Read kalabari Egberima-Ẹkwẹn 6 Bible Online

Egberima-Ẹkwẹn 6 - kalabari bible

Egberima-Ẹkwẹn 6

¹Ị̀ tụḅọ, ị́ jụmọ fị saa ḅẹ onyo-sẹịn tẹ ḅoto?

²Ị́ kọn ẹkwẹn ḅo í kun sịẹma tẹ ḅoto, tẹ í minini jụmọ pịrị ye ḅẹ ḍiein ḅio í koro tẹ ḅoto?

³Ị̀ tụḅọ, ọkọ ḅẹḅẹ, ị́ anị tomḅọ ḅe kụrọ ḅara-ḅio sọ tẹẹ; kụma mie ị́ mịẹ tẹ anị ḅio paka-ḅo ḅarị ḅara: mangị ọ̀ dama-mu tẹ ọ̀ tẹkẹẹ, tẹ ori ị́ ḅụụ ḅara-siin.

⁴Mono ḍọkị ma, anịanịa gbọrụ anga sime tẹ ịnyọsara.

⁵Ḍiein mẹ ḅio pụkọ-pakaḅoo, feni anịanịa tụḅara piri-deeḅọ ḅara-ḅio gụnụ paka-ḅo ḅo ḅara.

⁶Ḅụụ-sarasara-a atomi mu mẹnẹ kẹ ịna ḍumo kọn-kọn ḅara ḅụ ye ḍawọ gbẹm.

⁷Ini ma ịn sịḅịdaḅọ nyana-a, alaḅọ anịanịa ḅẹrẹtọnḅọ sọ,

⁸kụma ịrụ akụra ḅụ mie ịn fịye kobiri ḅụụ wẹrịmarị, ḅụụ-tẹlẹma oḅoku sakị pịrị ḅụ.

⁹Tọ sakị na gbasịye ḅụụ-sarasara-a tomḅọ mẹ nwẹn kẹ iḅila ọgọnọ ḅọlọlọ sime ḅẹ? Ọ̀ saakị ḅẹ sakị ḅọrọ tọ sakị?

¹⁰Ọ̀ ḅẹẹarị, “À paa boowa kala-sakị kẹ tọrụ-gbaịn-finji ḅa. Arị ị̀ aḅara iko tẹ kẹlẹ ịnyọsara ḅa.”

¹¹Kụma ọ̀ paa monoarị ogbo mie igoin ḅo owu kẹ ọ̀ paka ḅarịye, owuna-aị kẹ mu furuarị ḅọ kịka ḅara.

¹²Gberie ḅụ sọ ofori, si-sịḅịḅio-sụa atomi mẹnjịma ḅọrọ-ḅọrọtẹ iruo-aị iruo-aị ḍukoarị.

¹³Ịn tọrụ-anjị iwoma-iwoma tẹ tọnma ḅara kẹ oḅori kẹ ị́ sịn ḅẹ aị ḍukoarị,

¹⁴arị asakị mamgba in si-aị tẹlẹma wẹrịarị ịna pengetẹ akuroma ḅụ, anga mamgba ḅụ kamụ na owu na pakama-ḅo ḅẹ ḅara.

¹⁵Miemẹ ẹrẹsị, opu ḅụụ-fụka ḅo ịn la ḅa ḅiotọn-a ḅara ḅụ, tẹ ye ịn la tẹ ịn fịị-fịị ḅara sime ḅa.

¹⁶KỊNỊNYANAḄỌ ḅe ḍiki-ḅioḅuarị sonio aị emi, Ori opuma ḍiki-ḅioḅuarị sọnọma aị emi:

¹⁷ḅụụ-gelemarị tọrụngbọ, iruo-ḅẹlẹ, mịẹye-ofori apụ ḅaarị aḅara,

¹⁸kẹ kịnị mbasị ḅẹ aị kuromarị ḅioḅẹngbọ, na fọnya-fọnya mangị mu siye mịẹarị aḅụọ na,

¹⁹iruo ḅẹrẹ-kiri-simeḅọ, tẹ iruo-aị iruo-aị tan-sara kpolimarị ḅọ, na mịẹ tẹ mịnapụ kamụ-kamụ-sọarị ḅọ na.

²⁰Ị̀ tụḅọ, ị́ ḍa ḍuko ị́ pịrịarị mịẹ ḅẹ ye mịẹẹ, tẹ í iyingi kẹ í toluma tẹ ye mẹ kẹ ḅioḅọrọma ma.

²¹Sakị mamgba ịna ẹkwẹn ma kẹ ị́ ḅụụ ḅio koko, í ḅioḅẹngbọ ḅụ arị ịkasị wẹrị.

²²Í ye-muarị sakị ḅụ ịna toluma ye mẹ ị́ tọrọkọ sụn ḅa, ḍin ḅụ arị í kikima tẹ ye ị́ la ḅịa, anịsakị eneḅaka ḅụ arị ḅẹrẹ kẹ í toluma ḅa.

²³Ini ị́ ḅẹẹarị mịẹ ḅẹ aị ma, ḅịyarị bele sọ wararị; ị́ mịẹ-irima tẹ ịn kẹ ị́ da karakarama ye mẹ inetẹ ị́ anga ḅẹ ḅara kẹ í toluma ḅa.

²⁴Anị ị́ wẹrị ḅelema ḅa si ereme ḅụ, pịkị akụnakụna ẹrẹḅọ kẹ kịnị toluma famarị ẹkwẹn ma ḅụ.

²⁵Ḍụkụ tẹ ḍiki-tọrụ ḅụ ịna iḅi mẹ í toluma fama ma; ḍụkụ tẹ ịn tọrụngbọ-tọrụngbọ kẹ ị́ da-mu ḍiein ḅio suu ma.

²⁶Tomḅọ inetẹ fịturu-kpo la ḅẹ ye kẹ ama-mẹnjị-ẹrẹḅọ nyana ḅa, kụma sẹfị ḅụ mḅọ nyana-ye nyana-ye ḅọrọ tẹ faa ḅa.

²⁷Í inetẹ kọrị fịnị kẹ í ekpe oḅolo tẹ kẹ mẹnjị tẹ ị́ akapa dọkị ḅịa?

²⁸Í inetẹ kọrịarị anyịmgbọ ọgọnọ sịẹ mẹnjị tẹ ị́ aḅụọ dọkị ḅịa?

²⁹Anị gbọrụ ḅara mẹ mie jụmọ ta na gbọrụ iḅila ọgọnọ mono mẹ siye dogi-ḅo la ḅara. Anị mịẹ ḅọ mịẹ ḅọ ḅụụ-fụka da ḅa.

³⁰Kịnị ḅuru-pọkọtarị gotẹ fịye furu fị ḅọ ḍiki-sima-sima-a;

³¹anịsọ ini ò kun-kun, sọnọma akiri ọ̀ nwẹn anị gbẹẹ ḅa gbarị-a ḅara; ọ̀ ḅara sime-ye sime-ye ọ̀ pakama-ḅo fama ḅa.

³²Kụma sẹfị si mịẹ ḅọ mẹ, mḅọ kuroma nyana-a. Mḅọ mịẹarị ye anie amịna ḅụụ ḅaa guluguluma.

³³Ini mḅọ kẹ kụn-nyana-a ḅara mịẹ tẹ mḅọ fomu kọsịma ḅa; mḅọ tọrụ-tuu gbamaso ḅa.

³⁴Diḅọ nwẹn-sịn ḅọ mẹ, gbala-gbala afana ịganị mḅọ ḅụ saakị anị sakị nẹngị sakị ofori. Ọ̀ fịarị gbẹẹfị mẹ kunoma nyana-a.

³⁵Ori igbigi gbẹẹ-ye ọkị ḅịa; ị́ tan sara ọ̀ pịrị ḍiepịrịye tẹ ori ịganị deinma ḅẹ ye ofori.