Read kalabari Egberima-Ẹkwẹn 30 Bible Online

Egberima-Ẹkwẹn 30 - kalabari bible

Egberima-Ẹkwẹn 30

¹Ma ma anie Agọ, Jake owiḅọtụḅọ ḅe kọn tẹmẹ-la ẹkwẹn ma: Tamụnọ ị̀ na oforii, Tamụnọ ị̀ na oforii, tẹ à ḅarasụa nyana-a.

²À nama kịka tomḅọ nẹngị lamam; À tomḅọ nyana-nyana sịḅịḅio nyana-a.

³Gbala-gbala gbọrụ nimi sọ amụ à ḍawọ ḅo-a, tẹ Tamụnọ gboloma ye tẹ à nimi gberie-sọ ofori.

⁴Jen sakị tụḅọ So-ḅio ḅẹ aị ḍawọ ḍịn tẹ? Jen sakị tụḅọ amịna ḅara-ḅio fẹrụ mẹ kuun-sịẹma tẹ? Anịanịa ḅịtẹ ankịsị kẹ minji kobiri kpọọ tẹ? Anịanịa kiri mẹ mu daasịẹ ḅẹ anga tọn tẹ? Mḅọ ḅọrọ tụḅọ, í nimi wararị ḅẹḅẹ? Mḅọ tụḅọ ḅọrọ tụḅọ?

⁵Tamụnọ minini ye goyegoye ọ̀ mịẹarị. Ori ekpeke sime-ḅara kẹ gbaịn-ḅọrọma gotẹ ọ̀ ḍọkịarị apụ mamgba gbaịn-arị.

⁶Ị́ ọkịarị mịnẹ ò gberie ḍukom, tẹ ori ọkọ sime ye ḍuko-a ḅẹḅẹ, ori í ḍiki-ịganị tẹ mịẹ tẹ kịnị nimi ḅa mịnẹ ị́yẹrị iruoḅọ.

⁷Tamụnọ, arị ị́ ḅara ḅiiarị mịnẹ ị́ mịẹ tẹ à ye ḅụ maaịn nyana tẹrẹmẹ à fịị:

⁸iruo ḅụ ị̀ wẹrị ḅelemaa, tẹ ḍụkụ tẹ arị ngọ-kọn ma, pịkị igoin ma. Mie ḅụ à fị na-iḅi fịye kịngẹ kẹ ị̀ pịrịị.

⁹À nyana ọkọ nẹngịma kụma, ẹbịsịya à ḅẹẹ ḅa arị ị́ kẹ mịẹ ḅẹ ye ofori. Kụma arị igoin kụma ẹbịsịya à furu tẹ ị̀ Tamụnọ tọrụ-tuu ḅa.

¹⁰Gbala-gbala fịrịmẹnjịḅọ mịẹ tẹ iḅi-a ye ḍuko ma, ọ̀ nyanaḅọ tọrọkọ. Ori í wori tẹ ị́ anị gotẹ tọrụsiẹrị ḅa.

¹¹Japụ emi tẹ ịna aḍapụ woriarị, pịkị ịna iyingiapụ kẹ ịn mịẹ iḅi in nimim nwẹn ḅẹẹ ye ḍie-pakama-a.

¹²Japụ emi tẹ kuromarị ịn kpaịn wararị, ini ini inetẹ ḅẹ ḅara kẹ ḅụrụ-kọsị wararị ogbo.

¹³Japụ emi tẹ kuromarị ini iḅi lama wararị ye; yei, in kuromarị ini iḅim ḅẹ ḅara mẹ ḍiki ya!

¹⁴Japụ emi tẹ kụrọ-kụrọ ḅara kẹ igoin-apụ na mịẹḅẹ-ọkụ-ofori apụ na mịẹ tẹ ini inomarị; anị ḅara mie ịn mịẹ-mịẹ tẹ kẹ angarị.

¹⁵Anwo maa eremịna-awọmẹ iyim, tẹ ini maa apụ ma gbọrụ ẹrẹ fịm, “Kẹ ị̀ pịrịị” Ye ḅụ ḅẹ inia aị emi tẹ ye pọkọ-tata-a aị:

¹⁶Ḍuḅu na, tụḅọ iyi-a ẹrẹḅọ na, samụnọtẹ-kiri na pịkị orumo na.

¹⁷Ḅẹḅọ-ḅẹḅọ tẹ amịna ḍaḅọ kẹ kpọọtiarị, anịanịa iyingiḅọ ḍiki-simarị ḅọ árị omongi sakị ḅụ, ẹdẹlẹ amẹẹ mḅọ pẹị, anịanịa piri-ḅio-ḅẹ opu afeni mḅọ atọrụngbọ gbọn pakama-ḅo na-iḅim.

¹⁸Inia aị emi tẹ ḅọị ḅakam ẹrẹsị àrị inetẹ arị fiearị ye naa ḅo-a:

¹⁹So-tọrụ fiin-arị igo, ịkụ ọgọnọ mẹnjịarị oronwi, abajị ḅio amịna muarị yọ ḍọkị nimiarị onwi-arụ, na owiḅọ na ẹrẹḅọ na ḅo jụmọ-jụmọ ḅẹlẹmarị ḅara na.

²⁰Mie si ẹrẹḅọ mịẹ-mịẹ ḅara: á sẹfị tẹ minji ḅiri famatẹ so ọkụma á ḅẹẹarị, “Kụma á mịẹ gbọrụ siye sọ ofori-o!”

²¹Inia aị emi tẹ tomikiri ḅẹ apụ inetẹ daa ḅịa aị:

²²Ḅo amadaḅọ sọarị omoniḅọ, oḅori-ḅọ tẹ ọ̀ fị ḅẹ ḅii-ye ḅii-ye nyana wararị ḅọ,

²³kịnị ḍiki-ḅioḅuarị ẹrẹḅọ tẹ owiḅọ ẹrị sime ḅọ, na fịrịmẹnjị-ẹrẹḅọtụḅọ tẹ á warị-nyana-ẹrẹḅọ kiri ọkị ḅọ na.

²⁴Inia anama emi tomikiri mẹ ḅụ, karakaraye ini ịrụ wararị sọ, ịn kpọma aka nimi lama wararị:

²⁵Mẹnẹ amẹẹ: ini ịnyọ nyana-a, kụma ịrụa kụra ḅụ ịn fịaị kobiri ḅụụ-wẹrịmarị.

²⁶Ḍụḅarị ḅio ịḅụkụ sokuarị kala anama: kụrọ sọ ịn kụrọ-a kụma ini ịkụ ma ogboku warị nama ḅụụ pịrịarị.

²⁷Igurube amẹẹ: ini amadaḅọ nyana-a, kụma ini ọrụtọn ḅara mẹnjịarị.

²⁸Ologboingboin amẹẹ: í inetẹ ị́ ḅara-ḅio gberie ọlọ wẹrị ḅa, kụma í inetẹ ịn ḍọkị-ẹrị ḅa amadapụ awarị ḅio.

²⁹Inia aị emii, tẹ ḍiki tọrụ ḅẹlẹmarị aị, arị mẹnjịarị sakị ḅụ:

³⁰ọkụkụ amẹẹ tẹ nama mamgba ogboku kụrọ tẹịn tẹ gberie-sọ ḍiki-ḅalafafa-a nama ma na,

³¹oḅori amẹẹ na, owi-ọḅọkọ amẹẹ na, pịkị amadapụ tẹ ebube nyana ḅara kẹ ịna atomi tọrọkọ ḅụ mẹnjịarị apụ na.

³²Í oḅori-sọ lamatẹ pịkị opu ẹkwẹn kọn-kọn tẹ siye kuromaḅo-ḅom ḅẹḅẹ, ḅarị mịẹ ma tẹ kuroma nyana-a!

³³Ị́ ndo-minji ḍarịma-ḍarịmaa, ị́ bọta nyana ḅa. Ị́ jụmọ nini ḅakụ-ḅakụ, pulo paka ḅa. Ị́ mịẹ tẹ ịganị paka-paka, ị́ ḅụụ-fụka kẹ ị́ ḅụụ pịrị ḅa.