Read kalabari Nimi Tolumaḅọ 12 Bible Online

Nimi Tolumaḅọ 12 - kalabari bible

Nimi Tolumaḅọ 12

¹Ị́ Tẹmẹḅọ ḅe kẹ ḅiokoromaa, ị́ asambịrịma wararị sakị ḅụ, tẹrẹmẹ si ene ma ḅo, tẹ kụra ma sọma-ḅo kpeki, anị sakị mẹ tẹ ị́ ḅẹẹ ḅa, “Àrị arị ḅụụ tọrụ-ḅẹlẹ nyana-a” ḅẹẹ ḅarị sakị mẹ;

²tẹrẹmẹ bele mẹ na, ịrụa mẹ na, akalụ mẹ na, lolia ma na ḅo furu, tẹ kpiti So-tọrụ ma eene mẹ koro ḅọrọ tẹrẹmẹ pịkịma-so.

³Anị ene mẹ, í aḅara ma tẹ ị́ gbaịn aị ma sẹkị ḅa, ị́ aḅụọ ma tẹ anị sakị kụrọ wararị aị ma ḅo lọkọ ḅa. Ị́ aka ma kịẹn-ḅịḅị fịye tokuru ḅụ ḅo kịsị lama ḅa, tẹ ị́ atọrụngbọ ma ḅutuḅutu tẹ ị́ ḅarị banabanama ye ẹrị ḅịa.

⁴Ị́ aḅeri ma pụụn kẹ etela-ogbo ḅụ kọn-arị ẹkwẹn pịrị ḅa. Ị́ ḅarị inetẹ giregire ḅara kẹ ịn ḍụḅarị ọgọnọ ye gbẹẹarị sakị fiearị ye, anịanịa ịn tii-arị ogbo farịarị akwa fiearị ye sọ naa ḅịa, kụma feni suuarị nume ngẹrị sọ ị́ saakịma ḅa mono ḅụ.

⁵Gele ayeyọ ị́ ḅalafama ḅa, tẹ mẹnjị nwẹnị ye kẹ kịnị lama-lama ye sọ ḅa. Ị́ sịḅị-ḅẹ-inume pịkị iḅulu ḅịya ḅa, alịmọnịdị fịlawa pịna-pịna ḅara; ị́ kpọma ḅụụ-fụkama tẹrẹmẹ inetẹ ị́ ḅụụ fọnọ mẹnjịma ḅa, anịsakị í ḅii aị mamgba mangị-so fama ḅa. Gbala tomḅọ so mḅọ sime gbamaso ịnyọsara anga muarị, anịsakị tomi nwẹnị ḍụẹịn ḍuu etela ma ḅụ mẹnjịma ḅọrọ ḅa.

⁶Tẹrẹmẹ seleḅa ḍigi mẹ pẹlẹ kpụlụ, anịanịa golu-golu ẹfẹrẹ mẹ fịị gẹrẹ-gẹrẹ, anịanịa kuku mẹ minji sararị ngụngụḅa mẹ suku fịị sara, anịanịa yedogiye mẹ ḅụọ mẹ anyị sara,

⁷tẹ fọọn-fọọn-fọọn oju mẹ pịkịma kiri ḅio mẹ mu tẹ tarị anị sime-ḅara sime, tẹ tẹmẹ mẹ pịkịma-so anị pịrị Tamụnọ ḅe ḍọkụma-mu ḅa.

⁸Ḅintẹ ḅara kẹ anị fieye nimi gberie sọ oforii! Nimi Tolumaḅọ ḅe ọkọ ḅẹẹm, Ḅintẹ ḅara kẹ anị fieye nimi gberie sọ oforii! Inn, ọkọ mie ye-goyegoye sime-ḅara!

⁹Ye-nimi mẹ sikima, Nimi Tolumaḅọ ḅe ye ḍawọ ḍịịn na, ye bala ḅara ḅụ egberima-ẹkwẹn ḍawọ tẹ anị fie ye nimi tẹ anị kẹ anị sime na-iḅi kiri koroma na kẹ tomi tolumam.

¹⁰Nimi Tolumaḅọ ḅe tomi ḅụụ-ḅẹlẹ-ḅẹlẹ ẹkwẹn-aḅịḅị ḍọkị-ḍọkị nimim, tẹ giregire ḅara ḅụ tụkụ tẹ iruo-a ḅara kẹ karakara ẹkwẹn-aḅịḅị kẹẹm.

¹¹Ye-nimiapụ kọn-arị ẹkwẹn ma sime-ḅara anie gbala nama ḍikiḍiki apụ ọlọ tẹ kẹ ịna anama ḍikiḍikiarị ḅịḅị pịọ-pịọtẹ sịn mẹ sime-ḅara, anịsakị kẹ iḅiọkụ ye ḅakụ kụrọma wararị tọnwa ngbọ sime-ḅara mie kobiri wararị egberima-ẹkwẹn ma sime-ḅara.

¹²Ị̀ tụḅọọ, ị́ ḅụụ ẹbị pịrị ḅarị jen ye emii. Ḍiri kẹẹ, kunoma nyana-a, anịsakị ye ḍawọ ḅaka mẹ, ḅụụ-ḅalaḅalama ye sọ oju-meni mẹ pịrịm.

¹³Ye mamgba ó naa fama tẹẹ. Ḅẹrẹ mẹ ḅẹ kunoma anie: Tamụnọ mangịma tẹ ori oloko ma kokoo, kẹ gotẹ ọkọ ḅẹẹarị, miemẹ anie bebe kọrịnama mẹ tẹ sime tomi mamgba pịrịm ịn kọrị ḅẹ ye.

¹⁴Kẹ gotẹ ọkọ ḅẹẹarị, Tamụnọ wa mịẹ ye goyegoye kẹ ḅẹrẹkọn ḅo ḅa, anị ḅọị ḅara ḅọị ḅara sọ, anị ḅọrọ iḅiye-o, anịanịa siye sọ.