Read kalabari Egberima-Ẹkwẹn 29 Bible Online

Egberima-Ẹkwẹn 29 - kalabari bible

Egberima-Ẹkwẹn 29

¹Kịnị ị́ daa-karakarama sakị goyegoye ị́ kọngọ kụrọmarị ḅẹḅẹ, gbọrụ ene ḅụ ị́ gbọrsịḅị gbẹẹ kọsị tẹ ḅarị saakị paka-ḅo ḅịa.

²Karakara mịẹarị ḅẹrẹtọnḅọ kẹ ì ḍie, tẹ à ḅioḅẹlẹarị apụ kẹ í ḍie ḅa. Si-sịḅịḅio-sụarị ḅẹrẹtọnḅọ kẹ ì ḍie, tẹ à kururu fịịarị apụ kẹ í ḍie ḅa.

³Í nimi kẹ ye-sịn-arị ḅẹḅẹ ị́ ḍa ị́ kẹ ḅụụ-tọn ḅa. Igbigi fama sẹfị-ereme pịrị mẹ anie oḅori fa.

⁴Karakara ḅẹrẹkọn amadaḅọ ḅe ḅụ ḅẹrẹ wararị sakị ḅụ sịẹ mẹ kụrọ sịẹsime ḅa, kụma igbigi kịngẹ mie ọ̀ ḅụ ḅẹrẹ ye sọarị sakị ḅụ ori ama mẹ fama ḅa.

⁵Ị́ ẹkwẹn ḅụ í ikiapụ furumarị ḅẹḅẹ, ị́ ḍiein tuu ị́ ḅụ pịrịarị.

⁶Si-apụ ịna asi in kun sịẹmarị sakị kịnị mingirima-mingirima-a apụ ḅioḅẹlẹ ma mẹnjị ma-ḅọrọarị.

⁷Iḅi tomḅọ igoin-apụ la akiri nimi wararị, kụma si-sịḅịḅio-sụapụ inetẹ ọkọ sime aị fiearị ye naa ḅịa.

⁸Ja atomi kẹ gberie-sọ sịn-a apụ inetẹ bebe ama mẹ fiema ḅa. Ye-nimiapụ mie mịẹ tẹ ye mamgba yaụarị.

⁹Sịḅịḅio nyanaḅọ ḅe oḅori-ḅọ kẹ ḅẹrẹ-siri muarị sakị, oḅori-ḅọ ḅe ḍẹrị kịngẹ mie ọ̀ ḍẹrịarị, tẹ oloku-oloku tẹ ò woriarị.

¹⁰Ọmbie ọsụma pọkọ-tarị apụ ḅẹḅọ-ḅẹḅọ tẹ kịnị mingirima-mingirima-a ḅọ ḍiki-ḅioḅuarị, kụma karakaraye-mịẹapụ ọkọ sime tomḅọ ḍumo gbaịn ḅọrọmarị.

¹¹Apantu atomi ịganị pakamarị, kụma sịḅịḅio-nyana apụ inema tẹ anị dasịẹmarị.

¹²Gbọrụ ḅẹrẹtọn ḅọ kịnị ḅo ḍuko ọ̀ pịrị iruo aị kẹ ye-sịn-arị ḅẹḅẹ, ọ̀ fịrịmẹnjị-opuapụ mamgba ḅo iruo apụ sọ ḅa.

¹³Igoin wararị tomḅọ na ò ponomarị ḅọ na gberie nyana gboloma wararị — KỊNỊNYANAḄỌ ḅe tọrụngbọ kẹ ini maa apụ ma pịrị wararị.

¹⁴Amadaḅọ igoinḅọ ḅe la kiri ịgbanị ọ̀ pịrịarị ḅẹḅẹ, ọ̀ ḅẹrẹtọn alama ḅa.

¹⁵Daa-karakarama na fomuye na awọmẹ mịẹ iḅimarị. Tụḅọ ò ḅio tọnye-tọnye mịẹarị ḅẹḅẹ, ori ò iyingi ḅụụ-jịrịma ḅa.

¹⁶Si-atomi ḅẹrẹtọn kụrọ ḅụ emi sakị ḅụ si-amịẹaị ḅakarị. Kụma karakaraye-mịẹapụ ma ḍumo-sime tẹ ọkọ sime atomi ma ḅịkị-koro ẹrị ḅa.

¹⁷Ị́ tụḅọ siye mịẹ tẹ ḅẹḅẹ, ò fomuu, anịsakị sakị mamgba ị́ ọ̀ kẹ ḅụụ-tọn tẹẹ. Gbala-gbala ò gotẹ ị́ ḅụụ-jịrịma ḅarịye paka ḅịa.

¹⁸Tamụnọ datụkụma-a sịẹ anie ọrụtọn-a sịẹ, Ḅioḅẹlẹ arị tomḅọ anie Tamụnọ oloko kokoarị ḅọ.

¹⁹Í inetẹ ẹkwẹn ọ̀ pịrị ḅụ ngẹrị ị́ fịrịmẹnjịḅọ daa-karakarama ḅịa. Í fiearị ye ọ̀ naa ḅa, kụma ẹbịsịya ọ̀ kẹ ye-sịn ḅịa.

²⁰Ḅiokpọ sime oḅori-ḅọ pịrị kuroma-a tẹ ẹkwẹn-arị ḅọ nẹngịm.

²¹Ị́ kala-sakị ḅụ ị́ fịrịmẹnjịḅọ ḅii-ye ḅii-ye kẹ ọ̀ pịrị tọrọkọ-tọrọkọ muarị ḅẹḅẹ, gbọrụ ene ḅụ ọ̀ gbọrsịḅị ị̀ nyana ye nyana ye ọkị ò nye sọma ḅa.

²²Owi ḅioḅẹngbọ nyana apụ kpọma tọnwa kamụ na ḅụụ-fụka na dogi-ḅoarị.

²³Opu ẹkwẹn ị́ ḅịkị dogi-ḅo ḅa, kụma ị́ ḅụụ-lẹgịmarị ḅẹḅẹ, tomi kụn kẹ ị́ pịrị ḅa.

²⁴Furuḅọ na sọ tẹ furuarị ḅọ anie ori na fịya-a tẹịn ḅọ. Ḅẹrẹ-siri ọ̀ karakara mẹ ḍuko-ḍuko in fomu-ḅara kẹ ọ̀ pịrị ḅa, tẹ Tamụnọ ò wori ḅa ò ḍuko-a ḅẹḅẹ.

²⁵Anị siye dogi-ḅo ị́ pịrị ḅa ị́ ja atomi ị́ ḅụụ ḅụ kuromarị aị ḅala ḅakarị ḅẹḅẹ, kụma ị́ KỊNỊNYANAḄỌ kẹ ḅiokpọmarị ḅẹḅẹ, ị́ la ḅẹ ye ofori.

²⁶Ọrụḅọ-ọrụḅọ ḅẹrẹtọnḅọ ḅe iḅi kuroma ḅiiarị, kụma KỊNỊNYANAḄỌ ḅe ḅara ngẹrị mie í inetẹ karakara ḅẹrẹkọn nyana ḅarịye.

²⁷Karakaraye-mịẹapụ ma si-sịḅịḅio-sụapụ ma ḍiki-ḅioḅuarị, tẹ si-sịḅịḅio-sụapụ ma pịkị karakaraye-mịẹapụ ma ḍiki-ḅioḅuarị.