsakị í nimi tẹ mịnẹ ị́ ḅọrọ tẹ ị́ fị ḅẹ ye nyana ḅẹ ḅọkọ paka tẹẹ.

²⁸Ḅẹrẹ ḍuko gbọrụḅọ-sọ ọgọnọ gbana ma í gotẹ ọkọ mịẹ ḅẹ iḅiye ofori ḅara ḅụ, anịanịa ọ̀ ḅụ etemi-na-sịḅị-na ofori ye ḍuko.

²⁹Ḅẹẹ ma, “Ọ̀ kẹ ị̀ mịẹ gbọrụ ḅara mẹ mie à kẹ ọ̀ mịẹ ḅarịye! Arị ori na gbasị ḅa!”

³⁰À mẹnjị kọrịnama-ḅụụ-lọkọ nyana wararị apantu ḅe aḍụọ ḅio ḅọrọm.

³¹Nangị asịn na osuka na sikima arị ḅio jen ofori. Ḍụḅarị onu tẹ ịn kẹ arị gbọrụ ye mẹ sọ ḅịkị-koro tẹẹ.

³²À miemẹ ḍiki tẹ kẹ kuroma ḅụ suu tẹ anị ḅụ ye ḍawọm.

³³Sịngẹ tẹ mono í ḅiiarị ḅẹḅẹ, ị́ aḅara iko tẹ kẹlẹ ịnyọsara-a,

³⁴kụma í monoarị ogbo igoin ḅo owu kẹ ị́ paka ḅa, owuna-aị kẹ furu ḅẹ ḅo ḅọ ọkụ.