Read kalabari Egberima-Ẹkwẹn 27 Bible Online

Egberima-Ẹkwẹn 27 - kalabari bible

Egberima-Ẹkwẹn 27

¹Ḅaa gotẹ ḅụụ-boma ma. Mịọkụ na anị sakị na ogbo ḅụ paka ḅẹ ye í nimi-a.

²Yee jen-apụ í tokini, anị ḅọrọ kịnị tọrụ nimi-a apụ sọ — gbala-gbala ḅarana mịẹ ma.

³Ḍụḅarị na onwin na iku sọ apantu ḍumo inetẹ dogi-ḅo ḅarị ḅụụ-fụka na gbasị-a.

⁴Ịganị anị tọrụ guda-gudarị, pịkị ḅaa gulugulumarị; kụma anie papaa ye, kẹ afana na tọnma kụma.

⁵Kịnị nimi ḅara kẹ da karakarama ẹkwẹn kọn tomḅọ pịrị, iḅi gbala-gbala ḅịḅị-fie-a tẹ mḅọ ọkị mịnẹ ị̀ mḅọ bala-a nẹngịm.

⁶Ikiaḅọ iḅi mie mḅọ kẹ ị́ tọn-arị, mḅọ ḍuko ye ị́ ịnọarị sọ. Kụma si kẹ ị́ tọn-arị ḅọ ḅara kẹ ị́ apana gbana ikelema wararị ḅẹḅẹ ẹbị lamaa!

⁷Í furo ḅin wararị sakị ḅẹm sọ ị́ sịkịarị, kụma ḅuru ị́ tarị sakị akụarị fịye sọ ḅẹlẹarị.

⁸Warị koroma-so wararị tomḅọ ḅe kịkarị ye amịna warị ḅụ ḅele-fa wararị feni.

⁹Sẹntị na kụnụ-olo na ị́ mịẹ tẹ í ḅioḅẹlẹ tarị ḅara nẹngịarị, kụma ḅụụ-fụka ḅo tẹ í kuroma ḅẹ dein mẹ kan-siin-arị.

¹⁰Í ikiapụ anịanịa ị́ ḍa ikiapụ kẹ ḅioḅọrọma ma. Ḅụụ-fụka ị́ la ḅẹḅẹ, í iyimbere ḅara ḅarasụa ḅii ma; jen tomḅọ inetẹ ḅarasụa ḅele-fa wararị mịnaḅọ nẹngị lama ḅa.

¹¹Ị̀ tụḅọ, ye-nimii, anịsakị à ḅioḅẹlẹ ḅa; àrị ị́ mịẹkọn nyana tẹẹ kẹ ị́ ḅẹẹarị ḅọ goḅọ-goḅọ pakịrị ḅẹ ye nyana ḅa.

¹²Sịḅịḅio nyana apụ ḅoarị ḅụụ-fụka mẹ ẹrị tẹ anị kọkọrọ ḅa, kụma kuroma nyanaḅọ mẹ da-da mẹnjị mu anị ḅio sọ tẹ ọḅụkọ tiye-ì-gbo ḅẹẹ ḅa.

¹³Ḅẹḅọ-ḅẹḅọ tẹ apantu sọ nwenii tẹ minini tẹ onyo-sẹịn kịnị tọrụ-nimi-a ḅọ fị saa pịrịarị ḅọ mẹ, anị iḅim mḅọ nyana aị dẹrị tẹ kẹ saa mẹ gbẹ ḅẹ sakị ẹbịma.

¹⁴Í dede-funfun ḅụ oloku pọkọ kẹ ikiaḅọ sịn saakịarị sakị goyegoye ị́ pịkị ò wori ḅarịya.

¹⁵Ẹkwẹn pẹlẹ-pẹlẹ-a taḅọ kịkarị ye anie eene koroarị ene ḅụ tọịn-tọịnma koroarị minji.

¹⁶Ndẹẹ ị́ mịẹ tẹ á yaụ-sime ḅẹ ḅara? Jen sakị ị́ fẹrụ dasịẹma ḍiki tẹẹ, anịanịa pulo kẹ ḅara ḅio ọlọ wẹrị?

¹⁷Tomi jụmọ-jụmọ ḅara ye ḍawọarị, anie jen ikulele jen ikulele farịarị ḅara mẹ.

¹⁸Figi-sịn ḍikiḍiki kpaịnma, anịsakị í figi-sịnmgbọlụ nyana tẹ fị ḅa. Amịna sịḅịdaḅọ balarị fịrịmẹnjịḅọ ḅe ini ọ̀ kẹ kụn nyana kiri ḅụ koroma ḅa.

¹⁹Í minji ḅio ḍiki tẹ ẹrịarị tọrụ mẹ í nyee, anịsakị í ḅioju mie ị́ pịkị í ḅioḅẹngbọ ḅụ ẹrịarị.

²⁰Tomina aḅioḅẹngbọ ịgbanịarị aị ma arị ḍuḅu na kịkam — sakị mamgba kiri paa foo wararị anị jen ḅii ḅụ.

²¹Fịnị anie tomi kẹ golu na seleḅa na tọn-ḍikiarị tomḅọ ereso sọ ini inetẹ tọn-ḍiki ḅa.

²²Í oḅori-ḅọ fomu nwenii ọ̀ fịị-fịị ḅara sime sọ í inetẹ ori oḅori-sọ mẹ fomu siin ḅịa ọ̀ ḅụụ ḅio.

²³Í ine-ḅara ine-ḅara kẹ iḅiọkụ ị́ anana na nambulo na ḍikiḍikii,

²⁴kẹ gotẹ ọkọ ḍukoarị pẹrẹ sime-gbamaso-so-a. Sịẹ-sịẹ ma sọ sime gbamaso-a.

²⁵Ị́ nama fị ḅẹ osuka mẹ pẹlẹ tẹso, í ḅo tụndụ ma akaka ḅẹ osuka mẹ pẹlẹarị, ị́ ọkọ mịẹarị sakị jen pẹlẹ ḅẹ aị ma pịkị so-pakarị.

²⁶Í inetẹ ị́ anana ma ḅụ ị́ nyana ḅo isuke ma kẹ ḅịtẹ ḍori tẹ í oḅori ma ḅụ dẹrị ḅo igbigi kẹ kiri fẹ ḅa.

²⁷Oḅori ma ḅụ kirikọn-aị ma nwẹnị ndo-minji pakama-ḅo na, ị́ warị ḅẹ apụ na, ị́ fịrịmẹnjị-eremịna-awọmẹ ma na pịrị ḅa.