Read kalabari Nimi Tolumaḅọ 2 Bible Online

Nimi Tolumaḅọ 2 - kalabari bible

Nimi Tolumaḅọ 2

¹Àrị ì ḅioḅẹngbọ ḅụ kuromam mịnẹ, à tọrụ-ḅẹlẹ sime-ḅara ḍọkị-nimi tẹ tọrụ-ḅẹlẹ ḅa. Kụma ḍikii, à ḍọkị-ẹrịm, Miemẹ sọ ḅintẹ ḅara kẹ anị fieye nimi-a ye.

²À ḍọkị ẹrịm mịnẹ ḍẹrị anie nọmụ, anịsakị tọrụ-ḅẹlẹ sọ gbọrụ iḅiye sọ mịẹ-a.

³Ị̀ tẹmẹ paa nimi ịgbanịarị ye ḅụ à tọn-pẹlẹm mịnẹ arị iru ḅuu, ḅuu tọrụ-ḅẹlẹ-ḅẹlẹ tẹ tii ma ḅọrọ ḅa. À kuromam mịnẹ mie iḅitẹịn ḅara tẹ tomi inetẹ kẹ tomikiri ḅụ ịna kpụlụ, kpụlụtẹ aḍumo ma sime na-iḅi ḅara.

⁴À tọnwa opu akọrịnama kọrị sọmam. À warị nama sịra, tẹ pịkị kụrọ aḍụọ ḍiḅi ị̀ ḅụụ pịrịm.

⁵À warị akaka ḅẹ aḍụọ ḍiḅi, pịkị sara-sime na-iḅi anga pakama ị̀ ḅụụ pịrị tẹ arị ḅio tọrụ-kịrịkịrị mgbọlụ sụarị asịn ḍiḅim.

⁶À suḅe soku-soku sara ị̀ ḅụụ pịrịm, minji ḍuu-ḍu kẹ ḍiḅi wararị asịn ma suku sara ḅẹ ḅara.

⁷À tọnwa omoniapụ fẹm, owiapụ na ereme na; anịsakị ị̀ warị-kuḅu ḅụ iyi omoniapụ sọ à nwẹn nyanam. Jeruselemu ḅụ tarị anga tẹ so tẹ ḅọ tẹ à nyana anambulo ogbo na, anana na oḅori na ogbo-ogbo na la kịẹn-ḅịḅị la ye nyana ḅọ ofori.

⁸À ḅaka ḅara kẹ ngọ kọnm, tẹ tọnwa seleḅa na, golu na tan-tan kobiri kpolima ị̀ ḅụụ pịrịm; anie à ḅẹrẹtọn pịrịarị amadapụ ma ngọ awarị ma ḅụ ḅo aị. Owiapụ na ereme na tẹ nume su-su ì ḅioḅẹlẹma apụ sọ à nyanam, anịsakị owiapụ ḅụụ ḅẹlẹ-ḅẹlẹ ḅara ḅụ arị à ḅii ḅara kẹ tọnwa ereme sọ na ịgwam.

⁹Anieḅụ à gburo-gburom, tẹ gburo-gburo kẹ tarị ị̀ tọrọkọ Jeruselemu ḅụ anga tẹ so apụ mamgba nẹngịm, tẹ nimi kẹ yẹrị ḅe mịẹ ye goyegoye mịẹm.

¹⁰À tọrụngbọ kẹ ẹrị tẹ ḅii-ye ḅii-ye à nyanam. Ì ḅioḅẹngbọ ḅụ tọrụ-ḅẹlẹ tẹ à kẹ ị̀ ḅụụ kụma ye ofori; kẹ gotẹ ọkọ ḅẹẹarị, ị̀ akọrịnama mamgba ḅụ, ì ḅioḅẹngbọ ḅioḅẹlẹ ḍọkị-ẹrịm; anịsakị miemẹ anie ị̀ akọrịnama mamgba ḅụ ị̀ gbẹẹ-ye.

¹¹Anịtẹso à nwẹnị à kọrị tẹ aị mamgba na, à lịlị tẹ anị kọrị ḅụ fama ye kẹ ḅiokoroma sakị, ḍikii! — arịmgba ḅintẹ ḅara kẹ arị fieye nimi-a aị; mḅọ gbala fẹrụ ḍukarị ọkụ, anịsakị tomikiri mẹ ḅụ nyana tẹ kẹ sọye mịẹ-mịẹ ye ofori.

¹²Anịtẹso à nwẹnị vuunma pịkị tẹ nimi na, nọmụ na, nimi-a na kẹ ḅiokoroma; anịḅọ ḅe tẹ amadaḅọ ḅe ḅọrọ tẹ ḅo ḅarị ḅọ ḅe ori inetẹ tiye mịẹ ḅẹ, amadaḅọ ḅe kọrị tẹ ye ḅụ saakị sikima tẹ?

¹³Anịtẹso à nwẹnị ẹrị mịnẹ bele kanakana nẹngị ḅara, mie nimi, nimi-a nẹngị ḅara.

¹⁴Ye-nimiḅọ ḅe ọ̀ mịẹ ḅẹ ye nimi wararị, tẹ kpaịnma anị mịẹarị; kụma ye-nimia-ḅọ ḅe mịẹ ḅẹ ye nimi-a; kụma anịsọ gbọrụ mịẹye mie sime inimgba pịrị ye.

¹⁵Anịtẹso à nwẹnị ị̀ ḅụụ ḅẹẹ, “Ye-nimia-ḅọ ḅe la ye la ye, mie yẹrị sọ la ḅarịye ḅẹẹ-sakị, à tiegotẹ mị-ḅara kẹ ḅẹlẹma ye nimi?” Anieḅụ à nwẹnị ị̀ ḅụụ ḅẹẹ mịnẹ miemẹ sọ ḅintẹ ḅara kẹ anị fieye nimi-a ye.

¹⁶Gbọrụḅọ-sọ ye-nimiḅọ ḅe kẹ ḅiokoroma alama-a ḅara mie gbọrụḅọ-sọ pịkị ye-nimia-ḅọ ḅe sọ kẹ ḅiokoroma alama-a ḅara. Ọmịnị ẹrị ḅa, ḅaa-fa-berembe, ini inimgba kẹ ḅioḅọrọma ḅa, inimgba fịị ḅa nwẹn ḅẹẹ sakị. Ye-nimiḅọ ḅe fịị ḅarị ḅara mẹ pembema ḅara mie ye-nimia-ḅọ ḅe sọ fịị ḅarị ḅara.

¹⁷Miemẹ ḅụ à nwẹnị ḍumo ḍiki-ḅioḅu, kẹ gotẹ ọkọ ḅẹẹarị, tomikiri mẹ ḅụ à mịẹye-mịẹye ḅụụ-fụka dogi-ḅo ị̀ pịrịm, gbala arịmgba ḅintẹ ḅara kẹ arị fieye nimi-a aị ẹrẹsị, tẹ fẹrụ ḍukarị ye ọkụ.

¹⁸À nwẹnị tomikiri mẹ ḅụ à lịlị ye mẹmgba ḅụ tiye-ì-gbo ḅẹẹ, àrị ẹrịm, àrị arịmgba koroma so ì kiri ọkị ḅẹ ḅọ pịrị ḅẹm ẹrẹsị,

¹⁹anịsakị tụḅọ nimi, anị ḅọ mẹ ye-nimiḅọ, anịanịa ye-nimia-ḅọ sọ ḅarị ḅoto? Anịsọ, ori mie à tomikiri mẹ ḅụ tọrụsiẹrị, lịlị, tẹ ì ye-nimi ḅụ nyana ḅo ye mẹmgba ḅụ ḅẹrẹtọn ḅarị ye. Miemẹ sọ ḅintẹ ḅara kẹ anị fieye nimi-a ye.

²⁰Anieḅụ à nwẹnị tiye-ì-gbo ḅẹ ì ḅioḅẹngbọ ḅụ, tẹ ḅio-lọkọ ḅụ ọḅụ pịkị tomikiri mẹ ḅụ à lịlị ye mẹmgba gbin,

²¹kẹ gotẹ ọkọ ḅẹẹarị, ja asakị, tomḅọ amịna nimi na, ḍawọ ḍịn ye na, ḅara kẹ mịẹ ḍin ye na, kẹ lịlị fama ḅọ arị ḅụ paka-ḅo aị mamgba koroma so kẹ arị gotẹ ḅụụ ḅaa-a ḅọ pịrị ḅa. Miemẹ sọ ḅintẹ ḅara kẹ anị fieye nimi-a ye, tẹ pịkị gburo-gburotẹ opu siye.

²²Tomḅọ nwẹnị tomikiri mẹ ḅụ mḅọ lịlị tẹ nụnụ ye mẹmgba ḅụ tiye nyana?

²³Gbala ò ḍumo-ene mamgba ḅụ, ḅụụ-gbene-a ọ̀ ḅụụ ḅin wararị, tẹ ọ̀ kọrịnama mẹ nwẹnị ḅo ịganị sọ; ḍin ḅụ sọ ò ḅioḅẹngbọ ịnyọsara-a. Miemẹ sọ ḅintẹ ḅara kẹ anị fieye nimi-a ye.

²⁴Tomi fị-na-ḅuu-na tẹ pịkị ịn lịlị ye ḅụ tọrụ-ḅẹlẹ nyana mẹ, anị nẹngị ye ofori. Miemẹ sọ arị ẹrịm, Tamụnọ ḅara ḅom;

²⁵kẹ gotẹ ọkọ ḅẹẹarị, ori ofori ọkụma tụḅọ inetẹ fị ḅẹ, anịanịa tụḅọ inetẹ tọrụ-ḅẹlẹ nyana ḅẹ?

²⁶Gbala ọ̀ ḅụụ-ḅẹlẹ ye mịẹarị ḅọ mie Tamụnọ nimi na, ye ḍawọ ḍin na, ḅioḅẹlẹ na kẹ pịrịarị ḅọ ẹrẹsị; kụma kobiri tunduruma kpoli kọrịnama mie ọ̀ kẹ si-mịẹḅọ ḅe pịrị ye, kẹ oriḅe tẹ Tamụnọ ḅụụ-ḅẹlẹ ye mịẹarị gbọrụḅọ pịrị ḅẹm ngẹrị gotẹ. Miemẹ sọ ḅintẹ ḅara kẹ anị fieye nimi-a ye, tẹ fẹrụ ḍukarị ye ọkụ.