Read kalabari Egberima-Ẹkwẹn 28 Bible Online

Egberima-Ẹkwẹn 28 - kalabari bible

Egberima-Ẹkwẹn 28

¹Si-sịḅịḅio-sụa apụ ma mangịarị gbọrụḅọ-sọ in ḍuka-a ogbo, kụma kịnị-mingirima-mingirima-a ḅọ ḅe ọkụkụ ḅiokpọ ḅara kẹ ḅiokpọ wararị.

²Gbọrụ sịẹ si mịẹarị kụma anị ama-da apụ ḍima-ḍima-ḍima ḅa. Gbọrụ sịẹ kụrọ tẹ sịẹsime tọrọkọ-tọrọkọ muarị ḅẹḅẹ anị sịḅịḅio nyana ye-nimi sịḅịdapụ nyana wararị.

³Kụrọ gbọrụ tomḅọ ḅara ḅụ emi tẹ ori igoin apụ ponomarị ḅẹḅẹ, ọ̀ kịkarị ye anie kụrọ fẹrụ fiearị sakị koroarị opu eene tẹ ḍụọ ḅio ḍiḅi aị ma gulugulumarị ye sime-ḅara.

⁴Í oloko bala-a ḅẹḅẹ, í si-sịḅịḅio-sụarị apụ jụ emi; kụma í oloko kokoarị ḅẹḅẹ í ini na tụḅụrụ wararị.

⁵Siye mịẹarị apụ kịnị-inoma-a mịẹ nwẹn-sịn ye nimi-a, kụma sunsin KỊNỊNYANAḄỌ ḅe pịrịarị apụ anị fiearị ye naa lama wararị.

⁶Igoin tẹ kịnị mingirima-a iḅi ngọ-kọn tẹ kịnị mingirima nẹngịm.

⁷Asambịrịma tomḅọ tẹ oloko mẹ kokoarị ḅọ anie sịḅịḅio nyanaḅọ. Gberie ḅụ sọ iḅi-a apụ na ikia-sọarị ḅọ amịna ḍaḅọ tọrụ-tuuarị.

⁸Í igbigi kẹ kịnị ḅọlọ-ḅọlọ tẹ iḅiọkụ ye gbana tẹ ngọ-kọn-arị, tẹ tomina ḅụụ-fụka gotẹ í ḅiotọn ḅara kẹ ini na mịẹarị ḅẹḅẹ, ị́ ngọ mẹ saḅa so mu iḅi ḅara kẹ igoin-apụ na mịẹarị ḅọ pịrị ḅa.

⁹Í oloko mẹ koko-a ḅẹḅẹ, anị ḅụụ-fụkama ḅa Tamụnọ ị́ atẹkẹ naa, ori arị ḍiki-ḅioḅuarị ḅara sime ḅaka ḅa.

¹⁰Ị́ kịnị mingirima-mingirima-a ḅọ toluma mu siye mịẹ ḅio suuarị ḅẹḅẹ, ị́ ḅịkị ị́ ḅarana tuu ḍiein mẹ ḅio sọ ḅa. Mịẹ si ofori apụ ma iḅi gbẹẹ-ye nyana ḅa.

¹¹Ngọ-kọnapụ sakị mamgba kuromarị mịnẹ in ye-nimi wararị, kụma igoinḅọ tẹ tomina ye-mịẹmịẹ-ḅara suku-ḅio sime ye nimi ḅọ nimi ịn nẹngịm.

¹²Iḅi atomi ḅo ḅẹrẹtọn kụrọ-ḅara ḅụ simearị apụ sọ tẹ ḅẹḅẹ, ḅẹḅọ-ḅẹḅọ anị ḅẹ tii kọn-arị; kụma si-mịẹapụ ḅẹrẹtọn-arị sakị kịnị ḅụụ kikimarị.

¹³Gbala-gbala ḍumo ḅụ ị́ tọrọkọ mu ḅịa ị́ ị́ asi ḅọị ḅẹ ḍọkịarị ḅẹḅẹ. Arị ḍuko pakama tẹ arị ḅụ ḅara-siin; anịtẹso Tamụnọ ọkụrụkụrụ nyana ị́ pịrị ḅa.

¹⁴Sakị mamgba KỊNỊNYANAḄỌ ḅe ḅịḅị pokii, anịsakị í ḅioḅẹlẹ ḅa. Ị́ kọngọ-kụrọmarị ḅẹḅẹ ị́ faa ḅa.

¹⁵Si-sịḅịḅio-sụarị ḅẹrẹtọnḅọ suku ḅio igoin-apụ ḅarasụa nyana-a; ekirearị ọkụkụ anịanịa tuu tẹ ḅaa ḅẹ ye ḍọkịarị ye ọkụ.

¹⁶Iḅi-sịḅịḅiosụa-a ḅẹrẹtọnḅọ ḅe tẹ guda-guda ḅara kẹ kịnị na mịẹarị ḅọ mẹ ajagidi sọ ḅa. Kịnị mingirima ḍiki-ḅioḅuarị ḅẹrẹtọnḅọ ḅẹrẹtọn alama ḅa.

¹⁷Kịnị-ḅa-ḅẹrẹ sịḅị ḅụ gbana wararị ḅọ mẹ, mḅọ sarasarama amịna ḍuḅu sokuarị. Ọ̀ dasịẹma ḅẹ ḍọkị ma.

¹⁸Kịnị mingirima ma, anịsakị í ye ḅụụ la-a ḅara kẹ sime ḅa. Ị́ kịnị mingirimarị ḅẹḅẹ, ḅiotọn-a ḅara ḅụ ị́ ḅịkị ḅa.

¹⁹Kụrọma kọrịnama kọrịarị ḍụọ-kọrị ḅọ ḅe tọnwa aị nyana tẹ fị ḅa. Sakị famarị apụ sakị mamgba igoin ḅa.

²⁰Kịnị mingirima-mingirima-a apụ ḅintẹ, ḅioḅẹlẹ ḍumo kọn ḅa. Kụma ị́ fọnya ngọ-kọn ḅẹ ḍọkịarị ḅẹḅẹ, í mu ị́ ḅụụ kẹ ḅụụ-fụka ḅio suuarị.

²¹Ḅẹrẹ kẹ ḅioḅẹngbọ sụa wẹrị iḅi-a. Kụma ja ḅẹrẹkọn-apụ iri-ye mịẹ ḅa ini ịrụ tẹịn ọḅụ fị sọ.

²²Amịna ḅụụ ngẹrị balarị apụ ma fọnya ngọ kọn ḍuka nwenii igoin ḅo in fomu ḅẹ sakị in nimi-a.

²³Gbọrụ tomḅọ mịẹ-irima ye ḅụ ọ̀ daa-karakarama, ọḅụkọ la sakị ori anị kẹ ye-sịn furuma ẹkwẹn nẹngị ḅa.

²⁴Ḅẹḅọ-ḅẹḅọ tẹ kuromarị mịnẹ mḅọ amịna ḍaḅọ-na-iyingiḅọ-na nye furu mẹ ḅụ siye ofori ḅarị ḅọ mẹ, mḅọ iḅi kịnị mamgba nimi wararị furuḅọ nẹngị-a.

²⁵Amịna ḅụụ ngẹrị bala mẹ ḅụụ-fụka kịngẹ mie anị dogi-ḅoarị ye. Ị́ KỊNỊNYANAḄỌ ḅe kẹ ḅiokpọma iḅi anị nẹngị ye ḅụram.

²⁶Í kuromarị aị ngẹrị ḍukamẹnjị mẹ anie oḅori mịẹ. Ye-nimiapụ ma toluma aị ma ḍukamẹnjị tẹ ye ḅụụ la-a ḅara sime.

²⁷Ye kẹ igoin-apụ ma pịrịị, anịsakị ye ḅarị ị́ ḅụụ-fụkama ḅịa. Ị́ tọrụ gbaịn igoin-apụ pịrịarị ḅẹḅẹ, tọnwa-apụ í wori ḅa.

²⁸Ḅẹrẹtọn kụrọ si-mịẹapụ aḅara-ḅio sọ tẹ ḅẹḅẹ, kịnị ḅụụ kikima tẹẹ. Kụma kụrọ ịna aḅara-ḅio so tẹ ḅẹḅẹ, karakaraye-mịẹapụ ma siin ḅẹrẹtọn ḅa.